21
1 Yehoshahpat si mat sai rai nna, Dawi a Mare na hkawhkam lupwa hta lup makoi da ma ai; shi a kasha Yehoram gaw shi a hkang hta hkawhkam tai wa sai.
(2Hk 8:17-24)
2 Yuda Hkawhkam Yehoshahpat a kasha Yehoram gaw kanau kru lu nga ai; dai ni gaw Azaria, Yehiela, Zehkaria, Azariahu, Mihkaela hte Shehpatia ni rai nga ai.
3 Shanhte a kawa gaw shanhte hpe aja gumhpraw hte kaga manu dan ai sut gan law law hte hpawn, Yuda mung na bunghku kum ai mare langai hpra up sha na matu shara jaw da wu ai. Rai ti mung Yehoram chyawm gaw kasha alat rai nga ai majaw shi hpe hkawhkam hkringhtawng aya ap ya nga wu ai.
4 Yehoram gaw mungdan hpe ngang ngang up hkang da lu jang kanau ni yawng hte Israela du salang nkau mi hpe sat kau wu ai.
5 Yehoram gaw asak sumshi lahkawng ning hta hkawhkam tai wa nhtawm Yerusalem mare hta matsat ning up nga ai.
6 Shi gaw Ahab a shayi sha langai hpe hkungran la wu ai majaw Hkawhkam Ahab hte kaga Israela hkawhkam ni a n hkru n shawp ai kasi hkan nga wu ai. Shi gaw dai Madu hpe shut hpyit kau wu timung,
7 Dawi hte tawn da ai ga shaka hte shi a amyu matu ni tut nawng matut manoi up nga mu ga nga, ga sadi tawn da ai a majaw sha, dai Madu gaw Dawi a hkawhkam amyu matu hpe jahten sharun kau na n ra sharawng nga wu ai. Ref 21:7: 1Hk 11:36.
8 Yehoram hkaw dung ai laman hte yang, Edom gaw Yuda hpe gumlau rawt ai majaw shanglawt lu ai mungdan tai wa sai. Ref 21:8: Nin 27:40.
9 Dai rai nna Yehoram hte shi a du salang ni Edom mung hpe hpyen leng ni hte pru sa wa nna shang gasat ma ai. Dai yang e Edom hpyen luksuk ni mahtang shanhte hpe wang da ma ai; rai ti mung shana e mahtang gasat na matu shanhte lajang ai hte hprawng lawt mat wa ma ai.
10 Edom mung gaw Yuda a up hkang ai npu kaw nna shanglawt lu la masai. Yehoram gaw dai Madu shi a kaji kawa ni a Karai Kasang hpe kau da wu ai majaw Libna mare mung shi hpe gumlau nga ai.
11 Shi gaw Yuda mung na kawng ni hta pyi tara maigan masha ni a matu nawku shara ni galaw ya nhtawm Yuda mung hte Yerusalem mare na amyu masha ni hpe lam woi shadam nna dai Madu a man e shut hpyit shangun nga ai.
12 Myihtoi Elia mung Yehoram hpang de ning ngu nna laika langai ka shagun dat wu ai: ?Nang gaw na nwa Yehoshahpat hte na nji Hkawhkam Asa yan a kasi hta n hkan nga ndai majaw dai Madu na a kaji kawa Dawi a Karai Kasang gaw nang hpe daw dan na ra ai.
13 Shing rai na malai, Israela hkawhkam ni a kasi hta hkan nhtawm Ahab hte shi a hpang hkan ai ni gaw Israela hpe n kam n sham na hku lam woi shadam kau mu ai zawn, Yuda mung hte Yerusalem mare masha ni hpe mung Karai Kasang hpe n kam n sham na matu lam woi shadam kau nga nit dai. Nang gaw nang hta grau kaja ai na a kanau ni hpe pyi sat kau nit dai.
14 Shing rai galaw ai a majaw, dai Madu gaw na a amyu masha ni hpe mung, na a kashu kasha ni hpe mung, na a madu jan ni hpe mung laja lana re ai ari jaw nhtawm na a sut gan ni hpe mung jahten sharun kau na ra ai.
15 Nang nan mung lani hte lani grau sawng wa shangun ai pu kan machyi ka-ut ai ana hkrum sha na rin dai.?
16 Hpilisti hte Arab masha nkau mi gaw Ehtiopi masha ni nga ai hkin-gau mayan makau hkan nga nga ma ai. Dai Madu gaw Yehoram hpe gasat ninghkap na matu shanhte hpe shadut dat wu ai.
17 Shanhte gaw Yuda mung hpe lung gasat nhtawm hkawhkam htingnu na sut rai ni hpe hpya la nga ma ai; hkawhkam wa a madu jan ni hte shi a shadang sha hpungdim rai nga ai Ahazia hta lai nna kaga shadang sha ni yawng hpe bawng masha hku woi mat wa ma ai.
18 Dai hpang dai Madu gaw pu kan machyi ka-ut ai ana hkawhkam wa a ntsa e du shangun wu ai.
19 Dai ana gaw angwi ngwi sha grau sawng wa ai rai nna lahkawng ning daram na jang hkawhkam wa si mat wa ai. Shi a npu na masha ni chyawm gaw shi a kaji kawa ni hpe galaw mu ai zawn shi a matu wan nat poi n galaw ya ma ai.
20 Yehoram gaw asak sumshi lahkawng ning hta hkawhkam tai wa nhtawm Yerusalem hta matsat ning up nga ai. Shi si mat ai shaloi kadai mung n yawn nga ma ai. Shanhte gaw shi hpe hkawhkam lupwa hta n re ai dai Dawi a Mare hta mahtang lup makoi da nga ma ai.