SHAKAWN KUNGDAWN 66
Amyu masha ni yawng hte e, Karai Kasang hpe kabu gara jahtau garu ai hte shakawn nga mu!
Shi a mying nsang a hpung shingkang hpe mahkawn mu;
hpung shingkang hte hpring ai shakawn kungdawn ga hte shi hpe daw jau mu!
?Nang galaw ai amu ni gaw kade wa mauhpa rai nga a hka!
Na a daru magam n-gun grai galu kaba nga ai majaw,
na a gumlau hpyen ni gaw na a man e, hkrit ai hte gum dagup nga ma ai.
Ga ntsa e shanu nga ai masha shagu hte gaw nang hpe nawku daw jau ma ai;
shanhte gaw nang hpe mahkawn shakawn nga ma ai,
na a mying nsang hpe shanhte mahkawn shakawn nga ma ai,?
nga nna Karai Kasang hpe tsun ma ai.
 
Karai Kasang galaw dan sai amu hte shinggyim masha ni a lapran e,
shi galaw dan sai mauhpa magam amu ni hpe, sa nna yu yu mu.
Shi gaw panglai hpe hkun hkraw ai hkarang hku galai kau nga ai;
anhte a kaji kawa ni, lagaw hte dai hka hpe lai di mat wa masai.
Shi galaw dan sai amu magam ni a majaw, anhte kabu gara lu saga ai.Ref 66:6: Pru 14:21.
Shi a chyalai n-gun hte htani htana shi up nga nna;
amyu baw ni a ntsa e, shi azi yu nga ai.
Shi hpe kadai wa mung n gumlang mu ga.
Amyu baw ni yawng hte e, anhte a Karai Kasang hpe shakawn mu;
nanhte a shakawn kungdawn ai ga hpe na lu shangun mu.
Shi gaw anhte hpe jahkrung da nu ai
anhte kataw mat na matu shi ahkang jaw ai n rai.
 
10 Karai Kasang e, nang gaw wan hte gumhpraw hpe shabyawng nna jasan ai zawn,
anhte hpe chyam yu nga ndai.
Dai zawn, nang gaw anhte hpe chyam yu ngut nit dai.
11 Nang gaw anhte hpe mahkam de jahkrat kau nna;
anhte a shingma ntsa hta, li ai lit hpe mara ya nit dai.
12 Anhte a gumlau hpyen ni hpe anhte a ntsa e, nang kabye shangun nna;
anhte gaw wan hpyen, hka mawru hpyen ni hpe hkrum kadup lai wa saga ai;
rai ti mung, ya chyawm gaw, nang anhte hpe shim lum ai shara de woi wa nga nit dai.
 
13 Ngai na a nta de wan nat hkungga ni hpe la sa na nngai;
ngai ga sadi jaw da ai hte maren, nang hpe ngai nawng jau na nngai.
14 Ngai ru tsang hkrum nga nngai shaloi,
ngai nang hpe tsun dan lai wa sai lam ni hte maren, nang hpe jaw na de ai.
15 Ngai gaw tawn hkungri ntsa e nat nawng na matu, sagu ni hpe nawng jau na nngai;
usu ni hte bainam ni hpe mung, nawng jau na nngai;
shing rai, hkungga wan hkut gaw lamu de mawng lung wa na ra ai.
 
16 Karai Kasang hpe hkrit hkungga ai ni yawng hte e, sa madat la mu,
shi nye a matu galaw dan sai amu ni nang hpe tsun dan na nngai.
17 Karum la na matu, shi hpe ngai jahtau ni ai;
ngai shi hpe mahkawn mangoi ni hte shakawn ni ai.
18 Nye a yubak ni hpe ngai hpa zawn n nawn kau ai rai yang;
dai Madu ngai hpe madat ya na wu ai n rai.
19 Rai ti mung, Karai Kasang gaw ngai hpyi tsun ai ga ni hpe teng teng na ya nu ai;
nye a akyu hpyi ai ga ni hpe mung shi madat ya nu ai.
 
20 Shi gaw nye a akyu hpyi ai ga ni hpe n ningdang kau ya ai hte,
shi a dinggrin tsaw ra myit, ngai kaw na n dawm la kau ya ai majaw,
ngai Karai Kasang hpe shakawn nngai law.