17
(2Sa 7:1-17)
Hkawhkam Dawi gaw shi a hkawhkam htingnu e nga nga wu ai. Lani mi na nhtoi e, shi gaw myihtoi Nahtan hpe shaga la nhtawm shi hpe, ?Yu u, ngai chyawm gaw arit hpun hte galaw ai nta e rawng nga nngai; rai ti mung dai Madu a Ga Shaka Sumpu mahtang sumpan sum kata e rawng nga ai!,? ngu nna tsun wu ai.
Nahtan gaw, ?Karai Kasang nang hte rau rai nga ai majaw nang myit lu ai hte maren galaw u,? ngu nna htan wu ai.
Rai ti mung Karai Kasang gaw dai shana jang Nahtan hpe, ?Nye a shangun ma Dawi hpe ngai tsun ai ga sa tsun su, ?Nang gaw ngai shanu nga na ngu ai nye a matu Nawku Htingnu hpe gap ya lu ai wa rai na ndai n rai. Israela amyu masha ni hpe Egutu mung kaw na ngai hkye mawai la ai shani kaw nna dai ni du hkra htingnu kata e ngai galoi mung n rawng yu nngai; sum kata e nga nga nna shara mi kaw nna shara mi de kayin hkawm kau ni ai. Israela amyu masha ni hte ngai htawt hkawm wa ai shara shagu hkan e arit hte galaw ai Nawku Htingnu nye a matu shanhte hpa majaw n galaw ya myit dai ngu nna Israela amyu bawsang kadai hpe mung ngai lit shatsam let galoi mung n san yu nngai,? ngu nna tsun wu ai.
?Dai re ai majaw Chyahtum Chyalai n-gun rawng ai Ngai Madu nan shi hpe tsun ai ga, nye a shangun ma Dawi hpe ning ngu nna tsun su, ?Ngai gaw nang pa ga hkan e sagu naw rem nga ai kaw nna nang hpe shaw la nhtawm Israela amyu masha ni hpe up hkang ai du aya nang hpe tawn da ya ni ai. Nang hkawm sa ai shara shagu hkan ngai nang hte rau nga nga nna nang naw rawt lung wa yang pyi, na a gumlau hpyen ni yawng hpe ngai gasat dang kau ya nngai. Mungkan ga na galu kaba htum ai ningbaw ni zawn, ngai nang hpe mying dan hkung galu kaba shangun na nngai. 9-10 Nye a Israela amyu masha ni a matu shara langai ngai san da nna, dai yang e shanhte shanu nga lu ai hte dip gamyet sha hkrum ai lam hpa mung n nga ai sha, shanhte nga lu na rai ma ai. Ya du hkra, shanhte gaw ndai mung de shang wa ai nhtoi kaw nna n hkru ai masha ni e hkap gasat ai mung hkrum sha nga manu ai; rai ti mung dai gaw bai byin wa na ra ai n rai. Ngai gaw na a gumlau hpyen ni yawng hpe dang kau ai hte nang hpe amyu matu ni jaw na de ai ngu ga sadi jaw nngai. 11 Nang si mat nna na a nji nwa ni hte rau lup makoi kau hkrum ai shaloi, na a shadang sha langai ngai hpe hkawhkam shatai ya let shi a mungdan hpe ngai shagrin shangang ya na we ai. 12 Shi mahtang nye a matu Nawku Htingnu gap ai wa rai na ra ai; shi a magam tingnyang hpe teng teng htani htana ngai a shagrin da ya na we ai. 13 Ngai gaw shi a kawa tai nna shi gaw nye a kasha rai na ra ai. Nang hkawhkam tai lu hkra ngai seng kau ai Shawlu hpe galaw ni ai hte maren shi hpe karum shadaw ai lam ngai dawm kau ya na we ai n rai. Ref 17:13: 2Ko 6:18; Heb 1:5. 14 Ngai gaw nang hpe nye a amyu masha ni hpe mung, nye a mungdan hpe mung htani htana woi hpareng shangun nga na nngai. Shi a magam tingnyang gaw galoi mung htum mat na ra ai n rai,?? ngu nna tsun wu ai.
15 Shing rai Nahtan gaw Karai Kasang shi hpe shadan dan ai lam magup Dawi hpe tsun dan wu ai.
(2Sa 7:18-29)
16 Dai hpang Hkawhkam Dawi gaw dai Madu a hpung shingkang shanu nga ai Sum de shang dung nhtawm, ?Madu Karai Kasang e, nye a matu nang galaw ya sai amu ni hte sawn yu yang, ngai gaw manu dan la ai wa n rai nga nngai; nye a dinghku mung hpa n rai nga li ai law. 17 Ti mung ya chyawm gaw dai hta n-ga, grau nna pyi galaw ya nga ndai. Madu Karai Kasang e, du wa na shaning ni hta pra sa wa na nye a amyu matu ni hte seng ai ga sadi ni hpe mung, nang shagrin da ya nga nit dai. Nang gaw ngai hpe galu kaba ai masha langai mi zawn sharawt tawn da nga sahka. 18 Ngai gaw nang hpe hpa wa mi naw jat tsun lu na rai ta? Nang gaw ngai hpe atsawm sha chye nga ndai majaw na a shangun ma wa ngai hpe nang shagrau sha-a da nga ndai. 19 Nye a matu ndai amu galaw nna mung, du na ra ai aten na nye a amu kaba hpe madun dan na matu mung, dai gaw na a myit ra ai hte yaw shada ai amu rai nga ai. 20 Madu e, nang hte bung ai mi kadai n nga nga ai; nang chyu sha Karai Kasang rai nga ndai gaw anhte tut nawng chye da nga saga ai. 21 Na a amyu masha majing shatai na nga, shanhte hpe mayam tai nga ai kaw nna nang hkye mawai da nit dai; dai Israela amyu ni hte bung ai amyu baw kaga, ndai ginding aga ntsa e n nga nga ai. Shanhte a matu nang galaw dan sai dai galu kaba ai mauhpa amu ni gaw mungkan ting de na a mying ningsang hpe dan hkung gumhkawng shangun nga sai. Egutu mung na na a amyu masha ni hpe nang hkrang shaw la nna dai amyu masha ni rawt lung wa nga ma yang, kaga amyu baw ni hpe nang gawt shapraw kau nga ndai. 22 Israela hpe htani htana na a amyu masha majing shatai la nga nit dai rai nna, Madu e nang gaw shanhte a Karai Kasang rai nga nit dai.
23 ?Ya chyawm gaw Madu Karai Kasang e, ngai hte nye a amyu matu ni hte seng ai nang shagrin da nit dai ga sadi hpe jahpring shatsup ya mi law; nang galaw na ngu nna tsun ai ga hte maren shadik ya e law. 24 Na a mying ningsang kajai gumhkawng ai gaw galu kaba wa nna, amyu masha ni mung, ?Chyahtum Chyalai n-gun rawng ai dai Madu gaw Israela amyu a matu Karai Kasang rai nga ai,? nga nna htani htana a tsun nga na mara ai. Nang gaw nye a magam tingnyang hpe ju majat prat janat shagrin da ya nga nu ga law. 25 Nye a Karai Kasang e, na a shangun ma wa ngai hpe ndai lam yawng mayawng nang tsun hpaw dan nit dai; nye a amyu matu ni hpe hkawhkam shatai ya na nga nna mung, nang tsun nit dai majaw sha ndai akyu hpyi ga hte nang kaw hpyi wam nga nngai law. 26 Madu e, nang gaw Karai Kasang rai nga ndai; nye a matu ndai mauhpa ga sadi nang shagrin da ya nga nit dai. 27 Nye a amyu matu ni na a man e matut nna kabu gara lu mu ga, shanhte hpe shaman ya na matu ngai nang kaw hpyi nga nngai. Madu e, nang gaw shanhte hpe shaman ya nga ndai; na a shaman chyeju gaw shanhte a ntsa e htani htana anga nga nu ga law.