17
1 Hpilisti masha ni gaw majan gasat na matu, Yuda mung na Sohko mare hta zup hpawng la nna, Sohko hte Azeka lapran na Ehpe Damim mying ai shara e dap jung tawn ma ai.
2 Shawlu hte Israela masha ni mung zup hpawng nhtawm Hpilisti masha ni hpe gasat na nga, shanhte shajin da ai Ela Kadit e dap jung tawn ma ai.
3 Hpilisti masha ni gaw maga mi de na kawng, Israela amyu masha ni gaw maga mi de na kawng hta tsap dingren nna shanhte a lapran e kadit langai din nga malu ai.
4 Gat mare na Goliat mying ai wa gaw Hpilisti dap kaw na pru wa wa rai nhtawm, Israela amyu masha ni hpe grang dakat wu ai. Shi gaw pe 9 jan tsaw nna pawng 125 li ai
5 magri mang palawng hpun let magri mang lagup gup da wu ai.
6 Shi a lagaw hpe mung magri mang laraw hte makawp da nga ai; shi a lahpa hta magri mang nri hpai da nga ai.
7 Shi lang ai nri gaw da hkaw daram kaba nna, de a ri lap gaw pawng 15 daram li nga ai. Shi a ninggang hpai ya ai hpyenla langai mung shi a shawng e hkawm nga ai.
8 Goliat sa tsap nna Israela amyu masha ni hpe, ?Nanhte ndai yang e hpa sa galaw law rai nga myit ni? Hpyen gasat na matu sa tsap dingren ren rai nga myit ni? Ngai gaw Hpilisti masha, nanhte gaw Shawlu a mayam ni rai nga myit dai! Ngai hte sat hkat na matu nanhte hta na masha langai mi lata da yu mu!
9 Shi ngai hpe gasat dang nna sat kau lu ai rai yang, anhte gaw nanhte a mayam ni tai na ga ai; rai ti mung ngai mahtang gasat dang nna shi hpe sat kau lu ai rai yang chyawm gaw nanhte mahtang anhte a mayam ni tai na rai myit dai.
10 Dai ni, ngai Israela luksuk hpe dakat nga nngai. Ngai hte shada chyaw rai htim gasat lu na masha langai ngai shaw shapraw dat yu mu le!,? ngu nna jahtau tsun wu ai.
11 Shawlu hte shi a masha ni dai ga na ma ai shaloi, shanhte hkrit kajawng nga ma ai.
12 Dawi gaw Ehprat ngu ai Yuda mung Betlehem mare hta nga ai Yese a kasha rai nga ai. Yese gaw kasha matsat lu ai rai nna Shawlu hkawhkam a lakhtak e shi gaw grai dingla ugut gu nga sanu ai.
13 Shi a kaba htum ai shadang sha masum gaw majan gasat na matu Shawlu kaw hkan nang nga ma ai. Dai kaba htum ai ni gaw alat ngu na Eliaba, dai hpang Abinadab hte masum ngu na Shama ni rai ma ai.
14 Dawi gaw shadang sha hpungdim rai nga ai. Kahpu ba ni marai masum Shawlu kaw hkan nang nga ai hte yang,
15 Dawi gaw Betlehem mare de wa wa rai nhtawm kawa a sagu ni hpe wa rem ya ya rai nga ai.
16 Goliat wa chyawm gaw nhtoi mali shi ya tup jahpawt shana Israela amyu masha ni hpe sa dakat kat di wu ai.
17 lani mi na aten hta Yese gaw Dawi hpe, ?Ndai mam npaw bye mali, ndai muk tawng shi la lang nhtawm dap de nga ai na nhpu ni kaw tin tin sa wa su.
18 Ndai ngachyu shage tawng shi hpe mung shanhte a hpyen du wa a matu la sa ya u. Na a nhpu ni kaning rai nga nga ma ai hpe sa yu nhtawm shanhte ni kaja ai, n kaja ai hpe mung mada yu let shanhte kaw na kumla lama mi sha gaw la wa rit,? ngu nna tsun wu ai.
19 Hkawhkam Shawlu, na a nhpu ni hte kaga Israela amyu masha ni yawng gaw Ela Kadit e nga nhtawm Hpilisti masha ni hpe gasat nga ma ai.
20 Dawi gaw hpang jahpawt jau jau rawt nna, sagu ni hpe rem ai wa langai ngai a lata hta ap kau da nhtawm, Yese shi hpe tsun matsun ai hte maren, lusha la gun nna pru mat wa wu ai. Israela amyu masha ni shanhte tsap dingren ai majan pa de pru sa wa let hpyen garu nga ma yang, Dawi gaw dap de shang wa wu ai.
21 Hpilisti hte Israela hpyen luksuk masha ni gaw shada myi man hkrum rai gasat hkat na matu shara hkyen bang wa nga ma ai.
22 Dawi gaw shi gun ai lusha ni hpe lusha garan ya ai hpareng wa hpe ap kau da nhtawm majan shara de kagat shang wa let shi a kahpu ni hpang de sa wa nna shanhte kaning rai nga ai lam san wu ai.
23 Shi shanhte hte ga shaga nga yang, Goliat gaw shawng de sit sa nhtawm shawng na zawn, Israela masha ni hpe dakat wu ai. Dai ga hpe Dawi na da wu ai.
24 Israela amyu masha ni dai Goliat hpe mu jang, hkrit kajawng ai hte hprawng mat wa ma ai.
25 Shanhte langai hte langai gaw, ?Shi hpe yu yu mu! Shi a grang dakat ai ga madat yu mu! Shi hpe sat lu ai wa hpe kumhpa kaba jaw na ngu na mung, shi a shayi sha hpe hkungran la shangun na ngu nna mung, dai wa a kawa a dinghku masha ni ahkun hkanse lawt lu na lam mung, Hkawhkam Shawlu ga sadi tawn da nu ai,? ngu nna tsun hkat ma ai.
26 Dawi gaw shi hte ani sha nga ai masha ni hpe, ?Dai Hpilisti masha wa hpe sat kau nna, ndai kaya kahpa jahpoi asawng hkrum nga ai kaw nna Israela amyu masha ni lawt lu jang, hpa baw lu la na re da aw? Ahkrung nga ai Karai Kasang a luksuk hpe hkap daw na, ndai n kam n sham ai Hpilisti masha wa gaw kaning re ai wa rai nga a ta?,? ngu nna san yu wu ai.
27 Shanhte mung shi hpe ndai Goliat wa hpe sat kau lu ai masha wa hpe dai hku lu la na re da, ngu nna tsun dan ma ai.
28 Dawi hte dai masha ni shaga hkat ai ga hpe Dawi a kahpu kaba Eliaba na wu ai. Shaloi shi masin pawt ai hte Dawi hpe, ?Nang ndai yang e hpa sa galaw nga n ta? Na a sagu ni hpe nam mali kata e kadai wa rem ya nga a ta? Nang gaw maka n kap ai ma she rai nga n hka! Nang gaw gasat gala hpe yu azi na matu sa du nga ai n rai hka!,? ngu nna tsun wu ai.
29 Dawi gaw, ?Ya ngai hpa galaw shut kau sata? Shing ngu nna sha pyi ngai n mai san a ni?,? ngu nna san wu ai.
30 Shi gaw kaga masha wa kaw kayin sa nhtawm dai hpe sha bai san wu yang, shi san ai aten shagu, shawng na mahtai hte maren sha shi lu la nga ai.
31 Masha nkau mi gaw Dawi kaning nga tsun nu ai ga hpe na ma ai rai nna, shanhte mung Shawlu hpe tsun dan mu ai hte shi hpe shaga dat ma ai.
32 Dawi gaw Shawlu hpe, ?Daru magam hpung shingkang hte hpring ai madu e, ndai Hpilisti masha wa hpe kadai mung n hkrit ra na ga ai! Ngai shi hpe sa gasat na we ai,? ngu nna tsun wu ai.
33 Shawlu chyawm gaw, ?N rai na re law! Nang shi hpe kaning di gasat lu na rai n ta? Nang gaw ma kasha sha naw rai nga ndai. Dai wa gaw shi a prat tup hpyenla galaw nga sai wa rai nga ai,? ngu nna htan wu ai.
34 Dawi gaw Madu hkawhkam wa e, ngai gaw nye wa a sagu ni hpe rem ai wa rai nngai. Hkanghkyi hte tsap langai ngai sagu kasha sa hpai mat wa shagu,
35 de a hpang ngai hkan shachyut nhtawm sagu kasha hpe hkan htim je la la rai nngai. Hkanghkyi shing n rai atsap e ngai hpe kayin htim wa ai shaloi, shi a du hta magra shadang nna kayat sat kau kau di we ai.
36 Ngai gaw hkanghkyi ni hte tsap ni hpe sat kau yu ni ai rai nna, ahkrung nga ai Karai Kasang a luksuk hpe hkap daw nga ai ndai n kam n sham ai Hpilisti masha wa hpe dai hte maren ngai galaw kau na we ai.
37 Dai Madu gaw ngai hpe hkanghkyi ni hte tsap ni a lata kaw na mung hkye la ni ai; ya ndai Hpilisti masha wa a lata kaw na mung ngai hpe hkye la na ra ai,? ngu nna tsun wu ai.
Shaloi Shawlu gaw, ?Mai sa, dai rai yang gaw sa su, Dai Madu gaw nang hte rau a nga nga u ga law,? ngu nna htan wu ai.
38 Shawlu gaw Dawi hpe shi hpyen palawng jahpun nna shi a baw hta magri mang lagup gup ya, hpri palawng mung jahpun ya di wu ai.
39 Dawi mung hpun palawng ntsa e Shawlu a nhtu hpe hpye rai hkawm chyam yu wu yang, shi n man ai majaw n dang wu ai. Shi gaw Shawlu hpe, ?Ndai hking ni yawng hte ngai n gasat lu na nngai, ngai garai n man nngai,? ngu nna tsun wu ai. Dai rai nna, dai ni yawng hpe raw kau wu ai.
40 Shi gaw shi a sagu rem dawhkrawng la nna, hka shi na manen tsawm ai lungdin manga hta la nhtawm, shi a tingsan hta bang da wu ai. Dai hpang shi a lakli hpe jin jin lang nna Goliat hte sa hkrum na nga sa mat wa wu ai.
41 Hpilisti wa mung Dawi hpang de sit sa wa magang nga ai rai nna shi a ninggang lang ai wa shi a shawng e sa wa nga ai. Shi gaw ni htep hkra sa wa ai rai nna,
42 Dawi hpe asan apra sha mu mada jang, shi hpe n gawn n sawn di wu ai; hpa majaw nga yang, shi gaw ahpraw asam tsawm nna yu htuk ai ma naw rai nga ai.
43 Shi gaw Dawi hpe, ?Dai dawhkrawng gaw hpa baw a matu rai lit ni? Ngai hpe gwi zawn nawn da nu ni?,? ngu nna tsun wu ai. Shi gaw shi a hpara mying gang let Dawi hpe dagam wu ai.
44 Shi gaw Dawi hpe, ?Sa rit, na a ashan hpe ntsa malen u ni hte matse labye dusat ni hpe ngai jaw sha kau ya na de ai,? ngu nna dakat wu ai.
45 Dawi gaw, ?Nang gaw ngai kaw nhtu, nri hte jinghkyen nri ni hte sa ndai; rai ti mung ngai chyawm gaw nang hkap daw ai dai Chyahtum Chyalai N-gun hte hpring ai dai Madu Israela hpyen luksuk ni a Karai Kasang a mying ningsang hte nang kaw sa ring ngai.
46 Dai ni jang, dai Madu gaw nye a lata de nang hpe ap kau na ra ai rai nna nang hpe ngai gasat dang kau nhtawm na a baw kahtam di la na nngai. Hpilisti ni a moi mang ni hpe mung ntsa malen u ni hte dusat ni sha na matu, ngai jaw kau na mawe ai. Israela amyu hta Karai Kasang nga nga ai hpe mungkan ga ting chye lu na mara ai;
47 dai Madu gaw shi a amyu masha ni hpe ri nhtu n lang ra ai sha, hkye la lu nga ai hpe ndai yang na masha shagu hte mung mu lu na mara ai. Shi gaw majan hta awng dang ai wa rai nga ai; nanhte yawng hpe nye a lata de shi hpe ap ya na rai wu ai,? ngu nna htan wu ai.
48 Goliat gaw Dawi hpang de bai shanang sa wa wu yang, Dawi mung shi hpe htim na nga Hpilisti majan man maga de tin tin kagat shang mat wa wu ai.
49 Shi gaw shi a tingsan kata de lata manaw bang nhtawm nlung langai shaw la nna Goliat hpang de nwat kabai dat wu ai. Shaloi nlung gaw shi a kahtan ang ang e sa hkra nna, shi a pungkum hpe agrawp kau ya wu ai majaw, Goliat mung ga de shagum hku kadawng mat wa wu ai.
50 Dawi gaw nhtu n lawm ai sha lakli hte nlung langai e sha Goliat hpe gasat dang kau nhtawm sat kau wu ai. Ref 17:50: 2Sa 21:19.
51 Dawi gaw shi kaw kagat sa nhtawm shi a makau e tsap let, n-ga na Goliat a nhtu shaw la nhtawm shi a baw hpe kahtam di nna shi hpe sat kau da wu ai.
Hpilisti masha ni mung shanhte a share ninghkrin wa si mat sai hpe mu ma ai shaloi, hprawng htaw mat wa ma ai. Ref 17:51: 2Sa 21:29.
52 Israela hte Yuda masha ni jahtau garu let shanhte a hpang hkan nang nhtawm Gat hte Ekron mare chyinghka hkan du hkra, lam dingyang hkan shachyut ma ai. Hpilisti masha ni hta na hkala hkrum ai ni mung Sharim kaw nna Gat hte Ekron du hkra lam yan ting hta kadawng taw nga ma ai.
53 Israela amyu masha ni chyawm gaw Hpilisti masha ni hpe hkan shachyut ai kaw nna bai nhtang wa nhtawm shanhte a dap na lanep arai ni hpe magawn la shajang ma ai.
54 Dawi chyawm gaw Goliat a baw hpe Yerusalem mare de la wa wu ai; rai ti mung Goliat a laknak arai ni hpe chyawm gaw shi a sum hta nan mazing tawn da wu ai.
55 Dawi gaw Goliat hpe gasat na nga sa wa ai hpe Shawlu mu jang, shi a hpyen dap hpe up hkang ai Abna hpe, ?Abna e, shi gaw kade a kasha rai nga a ta?,? ngu nna san wu ai.
Shaloi Abna gaw, ?Madu hkawhkam e, ?Ngai n chye myit lu nngai,? ngu nna htan wu ai.
56 Dai hpang Shawlu gaw, ?Shaloi rai jang, sa sagawn yu su,? ngu nna hkang dat wu ai.
57 Dai wa gaw Goliat hpe sat kau da nna dap de nhtang wa nga yang, Abna mung shi hpe Shawlu hpang de woi wa ya wu ai. Dai aten du hkra Dawi gaw Goliat a baw hpe naw hpai da nga ai.
58 Shawlu gaw shi hpe, ?Shabrang wa e, nang kade kasha rai n ta?,? ngu nna san wu ai.
Shaloi Dawi mung, ?Ngai gaw Betlehem mare na na a shangun ma Yese a kasha rai nga nngai,? ngu nna htan wu ai.