24
(2Hk 12:1-16)
Yosha gaw asak sanit ning hta Yuda Hkawhkam tai wa nna Yerusalem mare hta mali shi ning up nga ai. Shi a kanu gaw Berasheba mare na Zibia rai nga ai. Hkinjawng Yehoiada hkrung nga dingsa dai Madu awng sharawng ai hku shi galaw nga ai. Yehoiada chyawm gaw Hkawhkam Yosha a matu madu jan lahkawng lata ya wu ai rai nna shan mung shi a matu shayi shadang sha ni shaprat ya ma ai.
Ya hkawhkam galaw ai tawng marang mi rai jang, Yosha gaw Nawku Htingnu bai gram lajang na matu myit daw dan da wu ai. Shi gaw Nawku Htingnu hpe shaning shagu galaw lajang na matu amyu masha ni yawng hte kaw na gumhpraw alaw alam hta shinggyin la shangun na nga, Yuda mung na mare ni de hkinjawng ni hte Lewi masha ni hpe hkang dat wu ai. Shi gaw shanhte hpe lawan wan galaw shangun wu ti mung, Lewi masha ni mahtang htingnai nga ma ai. Shi gaw shanhte a ningbaw rai nga ai Yehoiada hpe shaga la nhtawm, ?Dai Madu a hpung shingkang shanu nga ai Sum hpe madi shadaw karum jaw na matu dai Madu a shangun ma Mawshe gaw amyu masha ni kaw hpyi ai ahkun hkanse, Yuda hte Yerusalem masha ni kaw na Lewi masha ni lahkawn shinggyin la na lam nang hpa majaw n shadut wu ni?,? ngu nna lajin wu ai. Ref 24:6: Pru 30:11-16.
(Dai n hkru ai Ahtalia a hpang hkan ai ni gaw Nawku Htingnu run hpya kau nhtawm chyoi pra ai arai law law Bala nawku ai hta lang ma ai.)
Dai rai nna alu bang na sumpu langai galaw nhtawm Nawku Htingnu chyinghka e tawn da na matu hkawhkam wa Lewi masha ni hpe hkang da wu ai. Shanhte gaw Karai Kasang a shangun ma Mawshe gaw shawng nnan nam mali kata e lahkawn shinggyin la ai ahkun hkanse hpe dai Madu hpe sak jaw ya na matu Yuda mung hte Yerusalem mare na masha shagu hte hpe shiga shana dat ma ai. 10 Shing nga ai ga gaw amyu masha ni hte shanhte a ningbaw ni hpe na sharawng shangun nga ai rai nna ahkun hkanse gumhpraw ni hpe shanhte la sa nna sumpu hta hpring hkra sa bang shajang ma ai. 11 Lewi masha ni mung dai sumpu hpe lit la woi awn ya nga ai hkawhkam hkaw hte seng ai du wa hpang de shani shagu la wa ya ma ai. Dai sumpu hpring shagu hkawhkam htingnu amu madu hte Hkinjawng Kaba wa a hkringmang ni dai gumhpraw shaw la nhtawm mi tawn da ai shara hta sumpu nhtang dat ya ma ai. Shing rai shanhte gaw gumhpraw law law lahkawn shinggyin da lu nga ma ai.
12 Hkawhkam wa hte Yehoiada yan gaw Nawku Htingnu galaw lajang ai amu woi awn nga ai ni hpe gumhpraw ap ya ma ai rai nna shanhte mung galaw lajang ai amu galaw nga ai nlung tawk masha ni, lasama ni hte janghkam ni hpe saw shaga la ma ai. 13 Amu galaw masha ni yawng mung bungli galaw shaja nga ma ai rai nna myi na hte maren ngang hkra Nawku Htingnu hpe bai galaw lajang da ma ai. 14 Galaw lajang ai amu ngut jang, ngam nga ai ja gumhpraw ni hpe hkawhkam hte Yehoiada yan hpe ap ya ma ai rai nna Nawku Htingnu hta lang na ban hka wan ni hte kaga hkinghku ni galaw ai hta lang nga ma ai.
Yehoiada hkrung nga dingsa Nawku Htingnu e shagu hkungga ni hpe tut nawng nawng ya nga ma ai. 15 Ya shi gaw asak kaba dingla ugut gu sai hte maren asak latsa e sumshi ning hta si mat wa sai. 16 Israela amyu masha ni a matu mung, Karai Kasang a matu mung, Nawku Htingnu a matu mung shi galaw nu ai amu hpe matsing masat ya na matu shi hpe Dawi a Mare hkawhkam lupwa hta lup makoi da nga ma ai.
17 Rai ti mung Yehoiada si mat ai hte rau shanhte a ga hpe mahtang madat ya na matu Yuda ningbaw ni Hkawhkam Yosha hpe alau ma ai. 18 Dai rai nna amyu masha ni gaw dai Madu shanhte a kaji kawa ni a Karai Kasang a Nawku Htingnu hta nawku nga ai hpe jahkring kau nhtawm hpara sumla ni hte Ashera karai num a gawkngu sumla ni hpe nawku hpang wa ma ai. 19 Dai Madu gaw shi hpang de bai kayin wa na matu shanhte hpe sadi jaw na nga, myihtoi ni hpe shangun dat wu ai; rai ti mung amyu masha ni mahtang shi a ga hpe n madat ya ma ai. 20 Karai Kasang a wenyi gaw hkinjawng Yehoiada a kasha Zehkaria hpe up hkang nga ai rai nna amyu masha ni shi hpe mu lu ai shara hta shi tsap let, ?Nanhte a ntsa e ru yak tsin-yam tsindam du wa hkra shi a hkang da ai ga ni hpe nanhte hpa majaw n madat n mara nga myit dai kun?, nga nna Madu Karai Kasang san nga ai! Nanhte gaw shi hpe kau da nga myit dai majaw shi nanhte hpe kau da manit dai!,? ngu nna jahtau tsun wu ai. Ref 24:20-21: Mat 23:35; Luk 11:51. 21 Hkawhkam Yosha gaw Zehkaria hpe mayun gumlau ai amu hta shi shang lawm ai rai nna, hkawhkam wa hkang dat ai hte maren, amyu masha ni dai Zehkaria hpe Nawku Htingnu wang hta nlung hte kabai sat kau ma ai. 22 Hkawhkam wa mahtang Zehkaria a kawa Yehoiada shi hta sadi dung let daw jau ai chyeju lam hpe malap kau nhtawm, Zehkaria hpe shi sat kau wu ai. Zehkaria si wa yang shi gaw, ?Dai Madu gaw nang hpa galaw nga ndai hpe mada yu nna nang hpe ari jaw u ga law!,? ngu nna tsun wu ai.
23 Dai shaning na nmut ta bai du jang, Suri hpyen luksuk gaw Yuda mung hte Yerusalem mare hpe sa htim gasat nna ningbaw ni yawng hpe sat kau da nhtawm lanep arai law law Damasku mare de la mat wa ma ai. 24 Dai Suri luksuk gaw kaji tim Yuda masha ni mahtang dai Madu shanhte a kaji kawa ni a Karai Kasang hpe kau da ma ai majaw Yuda hpyen luksuk kaba hpe dang kau wu ai. Ndai hku nna Hkawhkam Yosha gaw ari jaw ai hkrum sha nga wu ai. 25 Shi gaw gumlau hpyen ni pru mat wa jang laja lana machyi hkrum nga ai; shi a du salang ni mung shi hpe maw mawn gumlau nhtawm hkinjawng Yehoiada a kasha hpe sat kau ai matai dawp la na nga, shi hpe shi a yup ku ntsa e sat kau ma ai. Shi hpe Dawi a Mare hta lup makoi da ma ti mung hkawhkam lupwa hta n makoi da nga ma ai. 26 (Shi hpe maw mawn gumlau ai ni gaw Shimit mying ai Amon numsha a shadang sha Zabad, Shimit mying ai Moba numsha a shadang sha Yehozaba yan rai ma ai.) 27 Hkawhkam Chyum htai Laika Buk hta Yosha a shadang sha ni a lam, shi hte seng nna tsun da ai myihtoi ga ni, Nawku Htingnu hpe shi kaning rai gap da ai ka matsing laika ni rawng nga ai. Shi a kasha Amazia gaw shi a hkang hta hkawhkam tai wa sai.