SHAKAWN KUNGDAWN 73
LAIKA MASUM
1 Karai Kasang gaw myit masin san seng ai Israela amyu masha ni hpe kaja wa,
chyeju jaw ya nga ai.
2-3 Rai ti mung, tara n lang ai ni a matu, lam shagu hta kaja nga ai hpe ngai mu ai shaloi;
de a majaw, gumrawng gumtawng ai ni hpe ngai yu manawn wa nngai,
kam hpa ai lam ngai hta ganoi noi shamat kau nna,
nye a makam masham mung ganoi noi htum mat li ai.
4 Shanhte gaw n-gun ja nga ma ai hte hkam kaja nga ma ai majaw;
nni nkri hpe shanhte n hkam sha nga ma ai.
5 Shanhte gaw kaga masha ni zawn, nni nkri hpe n hkam sha ra ma ai;
kaga masha ni lu ai ru yak tsin-yam ni shanhte n lu nga ma ai.
6 Shing rai, shanhte gaw gumrawng gumtawng ai hpe kachyi zawn;
kashun kashe du daw sai hkaw re ai hpe ntsa palawng kaba zawn, sumli da nga ma ai.
7 Shanhte a myit masin gaw n hkru n shawp ai lam hpe ru jaw dat nna;
shanhte a kraw lawang ni gaw n hkru n shawp ai hku maw mawn ai hte kyin nga
ma ai.
8 Shanhte gaw kaga masha ni hpe mani asawng nna n hkru n hkra ai lam ni hpe tsun nga
ma ai.
shanhte gaw gumrawng gumtawng nga ma ai hte, kaga masha ni hpe dip
gamyet sha na lam maw mawn nga ma ai.
9 Shanhte gaw sumsing lamu na Karai Kasang hpe n kaja ai hku shatan nhkan ga tsun nna
ga ntsa e nga ai masha ni hpe chyawm gaw, myit tsaw myit dap ai hkang da ai ga
ni hte aming jaw ma ai.
10 Shing rai, Karai Kasang a amyu masha ni nan shanhte kaw kayin bang mat wa nna;
shanhte tsun ai hpa lam hpe rai tim ra sharawng ai myit hte kam nga ma ai.
11 Shanhte gaw, ?Karai Kasang chye na n rai;
Tsaw Htum ai Wa mu tam na n rai,? nga nna tsun ma ai.
12 Tara n lang ai ni gaw dai zawn rai nga nna
shanhte gaw ntaw ntsang lu ma ai hte aten shagu hta, grau grau lu wa nga ma ai.
13 Dai majaw, nye hkum ngai san seng hkra nga nna,
yubak n galaw ai sha nga kau ai gaw kaman wa rai nga a ni?
14 O Karai Kasang e, nang ngai hpe shani tup nni nkri jahkrum da nga ndai;
nang ngai hpe jahpawt shagu ari jaw nit dai.
15 Lama, dai zawn re ai lam ni hpe ngai tsun kau ai rai tim;
na a amyu masha ni hta na marai langai mi zawn ngai asak hkrung nga sana n rai.
16 Ndai mang hkang lam ni hpe ngai shakut nna myit jahkawn yu ni ai;
rai ti mung, dai gaw chye na na matu, nye a matu nau wa yak la nga ai.
17 shing rai, ngai gaw na a Htingnu kata de du sa ai aten du hkra yak la nga ai.
Shaloi, tara n lang ai ni hta kaning rai wa na lam hpe ngai chye na ni ai.
18 Nang gaw manen nna lagaw kashawt ai shara ni hta shanhte hpe tawn da nna;
shanhte hpe hten mat na shara de jahkrat kau na ndai!
19 Shanhte gaw shaloi jang, jahten shabyak kau ai hkrum nga ma ai;
shanhte a hpang jahtum na lam gaw hkrithpa shara rai nga ai.
20 Madu e, shanhte gaw jahpawt manap aten hta mat mat ai yup mang ni zawn rai
nga nna;
Madu nang rawt wa ai shaloi, shanhte n nga nga masai.
21 Nye a myit sawn ai lam ni gaw ahkup nga nna nchyi nmu hkrum nga ai shaloi,
nye a hkam sha ai lam ni hta myit kraw yu machyi nga ai hte
22 dusat zawn ngai angawk mat wa ai hte
na a myit ra ai lam hpe mung ngai n chye na mat nngai.
23 Rai ti mung, ngai nang hte rau ani sha nga nga nngai hte;
nang ngai hpe lata hte jum da nga ndai.
24 Na a sharin matsun ai ga hte ngai hpe nang woi lakawn wa nna;
nang ngai hpe hpang jahtum na aten hta hpung shingkang hte hkap la na ndai.
25 Sumsing lamu hta, nang hta kaga ngai kadai hpe Madu shatai na rai
nga a ta?
Nang nye a Madu rai nga yang, mungkan ga ntsa e, ngai hpa naw ra na
rai nga a ta?
26 Nye a myit masin hte hkum hkrang n-gun ni yawm mat wa tim;
Karai Kasang gaw nye a n-gun rai nga ai.
Ngai hta ra kadawn ai lam yawng mayawng gaw shi rai nga ai.
27 Nang hpe kau da ai ni gaw teng teng htum mat na mara ai;
nang hta sadi n dung ai ni hpe Nang shamyit kau na rin dai.
28 Rai ti mung, nye a matu chyawm gaw, Karai Kasang hte ani sha nga lu na,
Madu Karai Kasang hta makawp maga ai lam mu tam la na matu hte
shi galaw dan sai magam bungli ni hpe htawn tsun na lam ni gaw kade sha
mauhpa rai nga a hka!