1 Dai re ai majaw hpu nau ni e, Karai Kasang gaw anhte a ntsa e tsaw ra matsan dum ai myit kaba rawng nga ai majaw shi a amu gun hpai na hte shi sharawng awng ai ahkrung nga ai hkungga tai na matu nanhte a hkum hkrang nawng ya na ngai nanhte hpe shadut jahkat dat made ai. Dai gaw nanhte nawng ya ang ai myit masin a teng man ai daw jau ai lam rai nga ai. 2 Nanhte gaw ndai dinghta mungkan a lai madang ni hpe n hkan dagraw ai sha, nanhte gaw Karai Kasang hku nna nanhte a kata lam myit masin hpe tsep kawp galai shai kau shangun mu. Dai shaloi nanhte gaw Karai Kasang a myit ra ai lam, mai kaja ai lam, shi hpe sharawng awng shangun ai lam, hkum tsup re ai lam gaw, hpa rai nga ai ngu ai hpe chye ginhka lu na marin dai.

3 Dai rai nna, kadai mung tinang hkum hpe mai myit ai hta jan nna nau wa n rai dum na matu Karai Kasang ngai hpe jaw ai Wenyi chyeju kumhpa a marang e nanhte langai hte langai hpe ngai htet shana dat nngai. Shing rai na malai nanhte langai hte langai hpe makam masham ren di nna garan jaw da sai hte maren tinang a hkum hpe sari rawng ai hku myit yu nna daw dan la u ga 4 Hpa majaw nga yang anhte gaw hkum hkrang langai sha hta daw shan law law lu nga ga ai hte maren dai daw shan ni yawng mung langai hte langai amu gu dek lu shajang nga ma ai. Ref 12:4: 1Ko 12:12; Ehp 4:16. 5 Dai hte maren law law rai nga ga ai anhte mung Hkristu hta hkum hkrang langai sha tai nna anhte gaw langai hte langai shada da daw shan rum nga ga ai. 6 Shing rai anhte gaw anhte hpe karan jaw ai chyeju kumhpa kaga ga lu ga ai hte maren, dai kaga ga lu ai chyeju kumhpa ni hpe jai lang ra ga ai. Anhte lu ai chyeju kumhpa gaw Karai Kasang a mungga hkaw dan chye ai atsam rai yang gaw anhte lu ai makam masham chyeju kumhpa hte maren hkaw tsun ga, 7 Masha hpe karum daw jau chye ai chyeju kumhpa rai yang gaw daw jau ga, sharin shaga chye ai chyeju kumhpa rai yang gaw sharin shaga ga, 8 shadum shahprang n-gun jaw chye ai chyeju kumhpa rai yang gaw shadum shahprang n-gun jaw ga. Masha hpe karan kachyan alu jaw chye ai atsam rai yang gaw n daw n hta jaw u ga, up hkang na ahkang aya chyeju kumhpa lu ai wa gaw shakut shaja let kasang kalang up hkang nga u ga, matsam dum chye ai wa gaw kabu gara ai myit hte galaw u ga. 9 Tsaw ra ai myit hta sawt ai n lawm u ga, n hkru n hkra ai hpe n ju n dawng matsat nna, mai kaja ai hta manoi nga mu. 10 Nanhte shada da tsaw ra ai hta langai hte langai shinggyim nau na myit majing rawng nga mu, hkungga lara ai hta shada da shagrau hkat nga mu. 11 Lagawn lamawn n re ai sha magam bungli hpe n-gun lapyin dat let shakut shaja galaw nga mu. Tup hkrak maju jung ai myit masin hte dai Madu a bungli hpe agalaw nga mu. 12 Myit mada let kabu gara nga mu. Nanhte hkrum hkra na ru yak jam jau lam ni hta hkam sharang nga mu; akyu hpyi ai hta tut e htep lahti rai nga mu. 13 Ra kadawn nga ai nanhte a Hkristan hpu nau ni hpe tinang lu ai arung arai ni gam jaw gam ya nga mu; chyasam manam ni hpe hkap hkalum daw jaw daw ya nga mu.

14 Nanhte hpe zingri zingrat re ai ni hpe shaman ya mu, shaman ya mu. Shanhte hpe dagam dala hkum rai myit Ref 12:14: Mat 5:44; Kas 7:60; 1Ko 4:12; 1Pe 3:9. 15 Kabu gara re ai ni hte rau kabu gara nga mu, hkrap ngu hkrap ngoi re ai ni hte rau hkrap ngu hkrap ngoi nga mu. 16 Shada da myit tsang hkat nga mu. Gumrawng gumtawng n re ai sha arawng n lu ai lit ni hpe hkap la gun hpai nga mu. Tinang hkum hpe hpaji rawng ai zawn hkum nawn nga myit Ref 12:16: Shk 131:1-2; Esa 5:21; Yer 45:5.

17 Nanhte hpe masha langai ngai n hkru n kaja ai hku tai yang, shi hpe n hkru n kaja ai hku hkum tai mu, masha shagu a myit hta htap htuk mai kaja ai ngu myit sawn la mai ai amu galaw na shakut shaja nga mu. 18 Nanhte a maga hku nna rai lu myit dai daram, masha nlang hte hte myit hkrum ngwi pyaw simsa hkra nga mu. 19 Tsaw ra ai ni e, galoi mung tinang nan matai hkum htang mu, Karai Kasang mahtang she dai matai htang ai lam galaw u ga. Hpa majaw nga yang Chyum Laika hta Karai Kasang gaw, ?Ngai matai htang na nngai, mara hte maren ngai htang jaw na nngai,? nga nna ka da nga ai. Ref 12:19: Trj 32:35; Gsh 24:29; Heb 10:30. 20 Shing rai na malai Chyum Laika hta ka da nga ai hte maren ?Nang hpe hpyen ai wa kawsi nga yang, shi hpe shat jaw u; shi hpang gara nga yang, lu na jaw u; hpa majaw nga yang, shing rai galaw ai a majaw, shi a baw ntsa e grung nga ai wan n ga mara sumpum da ya ai zawn kaya hkrum shangun lu na rin dai.? Ref 12:20: Pru 23:4-5; Gsh 25:21-22; Mat 5:44. 21 N hkru n kaja ai gaw nang hpe n dang kau u ga, shing rai na malai mai kaja ai hte n hkru n hkra ai hpe dang kau u.