14
1-2 Lani mi na aten hta Yonahtan gaw shi a hpyen laknak arai hpai ya ai shabrang wa hpe, ?Wora Hpilisti dap de sa yu ga,? ngu nna tsun wu ai. Rai ti mung Yonahtan mahtang, Gibea mare hte nau n tsan ai Migron shara na hkainu si hpun nhpang e dap jung nga ai shi a kawa Shawlu hpe n tsun dan wu ai. Shawlu hte rau masha kru tsa dang nga nga ma ai.
3 (Shilo mare na dai Madu a hkinjawng rai nga ai Eli a kashu, Hpineha a kasha, Ihkabu a kahpu Ahitub a kasha, hpa hkai lawng hpai ai hkinjawng Ahiya mung lawm nga ai.) Yonahtan pru mat wa ai hpe dai masha ni kadai mung n chye dat ma ai.
4 Yonahtan gaw Hpilisti dap de shang sa wa ai shaloi, Mikmasha uhkan lunghkrung masen kaba lahkawng nga nga ai, uhkan a maga mi hpe Boze ngu shamying nna kaga maga mi hpe Sene ngu shamying da nga ai.
5 Langai mi gaw dingdung maga Mikmasha de man yawng nna, langai mi gaw dingda maga Geba de man yawng nga ai.
6 Yonahtan gaw shabrang wa hpe, ?N kam n sham ai Hpilisti masha ni a dap de rap sa wa yu ga. Dai Madu an hpe karum la na ra ai; shi rai nna, an hpe awng padang jaw ya ai rai yang, an hta masha n law ti mung, an hpe hkum shadang lu ai lam hpa mung nga lu ai n rai.
7 Dai shabrang wa gaw, ?Nang ra ai hku galaw u, ngai nang hte rau nga nga na nngai,? ngu nna htan wu ai.
8 Yonahtan gaw, ?Ara rai sa, wora de rap sa nhtawm Hpilisti masha ni hpe mu shangun ga.
9 An hpang de sa na, naw la nga mu, nga nna shanhte an hpe tsun jang, an du nga ai shara hta nga nga ga.
10 Rai ti mung, shanhte kaw sa wa mi, nga nna tsun jang chyawm gaw an sa wa ga; hpa majaw nga yang, shanhte hpe dang kau na awng padang dai Madu an hpe jaw nu ai; kumla gaw dai hku rai na ra ai,? ngu nna tsun wu ai.
11 Dai rai nna shan gaw shan a hkum hpe Hpilisti masha ni a man e shadan shadawng dan mu ai rai nna Hpilisti masha ni gaw, ?Yu mu! Hebre masha nkau mi shanhte makoi nga ai nhkun kaw na pru wa mara ai law!,? ngu nna tsun ma ai.
12 Dai hpang shanhte gaw Yonahtan hte shabrang wa hpe, ?Ndai de sit lung wa mi! Nan hpe anhte lama mi tsun dan na lu ga ai!,? ngu nna tsun ma ai.
Yonahtan gaw shabrang wa hpe, ?Nye a hpang hkan nang rit. Shanhte hpe dang kau lu ai awng padang dai Madu gaw Israela hpe jaw nu ai,? ngu nna tsun wu ai.
13 Yonahtan gaw uhkan shara kaw nna gumrawt lung wa wu ai; shi a shabrang wa mung shi kaw hkan nang nga ai. Yonahtan gaw Hpilisti masha ni hpe htim gasat nna anut kadawng kau wu ai; shabrang wa mung shanhte hpe hkan sat kau wu ai.
14 Yonahtan hte shi a shabrang wa gaw shawng na lang sat sharu ai hta eka mi a ka-ang hkup daram kaba ai shara hta masha hkun dang hpe sat kau ma ai.
15 Bum ga hkan nga ai Hpilisti masha ni yawng mung hkrit kajawng mat ma ai; dap e nga ai shang gasat na hpyenla ni mung hkrit gari mat ma ai; ginding aga she ashun rai grai hkrit kajawng nga ma ai.
16 Shawlu a masha ni gaw Benyamin a lamu ga na Gibea shara hta sin yu nga ma yang, Hpilisti masha ni dumbri dumbra, kashuk kashak rai hprawng kagat hkawm nga ma ai hpe mu ma ai.
17 Dai rai nna, Shawlu gaw shi a masha ni hpe, ?Hpyenla ni hpe hti yu mu, kadai wa mat nga ai hpe mung sagawn yu mu,? ngu nna tsun wu ai. Shanhte hti yu mu yang, Yonahtan hte shi a hpyen laknak arai hpai ya ai shabrang wa mat mat nga ma ai hpe mu sagawn nga ma ai.
18 Shawlu gaw hkinjawng Ahiya hpe, ?Dai hkinjawng hpa hkai lawng ndai de la wa rit,? ngu nna tsun wu ai. (Dai shani e Ahiya gaw Israela amyu masha ni a shawng e dai hpe hpai da nga ai.)
19 Shawlu gaw dai hkinjawng wa hpe shaga nga yang, Hpilisti dap de garu kachyi kashuk kashak nga nna grau grau sawng wa ai majaw, Shawlu gaw shi hpe, ?Dai Madu hpe tsun dan na aten n lu sai,? ngu nna tsun wu ai.
20 Dai hpang, shi hte shi a masha ni mung Hpilisti masha ni hpe htim gasat na nga, majan pa de rawt lung wa ma yang, shanhte shada da gasat hkat nna tsep kawp ashuk ashak rai jawng nga ma ai.
21 Hpilisti maga de gale shang mat wa sai Hebre masha nkau mi hte dap e shanhte hte rau nga nga ai ni gaw lang mi bai gale mat nna Shawlu hte Yonahtan ni hte matut mat ma ai.
22 Ehprim bum ga hkan makoi gyem nga ai kaga masha ni mung, Hpilisti masha ni hprawng kagat mat sai lam na ai shaloi, shanhte mung sa lawm nna Hpilisti masha ni hpe
23 Betawen lai hkra, lam dingyang gasat ma ai. Dai Madu mung Israela hpe dai shani e hkye la wu ai.
24 ?Nye a gumlau hpyen ni hpe ngai matai garai n htang lu yang, dai ni na nhtoi hta lusha sha ai wa kadai mung dagam dala hkrum u ga,? ngu nna Shawlu dagam shaka nna hkang da nu ai majaw dai shani e Israela amyu masha ni kawsi hpang gara hkrum nna n-gun kya nga ma ai. Kadai mung dai shani tup hpa mung n lu n sha nga ma ai.
25 Shanhte yawng gaw hpun maling de shang hkawm mu yang, shara shagu hkan lagat ntsin rawng nga ai hpe sa mu ma ai.
26 Shawlu a dagam dala ga hpe shanhte yawng hkrit nga ma ai majaw, hpun ni hta lagat ntsin hpring hkra rawng nga ti mung, dai hpe kadai mung n sha lu ma ai.
27 Rai ti mung, masha ni hpe shi a kawa tsun jahkrit da ai dagam dala ga hpe Yonahtan n na kau wu ai majaw, shi lang ai shingna hpe ladawn nna gitpa kata de achyaw bang dat nhtawm lagat ntsin loi mi hpe sha wu ai. Shaloi shi lang lata n-gun awai la lu wu ai.
28 Rai ti mung, masha langai mi gaw, ?Anhte yawng kawsi hpang gara hkrum nna n-gun kya nga saga ai, rai ti mung na nwa mahtang anhte hpe, ?Dai ni na nhtoi hta, lusha sha ai wa kadai mung dagam dala hkrum u ga,? ngu mi ai,? ngu nna tsun ma ai.
29 Shaloi, Yonahtan gaw, ?Nye wa gaw anhte a amyu masha ni hpe hkrit hpa amu she galaw kau nu sahka! Yu mu, lagat ntsin kachyi sha mi hpe ngai sha ai a majaw, ya ngai kade sha nga pyaw nga n hka!
30 Shanhte gaw gumlau hpyen gasat dang kau ai shaloi, shanhte a malu masha anhte a amyu masha ni sha kau lu mu yang gaw, dai ni na nhtoi hta kade sha nga pyaw na mi re law. Hpilisti masha ni hpe kade mung naw sat kau lu na rai mu hka!,? ngu nna htan wu ai.
31 Dai shani e, Israela amyu masha ni gaw Hpilisti masha ni hpe Mikmasha kaw nna Aiyalon du hkra gasat shamyit nna dang kau ma ai. Dai aten hta Israela amyu masha ni kawsi hpang gara hkrum nna n-gun kya nga ma ai majaw,
32 gumlau hpyen ni kaw na shanhte kashun la lu ai sagu hte dumsu kasha ni hpe dai shara hta nan sat tawn nhtawm shan hte asai katsing hprap hprap sha ma ai.
33 Shaloi, ?Yu mu, ndai amyu masha ni gaw sai rawng ai shan katsing sha nna dai Madu hpe shut kau manu ai,? ngu nna Shawlu hpe tsun dan mu ai.
Shawlu gaw, ?Nanhte gaw ga lale ai ni she rai nga myit hka! Ndai yang e nlung kaba langai galau tawn da ya mi!,? ngu nna jahtau tsun wu ai. Ref 14:33: Nin 9:4; Jaw 7:26-27; 17:10-14; 19:26; Trj 12:16,23; 15:23.
34 Dai hpang shi gaw kaga hkang da ai lam hpe ning ngu jaw ya wu ai: ?Amyu masha ni hpang de pru sa nhtawm, shanhte a sagu dumsu nang de dun sa wa na lam, shanhte yawng hpe tsun mu. Dai ni hpe ndai yang e sat nna, ndai kaw nan sha na rai ma ai; shan hte asai katsing hprap hprap sha let dai Madu hpe shanhte shut lu na mu ai n rai.? Dai rai nna dai shana jang, shanhte yawng mung shanhte a dumsu ni la sa nhtawm dai yang e sat ma ai.
35 Shawlu mung dai Madu a matu tawn hkungri langai galaw wu ai; dai gaw shi galaw ai shawng nnan na tawn hkungri rai nga ai.
36 Shawlu gaw shi a masha ni hpe, ?Sa, anhte yu sa nna Hpilisti masha ni hpe shana e sa htim gasat saga; jahpawt nhtoi htoi ai aten du hkra shanhte hpe hkan hpya nna shanhte yawng hpe sat kau ga,? ngu nna tsun wu ai.
Shanhte gaw, ?Nang myit yu nna kaja htum ai hku galaw u,? ngu nna htan ma ai.
Rai ti mung, hkinjawng wa mahtang, ?Karai Kasang hte shawng jahkrum yu ga,? ngu nna tsun wu ai.
37 Dai rai nna, Shawlu gaw Karai Kasang hpe, ?Ngai Hpilisti masha ni hpe gasat na rai ni? Anhte hpe awng padang jaw na n ni?,? ngu nna san wu ai. Rai ti mung Karai Kasang chyawm gaw dai shani e n htan ya wu ai.
38 Dai hpang Shawlu gaw amyu masha ni a ningbaw ni hpe, ?Nang de sit wa marit, kaning re ai yubak wa galaw shut kau saga ai hpe dai ni tam sawk sagawn yu ga.
39 Nye a kasha Yonahtan hta ang wa tim, mara shut ai wa gaw sat kau ai hkrum na rai nga ai, ngu nna Israela hpe awng padang jaw ya ai dai ahkrung nga ai dai Madu hta ngai ga sadi tawn da nngai,? ngu nna tsun wu ai. Rai ti mung, dai hpe kadai mung n tsun gwi ma ai.
40 Dai hpang, Shawlu gaw shanhte hpe, ?Wora maga de nanhte yawng tsap yu mu; Yonahtan hte ngai chyawm gaw ndai maga de tsap na ga ai,? ngu nna tsun wu ai.
Shanhte gaw, ?Nang myit ai kaja htum ai hku galaw u,? ngu nna tsun ma ai.
41 Shawlu gaw dai Madu Israela a Karai Kasang hpe, ?Madu e, nang hpa majaw ngai hpe dai ni e n htan ya nga n ni? Dai Madu Israela a Karai Kasang e, chyoi pra ai nlung hku nna ngai hpe mahtai jaw e law. Yonahtan shing n rai nye a majaw shut hpyit mara nga ai rai yang, Urim maga madun ai hte mahtai jaw ya e; rai ti mung na amyu masha Israela hta ang wa ai rai yang Htumim maga pru nna mahtai madun e law,? ngu nna tsun wu ai. Dai mahtai gaw Yonahtan hte Shawlu hta madun dan nga sai majaw, amyu masha ni asan awan sha lawt mat ma ai. Ref 14:41: Bhk 27:21; 1Sa 28:6.
42 Dai hpang Shawlu gaw, ?Nye a kasha Yonahtan hte nye a lapran daw dan hparan ya e,? ngu nna tsun wu yang, dai gaw Yonahtan hta wa ang nga ai.
43 Dai hpang, Shawlu gaw Yonahtan hpe, ?Nang hpa galaw shut kau n ta?,? ngu nna san wu ai.
Yonahtan mung, ?Ngai lang ai shingna hte achyaw la nna lagat ntsin kachyi mi hpe sha kau ni ai. Ngai nang e nga nga nngai-si na matu jin jin rai nga nngai,? ngu nna htan wu ai.
44 Shawlu gaw shi hpe, ?Nang sat kau ai n hkrum na rai yang gaw Karai Kasang ngai hpe si hkra adup u ga!,? ngu nna tsun wu ai.
45 Rai ti mung, amyu masha ni chyawm gaw Shawlu hpe, ?Israela a matu nde wa kaba la ai awng padang ninglaw jaw ya ai Yonahtan gaw si lu na rai wu ni? Dai hku n rai u ga, shi a baw hta na kara singgawng mi mung mat lu na n rai nga ai gaw ahkrung nga ai dai Madu hta anhte ga sadi tawn ga ai. Dai ni shi galaw ai amu gaw Karai Kasang karum la ai hte sha galaw kau lu nu ai re,? ngu nna tsun ma ai. Dai rai nna amyu masha ni gaw Yonahtan hpe si na kaw na hkrang la nga ma ai.
46 Dai hpang, Shawlu gaw Hpilisti masha ni hpe n shachyut mat nu ai rai nna shanhte mung shanhte a mung ga de nhtang mat wa ma ai.
47 Shawlu gaw Israela hkawhkam tai ai hpang, shara shagu hkan nga ai shi a gumlau hpyen ni ngu na Moba masha, Amon hte Edom masha ni, Zoba hkawhkam ni hte Hpilisti masha ni hpe gasat shamyit kau wu ai. Shi gasat ai shara shagu hkan awng padang hkam la lu nga ai.
48 Shi gaw share shagan myit hte gasat shaja nna Amalek masha ni hpe pyi dang kau wu ai. Israela amyu masha ni hpe htim gasat shatsang ai ni yawng a lata hta na hkye la wu ai.
49 Shawlu a shadang sha ni gaw Yonahtan, Ishwi, hte Mahkishua hte rai ma ai. Shi a shayi sha kaba wa hpe Merab ngu shamying nna kanau hpe Mihkala ngu shamying nga ai.
50 Shi a madu jan gaw Ahimaza a shayi sha Ahinoam rai nga ai. Shi a hpyen luksuk hpe up hkang ai wa gaw shi a kawa toi Nera a kasha Abna rai nga ai.
51 Shawlu a kawa Kisha hte Abna a kawa Nera gaw Abiela a kasha yan rai nga ai.
52 Shawlu hkrung nga dingsa, shi gaw Hpilisti masha ni hpe majan aja awa gasat ra wu ai rai nna, n-gun ja nna magrau grang ai masha mu shagu, shi a hpyen luksuk jahpan hta mying bang la la rai wu ai.