25
Hkawhkam Dawi hte Lewi ningbaw ni gaw nawku daw jau ai amu hpe woi awn na Lewi lakung lama ni hpe lata san da ma ai; dai ni gaw Asap, Heman hte Yeduhtun ni rai ma ai. Shanhte gaw tingse sumpyi hte shupsheng ni hte hkan dum nang let Karai Kasang a mungga hpe htawn tsun ma ai. Ndai gaw nawku woi na matu hte hpung shagu na daw jau amu baw hpan gun hpai na matu lata san da hkrum ai masha ni a mying jahpan rai nga ai.
Asap gaw shadang sha mali lu ai; dai ni gaw Zahkura, Yosep, Nehtania hte Asharela hte rai ma ai. Shanhte gaw hkawhkam wa hkang da ai hte maren, Karai Kasang a mungga hpe htawn tsun ai Asap a matsun madun ai npu hta hkan nang nga ma ai.
Yeduhtun gaw shadang sha kru lu ai; dai ni gaw Gedalia, Zeri, Yeshaia, Shime, Hashabia, hte Matihtia ni rai ma ai. Shanhte a kawa a matsun madun ai npu hta tingse sumpyi dum let dai Madu a chyeju hpe shakawn kungdawn nna Karai Kasang a mungga hpe htawn tsun dan ma ai.
Heman gaw shadang sha shi mali lu ai; dai ni gaw Bukia, Matania, Uziela, Shebuela, Yerimot, Hanania, Hanan, Eliahta, Gidalti, Romamti Ezera, Yoshabekasha, Malohti, Hohtira hte Mahaziot ni rai ma ai. Karai Kasang gaw daru magam n-gun jaw ya na nga ga sadi jaw da nu ai hte maren, hkawhkam wa a myihtoi rai nga ai Heman hpe shadang sha shi mali, shayi sha masum hte hpe jaw ya wu ai. Shi a shadang sha ni yawng gaw shanhte a kawa matsun madun ai npu hta Nawku Htingnu e nawku daw jau ai shaloi tingse madum sumpyi hte shupsheng ni hkan dum nang ma ai. Dai rai nna Asap, Yeduhtun hte Heman ni gaw hkawhkam a hkang da ai ga hte maren galaw ma ai.
Ndai masha hkun mali hte yawng gaw laklai ai machye machyang lu la ai ni rai nga ma ai; shanhte a kahpu kanau Lewi masha ni gaw mahkawn mangoi hpaji lu tawn da sai ni rai ma ai. Shanhte yawng gaw 288 rai ma ai.
Dai bungli shatsam ai lit ni hpe daw dan hkam la na matu, kaji kaba n nga, chye chyang ai ni hte bungli nnan shang hpang ai ni kadai n nga, shanhte yawng hpaida da shajang ma ai.
9-31 Ndai masha 288 hpe dinghku hkun mali hta hpung mi hta masha shi lahkawng hku garan da nga ai. Hpung shagu hta ningbaw langai ngai san da nga ai. Ndai gaw bungli lit gun sa wa ang ai jahpan rai nga ai. Dai ni gaw, 1) Asap dinghku na Yosep; 2) Gedalia; 3) Zahkura; 4) Zeri; 5) Nehtania; 6) Bukia; 7) Asharela; 8) Yeshaia; 9) Matania; 10) Shime; 11) Uziela; 12) Hashabia; 13) Shebuela; 14) Matihtia; 15) Yerimot; 16) Hanania; 17) Yoshabekasha; 18) Hanani; 19) Malohti; 20) Eliahta; 21) Hohtira; 22) Gidalti; 23) Mahaziot; 24) Romamti Ezera ni rai ma ai.