26
(2Hk 14:21-22; 15:1-7)
Yuda mung na amyu masha ni yawng mahtang asak shi kru ning kaba sai Amazia a kasha Uzia hpe shi kawa a hkang hta hkawhkam tai wa na matu lata san da ma ai. (Ndai gaw Amazia si mat ai hpang Uzia mahtang Elat mare bai gasat la nna dai mare hpe bai de da wu ai.)
Uzia gaw asak shi kru ning hta hkawhkam tai wa sai rai nna Yerusalem mare hta manga shi lahkawng ning up nga ai. Shi a kanu gaw Yerusalem mare na Yehkolia rai nga ai. Shi gaw shi a kawa a kasi hta hkan let, dai Madu awng sharawng ai amu hpe galaw wu ai. Nawku htung hte seng nna shi hpe hpaji jaw ai Zehkaria ahkrung nga dingsa dai Madu hpe sadi sahka hte daw jau wu ai rai nna Karai Kasang shi hpe shaman ya wu ai.
Uzia gaw Hpilisti masha ni hpe sa gasat ai rai nna Gad, Yamne hte Ashdod mare bunghku ni hpe run hpya kau nhtawm Ashdod mare makau na mare ni hpe bunghku kum nna Hpilisti mung na naw ngam nga ai mare ni hpe de da wu ai. Karai Kasang gaw shi hpe Hpilisti ni hpe mung, Gurabala mare e nga ai Arab masha ni hpe mung, Meuni masha ni hpe mung gasat dang kau lu na matu karum ya nga ai. Amon masha ni mung Uzia hpe ahkun hkanse jaw ma ai; shi a daru magam n-gun grai ja wa ai hte shi a kajai gumhkawng ai gaw Egutu mung de du hkra pyi pri rai nga ai.
Uzia gaw Jut Chyinghka e mung, Kadit Chyinghka e mung, bunghku galau kau ai shara hta langchyi galaw nna Yerusalem hpe bunghku kum let shangang shakang da nga ai. 10 Shi gaw bum ga hkan e ngang ai langchyi ni hpe gap da nhtawm, sinna maga de na bum lagaw ni hte pa layang hkan e nga ai yam nga hpung law law nga ai majaw hka lawng law law hpe mung galaw da wu ai. Shi gaw sun hkauna galaw sha ai amu hpe yu sharawng wu ai majaw bum ga hkan e sabyi sun galaw na matu mung, namhpun rawng ai ga hta hkauna galaw na matu mung amyu masha ni hpe n-gun jaw shadut wu ai.
11 Shi hta majan gasat na matu shajin da chyalu hpyen luksuk kaba langai lu ai rai nna hkawhkam wa a hkringmang langai rai nga ai Hanani hkang ai npu na shi a amu madu Yeiela hte Masea ka matsing da ai jahpan hpe kyem mazing da ma ai. 12 Dai luksuk hpe up hkang ai du salang ni 2,600 rai nga ai. 13 Shanhte a npu hta hkawhkam wa a matu gumlau hpyen ni hpe dang kau lu hkra gasat shamyit kau lu ai hpyenla 307,500 nga nga ai. 14 Uzia gaw hpyen luksuk a matu ninggang, nri, gupchyawp, hpyen palawng, ndan hte lakli ningwat na matu nlung ni hpe karum madi shadaw wu ai. 15 Shi gaw Yerusalem mare hta langchyi hte mare bunghku jut ni kaw nna ndan gap na hte nlung kaba ni hpe kabai na matu arung arai nnan chye shachyaw ai ni hpe galaw shangun wu ai. Shi a kajai gumhkawng ai gaw shara shagu de chyam bra mat wa nna Karai Kasang kaw na karum la ai lam lu la wu ai majaw daru magam n-gun grai rawng wa wu ai.
16 Rai ti mung Hkawhkam Uzia gaw n-gun rawng wa jang, myit tsaw myit dap wa ai rai nna dai gaw shi hkrat sum na lam de woi mat wa nga ai. Shi gaw tawn hkungri ntsa e manam pyaw ai baw hpe nat nawng na nga Nawku Htingnu kata de shang nna dai Madu shi a Karai Kasang hpe hkap daw wu ai. 17 Hkinjawng Azaria gaw n-gun ja nna nden marai rawng ai hkinjawng matsat shi hte rau hkawhkam wa kaw hkan nang nna, 18 shi hpe hkap hkum let shanhte gaw, ?Uzia e! Nang gaw dai Madu hpe manam pyaw ai baw nat nawng ya na ahkang n lu nga ndai. Arun a amyu matu kaw nna yu hkrat wa ai hkinjawng ni chyu sha ndai amu hpe galaw na matu nawng da hkrum sai ni sha mai nga ai. Dai re ai majaw ndai chyoi pra ai shara kaw nna pru mat wa u; nang gaw Madu Karai Kasang hpe shut hpyit kau nit dai majaw shi a shaman chyeju hpe galoi mung hkam la lu na ndai n rai,? ngu nna tsun wu ai. Ref 26:18: Pru 30:7-8; Bhk 3:10.
19 Uzia mung Nawku Htingnu kata manam pyaw ai baw nat nawng ai tawn hkungri makau e tsap nga nna manam pyaw ai baw hpe nat ai wa hpe jum da nga ai. Shi mung hkinjawng ni hpe masin pawt nga yang, shi a kahtan e manggang ana akajawng sha kahpawk pru wa nga wu ai. 20 Azaria hte kaga hkinjawng ni gaw yu hkrit na zawn re ai hkawhkam wa a kahtan hpe yu mau let, Nawku Htingnu kaw nna pru mat wa na matu shi hpe jawm shadut ma ai. Dai Madu shi hpe ari jaw nu ai majaw shi mung tin tin pru mat wa nu ai.
21 Hkawhkam Uzia gaw shi a manggang ana a majaw ngam nga ai shi a prat tup htung hte maren n san n seng rai mat wu ai. Shi gaw Nawku Htingnu kata de bai n shang lu nu ai majaw shi a nta e sha a nga nga mat wu ai. Dai rai nna shi a kasha Yohtam mungdan up hkang nga ai hte yang, bungli lit ni yawng hta na hkyamsa ai hku nga nga wu ai.
22 Amot a kasha myihtoi Esaia mahtang shi hkaw dung ai laman Hkawhkam Uzia galaw sai amu yawng mayawng hpe ka matsing da nga ai. 23 Uzia si mat jang, hkawhkam ni a lupwa shara hte seng ai hta lup makoi da ma ai; rai ti mung shi a manggang ana a majaw hkawhkam ni a lupwa hta n lup makoi da nga ma ai. Shi a kasha Yohtam mahtang shi a hkang hta hkawhkam tai wa sai. Ref 26:23: Esa 6:1.