23
1 Dawi gaw asak kaba dingla ugut gu sai rai nna shi a kasha Shawlumon hpe Israela hkawhkam shatai da wu ai. Ref 23:1: 1Hk 1:1-40.
2 Hkawhkam Dawi gaw Israela ningbaw ni yawng hpe mung, hkinjawng ni hte Lewi masha ni yawng hpe mung shaga shinggyin da wu ai.
3 Shi gaw Lewi lasha ni hta na asak sumshi shing n rai dai hta kaba sai ni yawng a yuptung jahpan hta la wu ai. Dai ni yawng gaw mun masum hkying matsat rai nga ai.
4 Hkawhkam wa gaw Nawku Htingnu amu galaw ai lam hpe yu hpajang na masha mun lahkawng hkying mali hpe mung, labau gawn nna ka matsing na hte ga li ga law amu ni hpe hparan daw dan ya na masha hkying kru hpe mung,
5 sin langa amu galaw na matu masha hkying mali hte ndai amu a matu hkawhkam wa shatawng shada let jaw ya ai madum sumpyi arung arai ni hpe lang nna dai Madu hpe shakawn kungdawn na masha hkying mali hte hpe san tawn da wu ai.
6 Dawi gaw Lewi masha ni hpe shanhte a amyu lakung hku hkan nna Gershon, Kohat hte Merari ngu nna hpung masum garan da nga ai.
7 Gershon gaw shadang sha lahkawng lu ai: dai yan gaw Ladan hte Shime yan rai nga ai.
8 Ladan gaw shadang sha masum lu ai: dai ni gaw Yehiela, Zehtam hte Yoela ni rai nga ai.
9 Shanhte gaw Ladan kaw nna yu hkrat wa ai amyu lakung ni a ningbaw ni tai wa ma ai. (Shime gaw shadang sha masum lu ai; dai ni gaw Shelomot, Haziela hte Haran ni rai nga ai.)
10-11 Shime gaw shadang sha mali lu ai; dai ni gaw asak hku hkan yang, Yahat, Zina, Yeusha hte Beria ni rai nga ai. Yeusha hte Beria yan hta amyu matu law law n pra nga ma ai majaw shanhte gaw amyu lakung langai hku jahpan hti da ma ai.
12 Kohat gaw shadang sha mali lu ai; dai ni gaw Amram, Izhara, Hebron hte Uziela ni rai ma ai.
13 Shi a kasha alat Amram mahtang Arun hte Mawshe yan a kawa rai nga ai. (Arun hte shi a amyu matu ni gaw chyoi pra ai arung arai ni hpe tut nawng woi hpareng na matu san da hkrum ma ai; dai Madu a nawku shara hta manam pyaw ai baw hpe nat nawng nna shi hpe daw jau ai hte shi a mying ningsang hta amyu masha ni hpe shaman ya na rai ma ai. Ref 23:13: Pru 28:1.
14 Rai ti mung Karai Kasang a masha Mawshe a shadang sha ni gaw Lewi amyu hta hti lawm nga ma ai.)
15 Mawshe gaw shadang sha lahkawng lu ai; shan gaw Gershom hte Elieza yan rai ma ai.
16 Gershom a shadang sha ni hta Shebuela gaw ningbaw rai nga ai.
17 Elieza gaw Rehabia ngu ai shadang sha shingtai sha lu wu ai, rai ti mung Rehabia chyawm gaw amyu matu law law lu nga ai.
18 Kohat a kasha Ma Naw ngu na Izhara gaw shadang sha Shelomit langai lu ai; shi gaw amyu lakung a ningbaw rai nga ai.
19 Kohat a kasha Ma La ngu na Hebron mahtang shadang sha mali lu ai; dai ni gaw Yeria, Amaria, Yehaziela hte Yekameam ni rai nga ai.
20 Kohat a kasha Ma Tu ngu na Uziela gaw shadang sha lahkawng lu ai; dai yan gaw Mihka hte Ishia yan rai nga ai.
21 Merari gaw shadang sha lahkawng lu ai; dai yan gaw Mali hte Mushi rai ma ai. Mali a shadang sha yan gaw Eleaza hte Kisha rai nga ai,
22 rai ti mung Eleaza gaw shadang sha n lu nga ai; shayi sha hkrai shaprat nna si mat wa sai. Shi a shayi sha ni mahtang shanhte a kayung daw ai Kisha a shadang sha ni kaw wa ma ai.
23 Merari a kasha Ma Naw ngu na Mushi mahtang shadang sha masum lu ai; dai ni gaw Mali, Edera hte Yeremot ni rai nga ai.
24 Ndai gaw amyu lakung hte dinghku ni a mying hku hkan nna shanhte langai hte langai ran yu wa ai Lewi amyu matu ni rai ma ai. Shi a amyu matu shagu ngu na asak hkun ning shing n rai dai hta lai ai ni gaw dai Madu a Nawku Htingnu magam bungli galaw na gambum lu nga ma ai.
25 Dawi gaw, ?Dai Madu Israela a Karai Kasang gaw shi a amyu masha ni hpe ngwi pyaw sim sa ai lam jaw ya nu ai rai nna shi nan mung Yerusalem mare e htani htana anga nga na ra ai.
26 Dai rai nna Lewi masha ni mung dai Madu a hpung shingkang shanu nga ai Sum hte nawku yang lang ai arung arai ni yawng hpe galoi mung hpai na manu ai n rai,? ngu nna tsun wu ai. Ref 23:26: Trj 10:8.
27 Dawi a hpang jahtum na matsun maroi ga hte maren, Lewi masha ni yawng asak hkun ning du jang, daw jau amu galaw na matu jahpan la nga ai rai nna,
28 shanhte gaw ndai amu ni hpe galaw na lit shatsam da ai hkrum ma ai; dai gaw Nawku Htingnu e nawku ai amu galaw ai Arun a amyu matu hkinjawng ni mung htingnu wang ni hte de a gawk ni hpe yu lajang na matu mung, chyoi pra ai arung arai shagu shachyoi shapra nga na matu mung, Ref 23:28-32: Bhk 3:5-9.
29 Karai Kasang hpe nawng ya ai muk, hkungga nawng ya ai shaloi lang ai mani ai shadung, matsi n rawng ai muk pa, kabaw ai muk hkungga ni, tsanlun sau hte gumchya ai mani ai shadung, shen nna Nawku Htingnu e nawng jau ai hkungga ni hpe shadawn sharam na matu mung,
30 jahpawt shagu, shana de shagu dai Madu hpe chyeju dum shakawn kungdawn na matu mung,
31 Bansa Nhtoi e mung, Shata Praw na Poi e mung, kaga lusha poi ni hta dai Madu a matu wan nat hkungga nawng ya ai shaloi mung rai nga ai. Ndai amu hpe galaw na matu aten shagu Lewi masha ni hpe shatsam da ai tara ni galaw da nga ai. Lewi masha ni gaw aten shagu dai Madu hpe nawku daw jau ai amu gun hpai na lit shatsam da ai hkrum ai ni rai ma ai.
32 Shanhte gaw dai Madu a hpung shingkang shanu nga ai Sum hpe yu lajang na matu mung, shanhte a makyin jinghku ni, Arun kaw nna pra hkrat wa ai hkinjawng ni Nawku Htingnu kata nawku daw jau amu galaw ai shaloi karum shingtau ai ni rai ma ai.