6
(1Hk 8:12-21)
1 Dai hpang Hkawhkam Shawlumon gaw,
?Madu e, nang gaw sumwi hte nsin kata e nga nga na matu lata la nit dai.
2 Ya chyawm gaw ngai gaw na a matu
htani htana shanu nga na shara hte
na a matu hkik hkam ai Nawku Htingnu
langai gap ya se ai,? ngu nna akyu hpyi wu ai.
3 Israela amyu masha ni yawng dai yang e tsap nga ma yang, hkawhkam wa gaw shanhte hpang de myi man yawng nhtawm shanhte a ntsa e Karai Kasang a chyeju shaman ya na matu hpyi ya wu ai.
4 Shi gaw, ?Dai Madu Israela a Karai Kasang hpe shakawn kungdawn mu! Shi gaw nye wa Dawi hpe shi tawn da ai ga sadi hpe shadik shatup ya nu ai. Dai Madu tsun ai ga sadi gaw ndai hku rai nga ai: Ref 6:4-9: 2Sa 7:1-13; 1Hl 17:1-12.
5 ?Egutu mung kaw nna nye a amyu masha ni hpe ngai woi shapraw wa ai shani kaw nna ngai hpe nawku na Htingnu gaw gap na shara hpe Israela mung ting na kaning re ai mare hpe mung ngai n lata la nngai. Nye a amyu masha Israela hpe woi awn na masha kadai hpe mung ngai n lata la nngai.
6 Rai ti mung, ya chyawm gaw ngai nawku daw jau hkam na matu, Yerusalem hpe mung, nye a amyu masha ni hpe up hkang na matu nang Dawi hpe mung ngai lata la ni ai,? ngu nna tsun wu ai.
7 Shawlumon gaw matut nna, ?Dai Madu Israela a Karai Kasang hpe nawku na matu Nawku Htingnu langai gaw gap na lam nye wa Dawi maw mawn nga ti mung,
8 dai Madu mahtang shi hpe, ?Nye a matu Nawku Htingnu langai gaw gap na nang myit ra sharawng nga ai lam gaw jaw ai lam rai nga lit dai;
9 rai ti mung dai hpe nang galoi mung gap lu na ndai n rai. Dai hpe na a kasha ngu na, na a nshang hkrat kasha majing mahtang nye a matu Nawku Htingnu hpe gaw gap na rai wu ai,? ngu nna tsun wu ai.
10 ?Ya chyawm gaw dai Madu shi a ga sadi hpe shatup nu ai hte maren, Israela hkawhkam rai nga ai nye wa a hkaw tingnyang hta ngai hkang galai nga ni ai rai nna, dai Madu Israela a Karai Kasang hpe nawku na Nawku Htingnu hpe ngai gap da se ai.
11 Ngai gaw Nawku Htingnu kata hta dai Madu gaw Israela amyu masha ni hte tawn da ai ga shaka lungpa ni rawng ai Ga Shaka Sumpu hpe tawn da se ai.?
(1Hk 8:22-53)
12 Shaloi Shawlumon gaw amyu masha ni nga ai man de sa mat wa nhtawm tawn hkungri a man e tsap let shi a lata sharawt nna akyu hpyi wu ai.
13 (Shawlumon gaw magri mang pinra langai galaw nhtawm dai hpe wang ka-ang e tawn da wu ai; dai gaw man mali bung nna galu maga de pe matsat, tsaw maga de pe manga rai nga ai. Dai pinra de shi lung nna masha shagu shi hpe mu lu ai shara hta lahput hput di let sumsing lamu de shi a lata sharawt da wu ai.)
14 Shi gaw, ?Dai Madu Israela a Karai Kasang e, sumsing lamu hte ginding aga yawng hta nang hte bung ai karai kasang n nga nga ai. Na a amyu masha ni hte tawn da ai na a ga shaka hpe nang shadik shatup nhtawm nang hpe myit masin mahkra hte hkan sa madat mara let nga nga ma yang, shanhte hpe na a tsaw ra myit madun dan nga ndai.
15 Nye wa Dawi hpe nang jaw da sai ga sadi hpe nang shatup ya nga nit dai; tsun ai ga shagu mung dai ni hpring tup mat nga sai.
16 Ya chyawm gaw Madu Israela a Karai Kasang e, shi sadi sahka hte galaw ai amu a majaw shanhte na a ga hpe madat mara hkan sa ai rai nna Israela hpe up hkang na hkawhkam shi a amyu matu ni hta na langai mi tut nawng paw pru na lam, nang shi hpe tsun let, nye wa hte ga sadi tawn da sai hpe mung, nang shatup na rai nga ndai. Ref 6:16: 1Hk 2:4.
17 Dai rai nna ya chyawm gaw, Madu Israela a Karai Kasang e, na a shangun ma nye wa Dawi hpe nang jaw tawn da nit dai ga sadi shagu hpe teng tup byin shangun nga u ga law.
18 ?Rai ti mung, O Karai Kasang e, nang gaw shinggyim lasha, numsha ni hte rau ga ntsa e teng teng shanu nga lu na ndai kun? Sumsing lamu yawng pyi nang hpe rawng da lu na daram kaba nga ai n rai; dai rai yang, ngai gap da ai ndai Nawku Htingnu gaw kaning rai kaba ram lu na rai nga a ta? Ref 6:18: 2Hl 2:6.
19 Madu nye a Karai Kasang e, ngai gaw na a shangun ma wa she rai nga nngai. Nye a akyu hpyi ga hpe madat ya let, nang kaw hpyi lajin ai ga ni hpe mahtai jaw ya e law.
20 Ndai Nawku Htingnu hpe shani shana sin yu nga u. Ndai shara gaw nang hpe nawku na shara tai na ra ai, nga nna nang ga sadi jaw nit dai; dai re ai majaw ndai Nawku Htingnu de myi man yawng let nang hpe akyu hpyi yang nye a akyu hpyi ga hpe madat ya e. Ref 6:20: Trj 12:11.
21 Ndai shara de myi man yawng nna akyu hpyi yang, nye a akyu hpyi ga hpe mung, na a amyu masha Israela ni a akyu hpyi ga ni hpe mung na ya e. Sumsing lamu e nga ai na a nta hta madat mara ya mi; anhte a shut hpyit mara ni hpe raw dat kau ya mi.
22 ?Masha langai gaw kaga langai wa hpe shut hpyit nna mara shagun hkrum ai hte ndai Nawku Htingnu kata na, na a tawn hkungri de woi sa nhtawm shi mara n kap nga ai hpe sa dagam yang,
23 O Madu e, sumsing lamu hta e madat la nna na a shangun ma ni hpe jeyang mi; mara kap ai wa hpe shi hkam la ging ai hte maren ari jaw u, mara n kap ai wa hpe chyawm gaw shi hkam la ging ai hte maren mara dat ya u law.
24 ?Na a amyu masha Israela ni nang hpe shut kau ai majaw gumlau hpyen ni a lata hte sum mat ai hkrum jang, shanhte nang kaw myit kayin wa let ndai Nawku Htingnu de sa nhtawm mara raw dat ya na matu nang kaw shagrit shanem ai myit hte hpyi nem nga ma yang,
25 shanhte a hpyi nem ai ga hpe sumsing lamu hta madat mara ya u. Shing rai na a amyu masha ni a yubak mara ni hpe raw dat kau ya nna shanhte hte shanhte a kaji kawa ni hpe jaw na ngu ai mungdan de bai woi wa u law.
26 ?Na a amyu masha ni nang hpe shut kau ai mara a majaw marang n htu mat jang, shanhte myit malai wa nna ndai Nawku Htingnu de myi man yawng let nang kaw shagrit shanem ai hte hpyi nem wa mu yang,
27 O Madu e, shanhte a hpyi nem ai ga hpe madat mara ya nna na a shangun ma ni rai nga ai Israela amyu masha ni a yubak mara ni hpe raw dat kau ya u. Jaw ai amu galaw na matu mung shanhte hpe sharin ya u law. O Madu e, na a amyu masha ni hpe nang jaw da ai htani htana sali ga ngu ai ndai na a lamu ga ntsa e marang htu ya mi law.
28 ?Dai mungdan hta hkuwa wa ai, ana zinli, kahtet kang ai nbung hte dinggam-yaw a majaw hten za mat ai nsi naisi, na a amyu masha gumlau hpyen ni e htim gasat hkrum ai, ana ahkya hte machyi makaw shanhte hta hkrum sha wa ai shaloi,
29 shanhte a akyu hpyi ga ni hpe madat mara ya u. Na a amyu masha Israela hta na kadai rai ti mung tinang a yawn hkyen ai myit hpe shapraw let ndai Nawku Htingnu de shanhte a lata sharawt nna akyu hpyi mu ai shaloi,
30 shanhte a akyu hpyi ga hpe na ya u. Sumsing lamu na na a nta hta shanhte a ga hpe madat ya nna shanhte a mara dat ya u law. Nang chyu sha shinggyim masha a myit masin kata na myit mang ai lam ni hpe chye ya nga ndai. Langai hte langai tinang galaw ai amu hte maren hkam la shangun mi law;
31 shaloi na a amyu masha ni nang hpe hkrit hkungga nhtawm anhte a kaji kawa ni hpe nang jaw da ai mungdan hta shanhte nga nga ai laman na a ga hpe madat mara na rai mu ai.
32 ?Sumtsan mung e nga ai maigan masha wa pyi, nang kade wa galu kaba nna daru magam n-gun rawng nga ndai hte nang gaw tut nawng amu galaw ai wa rai nga ndai hpe na jang, ndai Nawku Htingnu kata e akyu hpyi na matu sa du na mara ai shaloi,
33 shanhte a akyu hpyi ga hpe madat ya u. Nang nga ai sumsing lamu hta shanhte a nsen hpe na ya nhtawm shanhte nang hpe galaw shangun ai amu hpe galaw ya u; shaloi mungkan masha ni yawng gaw na a amyu masha Israela ni galaw ai zawn nang hpe chye wa nna na a ga hpe madat mara na mara ai. Nang nawku daw jau hkam na matu ngai galaw da se ai ndai Nawku Htingnu hpe shanhte chye lu na mara ai.
34 Shanhte a gumlau hpyen ni hpe sa gasat na matu, na a amyu masha ni hpe nang hkang dat nna shanhte kanang e nga nga ai rai ti mung ngai lata san da ai ndai mare hte na a matu ngai gap da ai ndai Nawku Htingnu de man yawng let shanhte nang kaw akyu hpyi ma ai shaloi,
35 shanhte a akyu hpyi ga ni hpe madat ya u. Shanhte a hpyi jahtau ai nsen hpe sumsing lamu hta na ya nhtawm shanhte hpe awng padang jaw ya u.
36 ?Na a amyu masha ni nang hpe shut hpyit nna yubak n galaw ai kadai mung n nga nga ai. Na a pawt sindawng ai a majaw shanhte hpe shanhte a gumlau hpyen ni hpe dang kau shangun nna kaga mungdan nkau mi de bawng masha ni zawn woi mat wa hkrum nna mungdan hte tsan mat wa tim,
37 na a amyu masha ni a akyu hpyi ga ni hpe madat ya u. Shanhte gaw kade wa yubak mara galaw nna n hkru n hkra rai nga ma ti mung dai mungdan hta shanhte myit malai lu nna nang kaw akyu hpyi let mara hpyi nem ma ai shaloi, O Madu e, shanhte a akyu hpyi ga hpe madat ya nga u law.
38 Shanhte gaw dai mungdan e teng teng myit masin kraw lawang asan sha hte myit malai lu wa nhtawm anhte a kaji kawa ni hpe nang jaw da sai ndai mungdan de myi man yawng let nang lata san da sai ndai mare hte na a matu ngu nna ngai gap da ya se ai ndai Nawku Htingnu de nang hpe akyu hpyi ma ai shaloi,
39 shanhte a akyu hpyi ga ni hpe madat ya u. Sumsing lamu na na a nta hta shanhte a hpyi nem ai ga hpe na ya let shanhte hpe matsan dum nga u. Na a amyu masha ni a yubak mahkra hpe mara raw dat ya u law.
40 ?Ya chyawm gaw, O nye a Karai Kasang e, anhte hpe mada yu nhtawm ndai shara e akyu hpyi ap nawng ai ga ni hpe madat ya mi.
41 Madu Karai Kasang e ya rawt u; Ga Shaka Sumpu hte na a daru magam n-gun ndai Nawku Htingnu de shang nna dai yang e htani htana a shanu nga nu ga law. Na a hkinjawng ni galaw ai amu magup hpe shaman ya u law: na a mai kaja ai chyeju a majaw na a amyu masha ni yawng kabu gara lu mu ga law. Ref 6:41: Shk 132:8-10.
42 Madu Karai Kasang e, nang lata la nit dai hkawhkam wa hpe hkum ningdang kau et; na a shangun ma Dawi hpe madun ai tsaw ra myit hpe adum nga u law. ? Ref 6:41-42: Shk 132: 8-10.