YAWHAN A SHINGRAN LAIKA
(REVELATION)
Ga Nhpaw
Yesu Hkristu hpe Madu ngu nna kam sham ai majaw Hkristan ni nni nkri zingri zingrat hkrum nga ai ten hta Yawhan mu ai shingran hpe ka da sai. Laika ka ai wa a yaw shada ai lam madung gaw: ndai laika hpe hti ai ni, myit mada shara hte n-gun jaw ai lam lu la na hta n ga, dai ru yak jam jau zingri zingrat hkrum nga ai ni hta, shanhte a makam masham maju jung ngang kang na matu rai nga ai.
Ndai laika hta dai aten aprat na Hkristan ni hta lai nna, kaga masha ni yawng chye na yak ai kumla ga ni hpe lang nna shingran mu ai lam ni hpe matut manoi tang madun da ai lam malawng maga rawng nga ai. Sen hkum dum sumpyi nsen langai mi hta yaw shada ai lam madung ni nga ai zawn shingran mu ai lam amyu myu hpe matut manoi bai kahtap htap di nna tang madun da nga ai. Ndai prat e Shingran Laika hpe azin ayang lachyum htai ai shaloi myit la ai lam hta shai hkat ai lam amyu myu nga nga ai, rai ti mung ndai Chyum Laika a yaw shada ai lam ka-ang gindai gaw asan sha rai nga ai. Dai gaw, ?Karai Kasang gaw Yesu Hkristu a marang e Satan hte kaga hpyen nga manga hte hpe hpang jahtum ai nhtoi hta atsai awai awng dang kau ai hpang, sadi dung ai shi a amyu masha ni hpe sumsing lamu ningnan, ginding aga ningnan ngu ai shaman chyeju ni ap ya na,? ngu ai rai nga ai.
1
Ndai laika gaw Yesu Hkristu hpe Karai Kasang jaw ai shingran a lam ka matsing tawn ai laika re. Yesu hpe ndai shingran jaw ai lam gaw, gade n na yang byin wa na ra ai lam ni hpe Karai Kasang a shangun ma ni chye lu hkra madun dan na matu rai nga ai. Hkristu gaw shi a shangun ma Yawhan hpang de lamu kasa hpe shangun dat nna, ndai shingran ga shana dan wu ai.
Yawhan mung shi mu ai lam yawng hpe tsun dan wu ai rai nna, da ndai gaw, Madu Yesu shapraw shadan dan ai Karai Kasang kaw na mungga hte teng man ai lam hte seng nna Yawhan a shana dan ai lam rai nga ai.
Ndai shingran Chyum Laika hpe hti ai wa hte, ndai myihtoi ga hte hpe madat mara nna, ndai laika hta ka da mada hpe hkan galaw ai ni gaw a lu ma ai. Hpa majaw nga yang, tsun dan ai amu lam ni byin wa na ahkying ladaw ni wa magang ra ai.
Ngai Yawhan gaw Asi mungdaw hta nga ai hpung sanit hpang de laika ka dat nngai.
Ndai prat, moi prat, htawm hpang prat ni hta anga nga ai Karai Kasang kaw nna mung, shi a tingnyang man e nga ai Wenyi sanit hte kaw nna mung,Ref 1:4: Zeh 3:9; Yhn 1:1. Kangka re ai sakse wa, si mat ai ni hta na shawng numshawn hkrung rawt wa ai wa, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga law.
Anhte hpe tsaw ra nna, shi hkum nan hpe hkungga nawng si hkam ai hte anhte a yubak kaw na raw dat mi ai hte, Shi a Kawa a magam amu hpe gun hpai lu na matu anhte hpe mungdan amyu hte hkinjawng aya jaw ya ai Yesu Hkristu kaw hpung shingkang hte daru magam ahkang aya gaw htani htana e anga nga u ga law! Amen.Ref 1:6: Shr 20:6; 1Tm 6:16; Heb 13:21; 1Pe 2:5-9.
Yu mu! Shi gaw sumwi ni hta jawn nna du sa wa ra ai; Madu hpe nri hte galun baw ai ni hte hpawn masha yawng gaw shi hpe mu lu na mara ai. Dinghta ga na amyu nlang hte gaw, shi a majaw yawn hkyen sharung shayawt na mara ai. Dai hte maren byin wa u ga law!Ref 1:7: Dan 7:13; Mat 24:30; Mrk 13:26; Luk 21:27; 1Ht 4:17.
Ngai gaw ningshawng wa mung rai nga nngai, jahtum wa mung rai nga nngai, nga nna ndai prat e mung, moi prat e mung, du na ra ai htawm hpang prat e mung anga nga ai Chyahtum Chyalai n-gun atsam rawng ai Madu Karai Kasang gaw tsun nga ai.Ref 1:8: Shr 22:13.
Ngai gaw nanhte a hpu nau wa Yawhan rai nga nngai. Yesu a hpang hkan nang ai wa langai mi hku nna, shi a Mungdan hte seng ai masha ni hkrum sha nga ai nni nkri hpe myit galu let nanhte hte rau hkam sharang nga ai wa rai nga nngai. Ngai gaw Karai Kasang a mungga hte Yesu Hkristu sakse hkam shadan dan ai dai teng man ai lam hpe hkaw tsun shana dan ai majaw Patmu ngu ai zunlawng de sa kau ai hkrum nngai. 10 Dai Madu a nhtoi hta e Wenyi hta ngai nawng mat wa ai rai nna, ngai gaw pahtau nsen hte bung ai nsen kaba langai mi nye a shingdu maga de nna shaga ai hpe na lu nngai. 11 Dai nsen gaw, ?Nang mu ai hte maren laika hta ka la nhtawm, dai laika hpe Ehpesu, Samurna; Pergamu, Htuatira, Sardi, Hpiladehpi hte Ladoki mare ni hta nga ai hpung sanit hpang de shagun dat u,? nga ai.
12 Shing rai ngai hpe shaga nga ai wa gaw kadai wa rai nga ai kun? ngu mu lu na matu ngai kayin yu dat yang, ngai gaw ja pyengdin sanit hte, 13 dai ni a ka-ang e masha zawn san ai wa langai mi shi a lagaw lahkre du hkra re ai bu hpun palawng bu hpun nna shi a sinda hta ja shingkyit kyit nga ai hpe ngai mu nngai.Ref 1:13: Shr 15:6; Eze 1:26; Dan 7:13; 10:5. 14 Shi a kara gaw hpraw ai sagu mun zawn shing n rai hkyen zawn hpraw nga ai. Shi a myi ni gaw wan shinglet zawn tu nga ai;Ref 1:14: Dan 7:9. 15 Shi a lagaw yan mung wan hta jen kau sai magri kabrim tsawm ai zawn san nga ai; shi a nsen gaw wu kadu ai hka rum zawn wu ngoi nga ai.Ref 1:15: Shr 14:2; Eze 43:2; Dan 10:6. 16 Shi a lata hta shagan sanit lang da wu ai; shi a n-gup kaw na nshan lahkawng maga dai ai ntawng nhtu pru nga ai. Shi a myi man gaw htoi kang ai shani chyingtung na jan zawn tu ala nga ai. 17 Dai wa hpe ngai mu jang, shi a lagaw nhpang e si ai wa zawn ngai kadawng taw mat nngai. Shi gaw shi a hkra lata nye a ntsa e mara ya nna, ?Hkum hkrit et! Ngai gaw ningshawng wa mung, jahtum wa mung rai nga nngai.Ref 1:17: Shr 1:11; Esa 41:4; Eze 1:28; Dan 8:18; 10:10. 18 Ngai gaw ahkrung nga ai wa mung ngai rai nga nngai; ngai si ni ai rai ti mung ya htani htana prat dingsa e ngai ahkrung nga nngai. Ngai gaw si hkrung si htan a ntsa e mung, si hkrung si htan a mungdan a ntsa e mung up hkang na ahkang aya lu nngai. 19 Dai re ai majaw, nang mu lu sai lam ni hpe mung, ya nga nga ai lam ni hpe mung, htawm hpang e byin wa na ra ai lam ni hpe mung, ka da u. 20 Nye a hkra lata hta nang mu lu ai shagan sanit hte ja pyengdin sanit a makoi magap da ai lachyum gaw da ndai rai nga ai: shagan sanit hte gaw hpung sanit hpe sin ai lamu kasa sanit rai nna, pyengdin sanit gaw dai hpung sanit rai nga ai.