SHAKAWN KUNGDAWN 90
LAIKA MALI
Madu e, nang gaw anhte a tut nawng na shingbyi shara dum nta rai nga ndai;
Bum ni hpe garai n hpan da ai hte
mungkan ga garai n lat ai aten kaw nna,
nang gaw chyi nma pri npra Karai Kasang rai nga ndai;
htum ngu n nga ai htani htana Karai Kasang mung nang rai nga ndai.
 
Nang gaw shinggyim masha ni hpe ga nhpu de bai shabai kau nna;
shanhte hpe mi na shara de nhtang wa masu, nga nna nang tsun nga ndai.
Na a matu shaning hkying mi gaw lani mi zawn rai nga nna;
dai ni gaw lai mat wa sai mani na nhtoi hte
kadun la ai shana na ahkying aten zawn rai nga ai.Ref 90:4: 2Pe 3:8.
Nang anhte hpe hka mawru zawn garawt agre mat wa nna;
anhte gaw yup mang mang ai daram pyi, n nga lu nga ai.
Jahpawt e maku ku wa nhtawm,
tu kaba wa nna pu lagra nga ti mung,
shana de hkraw mat ai hte si mat ai tsingdu ni zawn anhte rai nga ga ai.
 
Na a pawt sindawng ai hta anhte jahten kau ai hkrum nga saga ai;
na a masin kahtet ai hta anhte hkrit gari ai hkrum nga saga ai.
Nang gaw anhte a yubak ni hpe na a man e tawn da nna;
anhte a makoi magap da ai yubak ni hpe nang mu lu na shara hta e, tawn da ya nga ndai.
 
Na a pawt sindawng ai hta anhte a asak ni hpe kadun kau shangun ndai;
dai gaw kahte tsun ai ga nbung zawn hkoi mat na ra ai.
10 Anhte yawng lu ai asak gaw sanit shi ning rai nga ga ai.
anhte n-gun ja ga ai rai yang chyawm gaw matsat shi ning du nga ga ai;
ti mung, dai asak hkrung ai laman hte hta, ru tsang ai hte yawn hkyen ai hpe sha hkam sha nga ga ai,
hkring mi rai jang asak mung lai mat wa nna anhte mung hkoi mat nga ga ai.
 
11 Na a n-gun hte hpring ai pawt sindawng ai hpe kadai wa hkam sha yu nga a ni?
na a ja la ai masin kahtet ai lam gaw kade daram hkrit kahpra shangun nga ai hpe kadai wa chye ya lu nga a ni?
12 Anhte hpaji chye wa na matu
anhte a asak prat kade daram kadun nga ai lam anhte hpe sharin ya mi.
 
13 Na a masin kahtet ai gaw kade wa na hkra rai na rai nga a ta?
Madu e, na a shangun ma ni hpe matsan dum la mi law!
14 Jahpawt shagu, na a dinggrin tsaw ra myit hte anhte hpe jahpring ya mi;
shing rai, anhte a asak prat tup kabu gara ai hte nang hpe mahkawn shakawn nga lu u ga.
15 Anhte nni nkri hkrum sha nga ai shaning ni yawng hte hta
nang anhte hpe jaw ya sai yawn hkyen hkrum shangun ai daram anhte hpe ya e, kabu gara ai lam jaw ya mi.
16 Na a shangun ma ni rai nga ai anhte hpe na a grau htum ai magam amu ni hpe mu shangun mi;
anhte a aru arat ni mung na a hpung shingkang hte hpring ai n-gun atsam ni hpe mu shangun mi.
17 Anhte a Madu Karai Kasang e, na a shaman ai chyeju gaw anhte hte rau rai nga u ga.
Anhte galaw ai amu shagu hte hta awng dang ai lam anhte hpe jaw ya mi law!