10
(1Hk 12: 1-20)
1 Rehoboam gaw dingdung maga de nga ai Israela masha ni yawng jawm hpawng nna shi hpe hkawhkam jawm shatai ai Shehkem mare de sa wa wu ai.
2 Hkawhkam Shawlumon kaw nna hprawng mat wa nhtawm Egutu mung de du mat wa ai Nebat a kasha Yeroboam dai shiga hpe na jang, Egutu mung kaw nna nhtang wa wu ai.
3 Dingdung amyu bawsang ni a amyu masha ni gaw shi hpe shaga la nhtawm shanhte yawng rau sha Rehoboam hpang de sa nna,
4 ?Na a nwa Shawlumon gaw anhte hpe laja lana di nna anhte a ntsa e li ai lit mara da ya mi ai. Nang rai nna dai lit ni hpe shatsang kau ya nhtawm anhte a matu hkyamsa shangun lu ai rai yang, anhte gaw na a npu e sadi sahka hte taw nga na ga ai,? ngu nna tsun ma ai.
5 Rehoboam gaw, ?Dai lam hpe myit yu na nhtoi masum ya ngai hpe jaw mi. Dai hpang bai du sa wa mi,? ngu nna tsun htang wu ai. Shaloi shanhte mung pru mat wa ma ai.
6 Hkawhkam Rehoboam gaw shi a kawa Shawlumon a prat hta hpaji jaw amu galaw ya nga ai asak kaba sai masha ni hte bawng yu wu ai. Shaloi shi gaw, ?Ndai masha ni hpe mahtai jaw na matu nanhte ngai hpe kaning rai hpaji jaw lu na rai myit ta?,? ngu nna san wu ai.
7 Shanhte gaw, ?Ndai amyu masha ni hpe nang atsawm sha galaw daw jau mayu ndai rai yang, shanhte a hpyi lajin ai lam hpe ra sharawng ai ga ngwi ga pyaw hte mahtai jaw u, shaloi shanhte nang hta sadi dung let tut nawng daw jau nga na mara ai,? ngu nna tsun htang ma ai.
8 Rai ti mung, shi chyawm gaw asak kaba sai masha ni a hpaji jaw ga hpe hpa zawn n nawn kau ya nga ai. Ya e, shi a hpaji jaw masha tai nga sai shi hte rau kaba wa ai shabrang ni hpang de bai sa nna,
9 ?Shanhte a lit ni hpe shatsang ya mi nga nna ngai hpe sa san ai dai amyu masha ni hpe ngai kaning ngu tsun na rai nga a ta? Nanhte ngai hpe kaning rai galaw na lam, hpaji jaw na rai myit ta?,? ngu nna san wu ai.
10 Shanhte gaw, ?Nang shanhte hpe ning ngu nna tsun na rai ndai: ?Nye a yunghkyi gaw nye wa a nshang hta grau htat nga li ai!
11 Shanhte hpe, ?Nye wa gaw nanhte a ntsa e li ai lit ni hpe mara da ya manit dai; ngai chyawm gaw nanhte hpe grau lit li hkra naw jat ya na made ai. Shi gaw nanhte hpe lasik sumri hte kayat ai; ngai mahtang nanhte hpe hpri ju kap ai sumri hte anu kayat na made ai!,?? ngu nna tsun htang wu ai.
12 Ya masum ya lai jang, shanhte hpe shi matsun dat wu ai hte maren, Yeroboam hte amyu masha ni yawng Hkawhkam Rehoboam hpang de nhtang sa wa ma ai.
13 Hkawhkam wa gaw asak kaba sai masha ni a hpaji jaw ga hpe hpa n sawn kau ya ai sha,
14 shi a shabrang ni hpaji jaw da masai hte maren, amyu masha ni hpe sheng mareng nga nna tsun wu ai. Shi gaw, ?Nye wa gaw nanhte a ntsa e li ai lit ni hpe mara dat ya manit dai; ngai chyawm gaw dai lit ni hpe grau li hkra naw jat ya na made ai. Shi gaw nanhte hpe sumri lasik ni hte kayat ai; ngai mahtang nanhte hpe hpri ju kap ai sumri hte anu kayat na made ai!,? ngu nna tsun wu ai.
15 Dai gaw Shilo mare na myihtoi Ahiya hku nna Nebat a kasha Yeroboam hpe tsun da sai ga byin shangun na matu dai Madu a myit ra ai lam rai nga ai. Dai re ai majaw hkawhkam wa gaw amyu masha ni a ga hpe hpa zawn n nawn ya wu ai.
16 Hkawhkam wa gaw shanhte a ga n madat ya nga ai hpe amyu masha ni mu jang, shanhte gaw, ?Dawi hte shi a dinghku masha ni hpe yeng seng kau gaw! Shanhte gaw anhte a matu hpa galaw ya nga ma ta? Israela masha ni e, nta de she wa mat saga law. Rehoboam shi hkum shi nan yu la sanu ga!,? ngu nna jahtau tsun ma ai.
Dai rai nna Israela amyu masha ni gumlau rawt nhtawm, Ref 10:16: 2Sa 20:1.
17 Yuda mung hta shanu nga ai amyu masha ni a hkawhkam zawn sha Rehoboam hpe kau da ma ai.
18 Dai hpang Hkawhkam Rehoboam gaw magam bungli woi hpareng ai Adoniram hpe Israela masha ni hpang de sa shangun dat wu ai; rai ti mung, shanhte shi hpe nlung hte kabai sat kau ma ai. Dai lam a majaw Rehoboam gaw shi a gumra leng kata de tin tin gat shang wa nhtawm Yerusalem mare de hprawng mat wa wu ai.
19 Dai aten kaw nna dingdung mungdan de na Israela amyu masha ni gaw Dawi a hkawhkam dap matu ni hpe gumlau nga masai.