SHAKAWN KUNGDAWN 64
Karai Kasang e, ngai ru tsang hkrum nga nngai, nye a akyu hpyi ga hpe madat ya e!
Nye a gumlau hpyen ni hpe ngai hkrit nga nngai, nye a asak hpe hkye hkrang la ya e!
Tara n lang ai ni a maw mawn ai lam hte
n hkru n shawp ai masha ni a hpawng kaw na, ngai hpe makawp maga la e.
Shanhte gaw shinglet ni hpe nhtu ni zawn garang shadai nna;
mazut ai ga ni hpe pala ni zawn shading da nga ma ai.
Shanhte gaw shanhte a kaya n chye ai masu magaw ga ni hpe tin tin htawn shabra nga ma ai;
nden n rawng ai masu magaw ga ni hte mai kaja ai masha ni hpe shatan nhkan ga tsun nna jahpyak nga ma ai.
Shanhte gaw n hkru ai amu hpe galaw maw mawn ai lam hta shanhte shada da n-gun jaw hkat nga ma ai;
shanhte a mahkam ni hpe gara shara ni hta hkam da yang mai na lam, shanhte tsun jahta nga ma ai.
Shing rai, shanhte gaw, ?Dai mahkam ni hpe kadai mung mu lu na n rai,? nga nna tsun ma ai.
Shanhte gaw n hkru n shawp ai yaw shada lam ni hpe maw mawn nna,
?Ra n rawng ai sai kap amu hpe anhte yaw lajang da lu saga ai,? nga nna tsun ma ai.
Masha a myit masin hte kraw lawang ni hpe chye na lu na matu, yak la ai mauhpa lam ni rai nga ai.
 
Rai ti mung, Karai Kasang gaw shi a pala ni hte shanhte hpe gap dat nna;
akajawng sha, shanhte hkala hkrum nga ma ai.
Shanhte tsun shaga ai ga ni a majaw, shi shanhte hpe jahten kau na ra ai;
shanhte hpe mu mada ai ni yawng hte gaw shanhte a baw ni hpe kanga na mara ai.
Shanhte yawng hte gaw hkrit wa na mara ai rai nna,
Karai Kasang hpa galaw da sai lam hpe shanhte myit aru yu na mara ai hte
shi a amu bungli lam hpe tsun hkai dan na mara ai.
10 Karai Kasang galaw shapraw dan sai amu ni a majaw,
ding hpring ai masha ni yawng kabu gara na mara ai.
Shanhte shi hta shim lum nga na mara ai,
mai kaja ai amyu masha ni yawng shi hpe shakawn na mara ai.