3
1 Shawlumon a kawa Hkawhkam Dawi chyawm gaw Nawku Htingnu gap na shara hkyen lajang da sanu ai. Dai gaw dai Madu Dawi hpe shadan dan sai Yerusalem mare na Moria Bum ntsa ngu na Yebusi masha Arauna lang yu sai chyarang pa hta rai nga ai. Ref 3:1: Nin 22:22.
2 Hkawhkam Shawlumon hkawhkam tai ai mali ning a shata lahkawng hta htingnu gap hpang wa nga sai.
3 Hkawhkam Shawlumon gap na Nawku Htingnu gaw galu maga de pe 90, nda maga de pe 30 rai nga ai.
4 Gawk de shang wa ai chyinghka lam gaw Nawku Htingnu a nda hte maren pe 30 rai nga ai, tsaw maga de pe 180 rai nga ai. Kata gawk hpe chyawm gaw ja jet hte sup da nga ai.
5 Gawk kaba a kata maga de arit hpunpyen ni hte kum nna ja jet hte sup nhtawm dai ni hta namhtan hpun sumla ni hte saidawng sumla hkrang tawk ka da nga ai.
6 Hkawhkam wa gaw dai Nawku Htingnu hpe tsawm nna manu dan ai lung seng hte Parwaim mung na jashawn ai ja ni hte mawn sumli da wu ai.
7 Nawku Htingnu shakum ni hpe mung, ngau hte chyinghka hkinbawng ni hpe mung, chyinghka ni hpe mung ja hte sup da nga wu ai. Shakum ni hta singkaw tu ai hkrung kanu ni a hkrang sumla hpe tawk ka wu ai.
8 Kata gawk ngu na Chyoi Pra Htum ai Shara gaw de a galu de Nawku Htingnu a nda pe 30 hte maren rai nna de a nda de pe 30 rai nga ai. Dai Chyoi Pra Htum ai Shara a shakum ni hpe ja tan 25 hte sup da nga ai;
9 Ja maina a matu awng sa 20 rawng ai ja lang nna, ntsa gawk ni a shakum ni hpe mung ja hte sup da nga wu ai.
10 Dai Chyoi Pra Htum ai Shara hta tawn da na matu singkaw tu ai hkrung kanu lahkawng hpe nhprang arai hte n re ai ja hte galaw da na lam, amu galaw masha ni hpe hkawhkam wa hkang da wu ai. Ref 3:10-13: Pru 25:18-20.
11-13 Dai hpe shang wa chyinghka lam e shada da man hkrum hkrum rai shatsap da nga ai. Shan a singkaw lahkawng shachyen da yang maga mi de pe 7 chyen rai nga ai. Shing rai shan a singkaw maga mi hte maga mi shachyen da nna gawk ka-ang e de a matu lahkawng shada hkrum rai nga ai. Kaga singkaw lahkawng mahtang shakum hte hkra nga ai rai nna dai gaw pe sumshi dam nga ai.
14 Chyoi Pra Htum ai Shara a matu nba grang langai mi hpe mung, mut ai, shaba pu nsam rawng ai hte hkyeng ai nsam pru ai ri ni hpe jaw la nna mani ai lachyit ri ni, kaga arung arai ni hte singkaw tu ai hkrung kanu nba grang hpe galaw wu ai. Ref 3:14: Pru 26:31.
(1Hk 7:15-22)
15 Hkawhkam wa gaw pe 52 tsaw ai shadaw lahkawng galaw nna Nawku Htingnu a man e jung da wu ai. Dai yan a magum gaw pe 7 jan tsaw shajang nga ai.
16 Dai shadaw matu yan a ntsa e hkri ai saidawng maka kasi hte magri mang hkainu si latsa hte mawn sumli da nga ai.
17 Dai shadaw yan hpe Nawku Htingnu de shang wa ai chyinghka lam a dingda maga de Yahkin ngu shamying ai shadaw langai, dingdung maga de Bua ngu shamying ai shadaw langai jung tawn da wu ai.