SHAKAWN KUNGDAWN 89
O Madu e, na a dinggrin tsaw ra myit a lam hpe ngai tut nawng e, mahkawn mangoi nga na nngai;
na a sadi sahka hpe ngai htani htana htawn tsun nga na nngai.
Na a tsaw ra myit prat tup grin nga na ra ai hte na a sadi sahka mung;
sumsing lamu zawn grin ngang nga ai hpe ngai chye nga nngai.
Nang gaw, ?Ngai lata da ai masha wa hte ga shaka tawn da ni ai,
nye a shangun ma kaja Dawi hpe ga sadi jaw da ni ai hte maren,
?Na a aru arat hpe tut nawng e, hkawhkam shatai da nna,
na a hkawhkam amyu ni hpe htani htana shagrin da na nngai,?? nga nna tsun nit dai.Ref 89:4: 2Sa 7:12-16; 1Hl 17:11-14; Shk 132:11; Kas 2:30.
 
Madu e, sumsing lamu ni gaw nang galaw ai mauhpa lam ni hpe mung,
chyoi pra ai ni gaw na a sadi sahka lam hpe mung, mahkawn mangoi nga ma ai.
Madu e, sumsing lamu hta e, nang hte bung ai wa kadai mung n nga nga ai;
sumsing sha ni kadai mung nang hte shabung lu nga ai n rai.
Nang gaw chyoi pra ai ni a hpawng hta hkrit hkungga ai lam hkam la lu nga ndai;
shanhte yawng hte gaw nang hpe mau mahka let tsap nga ma ai.
 
Chyahtum Chyalai n-gun rawng ai Madu Karai Kasang e, nang zawn daru magam n-gun rawng ai wa kadai mung n nga nga ai;
Madu e, nang gaw lam shagu hta sadi sahka nga ai wa rai nga ndai.
Nang gaw n-gun hte hpring ai panglai hka hpe up hkang nga ndai;
de a ja la ai hka leng ni kabrawng wa tim, nang shazim kau nga ndai.
10 Nang gaw hka numraw Rahab hpe agrawp kau ai hte dai hpe sat kau nga ndai;
nang na a gumlau hpyen ni hpe na a chyahtum chyalai n-gun hte dang kau nga sai.
11 Sumsing lamu hte ginding aga gaw na a rai nga ai;
mungkan ga hte dai hta nga ai arai yawng mayawng hte hpe mung nang galaw da nit dai.
12 Dingdung hte dingda hpe nang hpan da nit dai;
Tabura bum hte Hermon bum ni mung nang hpe kabu gara mahkawn shakawn ma ai.
13 Nang gaw daru magam n-gun kade wa kaba nga lit hka!
na a n-gun kade wa galu kaba nga lit hka!
14 Na a mungdan hpe ding man ai hte teng man ai lam hta npawt gaw da nga ai;
nang galaw ai lam shagu hte hta tsaw ra myit hte sadi sahka ai lam hpe madun dan nga ndai.
 
15 Mahkawn hkawn ai hte nang hpe nawku daw jau ai ni hte;
na a matsan dum lama ai myit a nhtoi hta hkawm sa nga ai amyu masha ni gaw kade wa a lu nga ma hka!
16 Na a majaw shanhte shani tup kabu gara nga ma ai;
na a mai kaja ai lam a majaw shanhte nang hpe shakawn nga ma ai.
17 Nang anhte hpe awng padang kaba jaw ya nga ndai;
na a tsaw ra myit hta, anhte hpe nang awng dang shangun nga ndai.
18 Madu e, Nang gaw anhte hpe makawp maga la na wa hpe lata da ya nga ndai;
Israela a chyoi pra ai Karai Kasang e, nang anhte a matu hkawhkam jaw ya nit dai.
19 Kalang mi na shingran langai mi hta, na a kangka ai shangun ma kaja ni hpe nang tsun ai gaw,
?Gumhkawng ai hpyenla langai mi hpe ngai shadaw karum yu se ai;
amyu masha ni kaw na langai mi hpe ngai lata la nna hkawhkam tingnyang ap ya se ai.
20 Nye a shangun ma kaja Dawi hpe
chyoi pra ai namman sau hte chya ya nna hkawhkam aya dang ya se ai.Ref 89:20: 1Sa 13:14; Kas 13:22.
21 Nye a n-gun gaw shi hte rau tut nawng anga nga na ra ai hte;
nye a daru magam n-gun hte shi hpe n-gun shaja ya na ra ai.
22 Shi a gumlau hpyen ni shi hpe galoi mung dang lu na n rai;
tara n lang ai wa mung shi hpe dip lu na ra ai n rai.
23 Shi a hpyen ni hpe ngai agrawp ayai kau na we ai hte;
shi hpe n dawng nga ai masha shagu hte hpe ngai sat kau na we ai.
24 Ngai shi hpe tsaw ra nga nna shi hta sadi dung nga na nngai;
ngai shi hpe tut nawng e, awng dang shangun na nngai.
25 Ngai gaw shi a mungdan hpe Ka-ang
Panglai kaw nna Uhprat hka nu du hkra maden ya na nngai.
26 Shi gaw ngai hpe, ?Nang gaw nye a kawa hte nye a Karai Kasang rai nga ndai,
nang gaw ngai hpe makawp maga nga ai wa hte
ngai hpe hkye hkrang la ai Madu rai nga ai,? nga nna tsun na ra ai.
27 Ngai shi hpe nye a kasha alat aya hta dang da na nngai;
hkawhkam ni yawng hte hta grau kaba ai wa, ngai shatai na we ai.Ref 89:27: Shr 1:5.
28 Nye a ga sadi shi hta tut nawng e ngai shagrin da nna;
shi hta tawn da ai ga shaka htani htana agrin nga na ra ai.
29 Shi a hkawhkam amyu gaw lamu zawn ngang grin wa na ra ai;
shi a matu mara ni gaw tut nawng e hkawhkam tai nga lu na mara ai.
 
30 ?Rai ti mung, shi a matu mara ni gaw nye a tara hpe n madat n mara nna;
nye a hkang da ai tara ni hte maren n hkawm n sa nhtawm,
31 nye a sharin shaga ai ga ni hpe shanhte hpa zawn n nawn ai hte;
nye a hkang da ai tara ni hpe n hkan sa ai rai yang chyawm gaw;
32 Shanhte galaw sai yubak ni a majaw, ngai ari jaw na mawe ai.
Shanhte a shut hpyit ai mara ni a majaw, ngai shanhte hpe nni nkri hkam sha shangun na mawe ai.
33 Rai ti mung, Ngai gaw Dawi hpe tut nawng tsaw ra nga nna,
shi tawn da ai nye a ga sadi hpe mung, ngai jahten sharun kau na n rai.
34 Shi hte galaw da ai nye a ga shaka hpe ngai jahten kau na n rai,
shi hta tawn da ai ga sadi langai mi hpe pyi ngai shabai la na we ai n rai.
 
35 ?Nye a chyoi pra ai mying nsang hta kalang ta ga sadi hpe ngai shagrin da se ai;
ngai gaw Dawi hpe galoi mung masu na we ai n rai.
36 Shi a aru arat ni matut manoi anga nga na mara ai;
jan a shingkang htoi nga dingsa, ngai shi a mungdan hpe sin yu nga na we ai.
37 Lamu hta shata gaw grin ai sakse tai nga ai zawn,
dai mungdan mung agrin nga na ra ai,? nga nna tsun ai.
38 Rai ti mung, nang gaw nang lata ai hkawhkam wa hpe masin pawt nga ndai;
nang shi hpe kabai kau da ai hte tawn kau da nit dai.
39 Na a shangun ma hte tawn da ai ga shaka hpe nang jahten kau nit dai hte;
shi a janmau hpe ga nhpu de, nang jahkrat kau ya nit dai.
40 Shi a mare bunghku ni hpe nang run jahkrat kau ya nhtawm;
shi a hpyen dap ni hpe jahten kau ya nit dai.
41 Lai wa lai sa masha yawng hte gaw shi a arung arai ni hpe lagu la ma ai;
shi a htingbu ni yawng mung shi hpe mani asawng nga ma ai.
42 Shi a gumlau hpyen ni hpe nang shadang shangun nna;
shanhte yawng hte hpe nang kabu gara shangun nga nit dai.
43 Nang gaw shi a hpyen laknak ni hpe jahten kau ya nna;
shi hpe majan pa hta jasum kau shangun nga ndai.
44 Shi a hkawhkam sumdoi hpe nang la kau ya nna;
shi a hkawhkam tingnyang hpe ga de kadawng kau ya nit dai.
45 Nang gaw shi hpe shi a aten garai n du yang dingla shangun nna,
kaya kahpa jahkrum da nit dai.
46 Madu e, nang na hkum hpe htani htana htinggrum makoi da na ngu nga n ni?
Na a masin kahtet ai gaw wan zawn kaden du hkra hkru nga na rai ta?
47 Nye a asak kade daram kadun nga ai hpe dum nga u;
si mat chye ai anhte yawng hte hpe nang hpan da nga ndai hpe mung dum u.
48 Kadai wa, galoi mung n si n mat mat ai sha, asak hkrung nga lu na rai nga a ta?
Masha gaw shi hkum shi lup sung hku de n shang mat wa hkra, gara hku shingdang da lu nga a ni?
 
49 Madu e, shawng na na a tsaw ra myit a sakse ni gara kaw rai nga a ta?
Dawi hpe nang jaw tawn sai ga sadi ni gara kaw rai nga ma ta?
50 Na a mayam wa, ngai kade asawng asang hkrum nga nngai rai ti mung,
tara maigan ni a dagam dala ga hpe gara hku ngai hkam sharang nga ai hpe rai ti mung, hkum malap kau ya e.
51 Madu e, nang lata san da ai hkawhkam wa hpe na a gumlau hpyen ni n kaw n law di nga ma ai!
Shi hkawm sa ai shara shagu hta, shi hpe asawng asang di mu ai.
 
52 Madu hpe htani htana shakawn kungdawn nga mu law!