5
Ndai gaw Yaku a shadang sha ni hta na kasha alat Rubin a amyu matu ni a lam rai nga ai. (Shi gaw kawa a lashi num langai mi hte kanawn kau wu ai majaw shadang sha alat aya Yosep hpe jaw kau ai hte hpu lat aya a ahkaw ahkang madu da na lam shamat kau wu ai.Ref 5:1: Nin 35:22; 49:3-4. Yuda amyu bawsang mahtang n-gun ja htum ai wa tai wa nna amyu bawsang yawng a matu up hkang du langai shi kaw na pru wa nga ai.) Ref 5:2: Nin 49:8-10. Yaku a shadang sha alat Rubin gaw shadang sha mali lu ai; dai ni gaw Hanuk, Hpalu, Hezron, hte Hkarmi ni rai nga ai.
4-6 Ndai gaw ban hte ban pra hkrat wa ai Yoela a amyu matu ni rai nga ai; shanhte gaw Shemaia, Goga, Shime, Mihka, Reaia, Bala hte Bera ni rai nga ai. Asuri hkawseng Tiglat Pilesa gaw amyu bawsang a ningbaw Bera hpe rim la nhtawm kaga mung de woi mat wa wu ai.Ref 5:6: 2Hk 15:29.
Rubin amyu bawsang hta na amyu lakung lama ni a ningbaw ni hpe dinghku hku hkan nna ka matsing da nga ai: dai ni gaw Yeiela, Zehkaria, Azaza a shadang sha Bela, Bela gaw Yoela amyu lakung na Shema a kashu rai nga ai. Dai amyu lakung gaw Aroera mare hte dai kaw nna dingdung maga Nebo hte Bala Meon du hkra na lamu ga hkan e nga nga ma ai. Shanhte gaw Gilead mung hta yam nga hpung kaba lu nga ma ai rai nna sinpraw maga Uhprat hka nam mali lam de du hkra madu da ma ai.
10 Rubin amyu bawsang ni gaw Hkawhkam Shawlu a prat hta Hagari masha ni hpe gasat nhtawm majan pa e shanhte hpe sat kau mu ai hte Gilead mungdaw a sinpraw maga na lamu ga hpe mung madu la ma ai.
11 Gad amyu bawsang ni gaw Rubin bawsang ni nga ai dingdung maga de nga ai Bashan hte sinpraw maga Saleka du hkra nga nga ma ai. 12 Yoela gaw dai amyu lakung hpe woi awn ai ningbaw rai nga ai; lahkawng ngu na ahkyak htum ai amyu lakung hpe woi awn ai wa gaw Shahpam rai nga ai. Yanai hte Shahpat yan mung Bashan mung na kaga amyu lakung ni a ningbaw rai ma ai. 13 Amyu lakung sanit hte seng ai kaga bawsang a hpung ni mung nga nga ma ai; dai ni gaw Mihkaela, Meshulam, Sheba, Yorai, Yahkan, Zia hte Ebera ni rai nga ai. 14 Shanhte gaw Huri a kasha Abihala a amyu matu ni rai ma ai. Shanhte a kaji kawa dap lakung ni hpe gawn da lu nga ai ndai ni gaw Abihala, Huri, Yaroa, Gilead, Mihkaela, Yeshishai, Yado hte Buza ni rai nga ai. 15 Guni a kashu, Abdiela a kasha Ahi gaw ndai amyu lakung ni a ningbaw rai nga ai. 16 Shanhte gaw Bashan mung hte Gilead mung na mare ni hte Sharon mung na udat shara ni yawng hkan nga nga ma ai. 17 (Ndai labau gawn ai laika gaw Yuda Hkawhkam Yohtam hte Israela Hkawhkam Yeroboam II a prat hta gawn da nga ai.)
18 Rubin, Gad hte sinpraw maga nga ai Manashe amyu bawsang ni hta ninggang ni, nhtu ni hte ndan ni hpe atsawm sha chye lang ai hpyenla 44,760 nga nga ai. 19 Shanhte gaw Hagari amyu bawsang ni hta na Yetura, Nahpisha hte Nodab amyu baw ni hpe sa htim gasat ma ai. 20 Shanhte gaw Karai Kasang hpe kam hpa nga ma ai hte karum la na matu shi kaw akyu hpyi nga ma ai majaw shanhte a akyu hpyi ga ni hpe Karai Kasang htan ya nga ai. Hagari masha ni hte shi a jinghku hpyen hpung ni hpe dang kau lu na awng padang shi shanhte hpe jaw ya mu ai. 21 Shanhte gaw gumlau hpyen ni a lata kaw na gawla-uk 50,000, sagu 250,000 hte lawze 2,000 hte hpawn bawng masha 100,000 hpe rim woi mat wa ma ai. 22 Dai hpyen majan gaw Karai Kasang a myit ra sharawng ai lam rai nga ai majaw gumlau hpyen law law hpe sat kau lu ma ai. Shanhte gaw bawng dung ai aten du hkra dai lamu ga e shanhte matut nga nga ma ai.
23 Sinpraw maga na Manashe amyu masha ni gaw Bashan lamu ga kaw nna dingdung maga Bala Hermon, Senira hte Hermon Bum du hkra shanu nga ma ai rai nna nga ai masha jahpan grai law jat nga ai. 24 Ndai ni gaw shanhte a amyu lakung ni a ningbaw ni rai nga ai: shanhte gaw Ehpera, Ishi, Eliela, Azriela, Yeremia, Hodawia hte Yadiela ni rai nga ai. Shanhte yawng gaw laklai magrau grang ai hpyenla ni rai nna shanhte a amyu lakung ni hta kajai gumhkawng ai ningbaw ni rai ma ai.
25 Rai ti mung amyu masha ni mahtang shanhte a kaji kawa ni a Karai Kasang hta sadi n dung ai hte mungdan kata na Karai Kasang e gawt shapraw kau hkrum ai masha amyu baw ni a karai ni hpe nawku na nga, shi hpe kau da nga ma ai. 26 Dai rai nna Karai Kasang gaw Asuri Hkawseng Pula (shi hpe Tiglat Pilesa ngu nna mung tsun ai) hpe shanhte a mungdan de shang gasat shangun wu ai. Shi gaw Rubin, Gad hte sinpraw maga de na Manashe amyu bawsang ni hpe gau mat wa nhtawm Hala, Habora, Hara hte Gozan hka kau hkan e shanhte hpe tut nawng nga shangun nga ai.