4
1 Dai she rai yang gaw, anhte amyu bawsang a kawa daju Abraham a lam
hte seng nna hpa tsun nga na naw
nga a ni? Shi a mahkrum madup hpa
rai ta?
2 Lama wa Abraham gaw tinang galaw ai magam bungli ni a majaw Karai Kasang
a man e ding hpring ai lu la a yang
gaw shi hta gumrawng gumtawng na lam
nga lu ai. Rai ti mung shi gaw Karai
Kasang a man e gumrawng gumtawng ai
lam n galaw lu wu ai.
3 Dai Chyum Laika mung ?Abraham gaw Karai Kasang hpe kam sham wu ai rai
nna shi a makam masham a majaw, Karai
Kasang shi hpe ding hpring ai wa ngu
nna hkap la wu ai,? nga ai. Ref 4:3: Nin 15:6; Gal 3:6; Yak 2:23.
4 Masha langai ngai gaw bungli galaw nna shabrai lu ai shaloi dai shabrai
gaw masha wa e chyeju hku jaw ai n re
ai sha tinang hkam la ging ai majaw
sha lu ai rai nga ai.
5 Rai ti mung masha gaw tinang a tara shadik ai magam bungli ni hpe n kam
hpa a yang gaw, Karai Kasang dai wa
hpe shi a makam masham a marang e mara
n lu ai wa re ngu nna daw dan ya na wu
ai. Dai gaw shi a makam masham a marang
e ding hpring ai ngu nna Karai Kasang
a man e sawn ya ai lam rai nga ai.
6 Tara shadik ai magam bungli a majaw n re sha ding hpring ai wa ngu nna Karai
Kasang e sawn ya ai hpe hkam la hkrum
ai wa gaw a nga ai nga nna Dawi tsun
ai gaw:
7 ?Tara shut hpyit ai hta na raw dat hkrum ai ni hte,
yubak mara kaw na shalawt dat hkrum ai ni gaw a lu ma ai! Ref 4:7: Shk 32:1-2.
8 Yubak mara ni hpe Madu e
matsing da n hkrum ai ni gaw a lu ma ai!,? nga ai.
9 Dawi tsun ai, ndai a lu ai lam gaw matu gadoi hkam ai ni hte sha seng nga a ni?
Kaja wa n rai law! Dai gaw matu gadoi n
hkam ai ni hte mung seng nga ai. Hpa
majaw nga yang, ?Abraham gaw Karai
Kasang hpe kam sham wu ai majaw Karai
Kasang gaw shi hpe ding hpring ai wa
ngu nna hkap la wu ai,? nga nna Chyum
Laika hta ka da ai ga hpe anhte tsun
ga ai.
10 Dai zawn Abraham hpe ding hpring ai wa ngu nna Karai Kasang e sawn ya
hkrum ai aten gaw galoi rai ta? Matu
gadoi garai n hkam ai shawng e rai ni?
Shing n rai hpang e rai ni? Matu kadoi
hkam la ai hpang e n rai, garai n hkam
yang she rai nga sai.
11 Shi gaw Karai Kasang e ding hpring ai ngu nna sawn ya ai hpe hkam la ngut ai
hpang e she matu gadoi ai hking hpe
hkam la wu ai. Dai matu gadoi ai hking
gaw, Abraham a makam masham a majaw
matu gadoi hking garai n hkam la ai
kaw nna Karai Kasang e ding hpring ai
ngu ya hkrum ai hpe madun dan ai masat
dazik kumla nan rai nga ai. Dai re ai
majaw Abraham gaw matu gadoi ai hking
n hkam la ti mung, Karai Kasang hpe
kam sham ai a marang e ding hpring ai
ngu ya hkrum wu ai.
12 Abraham gaw matu gadoi ai hking hkam la ai ni a kawa mung rai nga ai. Lam
mi hku tsun ga nga yang, shi gaw matu
gadoi ai hking hkam la ai hta n-ga,
anhte a kaji kawa Abraham matu gadoi
hking garai n hkam la ai ten hta Karai
Kasang hpe kam sham asak hkrung shamu
shamawt lai wa sai kasi ningli hpe
hkan dagraw ai ni a kawa mung rai nga ai.
13 Karai Kasang gaw Abraham hte shi a aru arat ni hpe, mungkan ga a madu
tai shangun na nga nna ga sadi tawn
da nu ai. Dai zawn shi ga sadi tawn
da ai gaw Abraham gaw dai jep ai
Tara hpe madat mara hkan sa shatup
ai majaw n rai, Karai Kasang hpe kam
sham ai a marang e shi hpe ding
hpring ai wa ngu nna Karai Kasang
hkap la sawn ya ai rai nga ai. Ref 4:13: Nin 17:4; Gal 3:29.
14 Hpa majaw nga yang, lama rai nna jep ai Tara hpe hkan sa shadik ai ni chyu
sha dai Karai Kasang ga sadi a sali
wunli hpe hkam la lu ai nga yang gaw
makam masham gaw kaman lila rai mat
wa ai hte ga ndat mung lachyum n rawng
hpoi mat sai. Ref 4:14: Gal 3:18.
15 Dai jep ai Tara gaw Karai Kasang a pawt sindawng ai hpe shapraw ya nga ai; rai
ti mung; Jep ai Tara n nga yang gaw
Tara tawt lai ai lam mung nga na n rai.
16 Dai ga sadi gaw jep ai Tara hpe hkan shatup ai ni a matu sha n rai Abraham
zawn Karai Kasang hpe kam sham ai ni
yawng a matu mung rai nga ai, hpa
majaw nga yang Abraham gaw anhte yawng
mayawng a wenyi lam hta Kawa rai nga ai. Ref 4:16: Rom 3:24; 9:8; Gal 3:22.
17 Dai gaw, ?Ngai nang hpe masha amyu law law a kawa shatai sade ai,? nga
nna Chyum Laika hta tsun da ai hte
maren rai nga ai. Dai rai nna Abraham
kam sham ai Karai Kasang a man e dai
ga sadi gaw mai kaja ai hte grin nga
malit dai. Shi gaw Abraham kam sham ai
Karai Kasang, si mat ai ni hpe jahkrung
ya ai Karai Kasang, shawng de garai n
byin yu ai arai ni byin tai paw pru wa
hkra hkang da ai Karai Kasang, shi nan
rai nga ai. Ref 4:17: Nin 17:5; 1Ko 1:28; Ehp 2:1,5.
18 Abraham gaw myit mada shara n nga sai aten hta pyi, Karai Kasang hpe kam sham
let myit mada wu ai rai nna shi gaw amyu
law law a kawa tai wa sai. Dai gaw Chyum
Laika hta, ?Na a nshu nsha ni gaw lamu
na shagan ni zawn law htam na mara ai,?
nga nna ka da ai hte maren rai nga ai. Ref 4:18: Nin 15:5.
19 Dai aten hta Abraham gaw asak latsa ning pyi du magang wa nu ai rai nna tinang a
hkum gaw jasi zawn rai nga sai hte num
mung kasha n mai lu sai hpe mung chye wu
ai rai ti mung shi a Karai Kasang hpe kam
sham ai myit n yawm mat lu ai. Ref 4:19: Nin 17:17; 18:11; Heb 11:11-12.
20 Shi gaw galoi mung Karai Kasang a ga sadi hpe kam shut ai hte n di n da n
re ai sha, Karai Kasang hpe kam hpa
ai lam n kabai kau wu ai hta n ga shi
a makam masham gaw shi hpe n-gun atsam
jahpring ya nga ai rai nna shi Karai
Kasang hpe shakawn kungdawn wu ai.
21 Karai Kasang gaw shi a ga sadi hte maren shi shabyin na ra ai hpe Abraham
awm dawm kam sham da wu ai.
22 Shing rai kam sham wu ai majaw Karai Kasang Abraham hpe ding hpring ai wa
ngu nna hkap la wu ai.
23 ?Karai Kasang gaw shi hpe ding hpring ai wa ngu nna hkap la wu ai,? ngu ai
ga gaw Abraham langai mi hpe chyu sha
sha-ang nna ka da nga ai n rai.
24 Anhte a Madu Yesu hpe si mat ai ni kaw na hkrung sharawt la ai wa hpe kam sham
ga ai majaw, ding hpring ai ngu nna hkap
la hkrum sai anhte a matu mung sha-ang
nna ka da nga ai.
25 Hpa majaw nga yang ding hpring ai ngu nna Karai Kasang e hkap la lu na matu
Madu Yesu gaw, anhte a shut hpyit ai
yubak mara ni a majaw si hkam na matu
ap kau hkrum nna shi hpe bai sharawt
la ai hkrum nu ai. Ref 4:25: Esa 53:5-6; 2Ko 5:21; Gal 1:4; 1Pe 1:21.