18
(2Sa 8:1-18)
1 Ya aten ram ram na ai hpang, Hkawhkam Dawi gaw Hpilisti masha ni hpe bai htim gasat ai hte dang kau wu ai. Shi gaw shanhte n lu up hkang nga ai Gat mare hte de a makau grup yin kahtawng ni hpe la kau wu ai.
2 Shi mung Moba masha ni hpe gasat dang la kau wu ai rai nna, Moba masha ni mung Dawi a up hkang ai npu de shang mat wa ai hte shanhte mung shi hpe ahkun hkanse bang ya nga ma ai.
3 Dai hpang, Dawi gaw Uhprat hka a lahta daw de na lamu ga ni hpe bai madu la na shakut nga ai Hadadeza a majaw Hamat lamu ga makau na Zoba mungdaw hpe up ai Suri Hkawhkam Hadadeza hpe htim gasat wu ai.
4 Dawi gaw shi a gumra leng hkying mi hpe mung, gumra jawn masha hkying sanit hpe mung, lagaw hpyenla mun lahkawng hte hpe mung rim la lu wu ai. Bai hpyen leng latsa a matu gumra law ram daram hpe ngam tawn da ya nna kaga ni yawng hpe lahkap dan kau ya wu ai.
5 Damasku mare na Suri masha ni gaw Hkawhkam Hadadeza hpe sa karum la na matu luksuk hpung mi hpe dat dat mu ai shaloi, Dawi htim gasat ai hte masha mun lahkawng hkying lahkawng hpe sat kau wu ai.
6 Dai hpang shi gaw shanhte a mung ga hta hpyen dap jung tawn da wu ai rai nna shanhte mung shi a up hkang ai npu hta taw nga nna shi hpe ahkun hkanse bang ya ma ai. Dai Madu mung Dawi kabye du ai shara shagu hkan awng dang ai lam hkam la shangun wu ai.
7 Hadadeza a du salang ni lang ai ja ninggang ni hpe mung Dawi lu rim la wu ai rai nna Yerusalem de la wa wu ai.
8 Shi gaw Hadadeza up hkang ai Tibhat hte Kun mare na magri mang law law hpe mung la mat wa wu ai. (Magri mang dai ni hpe Shawlumon gaw magri mang hka lawng, magri mang shadaw hte Nawku Htingnu kata lang na magri mang arung arai ni hpe galaw ma ai.) Ref 18:8: 1Hk 7:40-47; 2Hk 4:11-18.
9 Hadadeza a hpyen luksuk ting hpe Dawi e gasat dang kau sai lam hpe Hamat Hkawhkam Toi na wu ai.
10 Shaloi shi gaw Hkawhkam Dawi hpe hkap shachyen la na matu mung, Toi e law law lang gasat yu sai Hadadeza hpe gasat dang kau lu sai Hkawhkam Dawi a awng padang hpe shakawn shagrau na matu mung, shi a kasha Yoram hpe shangun dat wu ai. Yoram mung Dawi hpang de aja, gumhpraw, magri mang hte galaw ai kumhpa arung arai ni la sa ya wu ai.
11 Hkawhkam Dawi chyawm gaw nawku daw jau ai hta lang na matu dai ni hte hpawn shi gasat dang da sai Edom, Amon, Hpilisti hte Amalek masha amyu baw ni kaw na shi la wa ai aja, gumhpraw hpe mung, nawng ya wu ai.
12 Kanu Zeruia a kasha Abishai gaw Jum Kadit e Edom masha ni hpe gasat dang kau nhtawm shanhte hta na masha mun mi hkying matsat hpe sat kau wu ai. Ref 18:12: Shk 60 Ga Baw.
13 Shi gaw Edom mung ting hta hpyen dap ni hpe jung tawn da wu ai rai nna dai mung na masha ni gaw Hkawhkam Dawi a up hkang ai npu hta taw nga ma ai. Dai Madu gaw Dawi hpe shara shagu hkan awng padang hkam la shangun nga ai.
14 Dawi gaw Israela mung ting hpe up hkang nga ai rai nna, shi a amyu masha ni hpe tut nawng teng man rap ra ai hku jeyang ya nga ai.
15 Abishai a kahpu Yoab gaw luksuk hpe up hkang ai wa rai nga ai; Ahiluda a kasha Yehoshahpat gaw labau ka mazing ai ni a hpareng wa rai nga ai.
16 Ahitub a kasha Zadok hte Abiahta a kasha Ahimelek yan gaw hkinjawng rai nga ma ai; Seraia chyawm gaw hkawhkam hkaw na amu madu rai nga ai.
17 Yehoiada a kasha Benaia gaw Dawi a hkum hpe makawp maga ya ai hpareng wa rai nga ai. Hkawhkam Dawi a shadang sha ni gaw hkawhkam wa a hkringmang kaba ni rai ma ai.