SHAKAWN KUNGDAWN 63
1 O Karai Kasang e, nang gaw nye a Karai Kasang rai nga ndai, ngai nang hpe marit nga nngai.
Nye a hkum ting nang hpe ra marit nga nngai;
hkun hkraw mat nna, akyu n jaw mai sai hte hka n rawng mat sai lamu ga zawn,
nye a myit masin mung nang hpe shagroi gara nga li ai.
2 Chyoi pra ai shara hta nang hpe ngai mu lu n-ga,
nang gaw kade wa n-gun chyalai rawng nga ai hte hpung shingkang rawng nga ai hpe mung ngai mu lu n-ga.
3 Na a dinggrin tsaw ra myit gaw dai asak hta grau nna mai kaja nga ai majaw,
ngai nang hpe shakawn nga na nngai.
4 Ngai asak hkrung nga dingsa nang hpe chyeju dum nga na nngai;
nang kaw akyu hpyi ai shaloi, nye a lata ni hpe sharawt da na nngai.
5 Nye a wenyi gaw, dwi sau ai lusha hpe sha lu ai zawn myit dik ai hkrum na ra ai;
ngai nang hpe kabu gara ai mahkawn mangoi ga ni hte mahkawn shakawn nga na nngai.
6 Ngai yupku ntsa e kaleng nga ai shaloi nang hpe dum nga nngai;
nang ngai hpe tut nawng karum la nga nit dai majaw
7 na a lam hpe shana tup ngai myit yu nga nngai.
Na a singkaw ni a shingnip kata hta kabu gara ai hte ngai mahkawn mangoi nga nngai.
8 Ngai nang kaw hkan jum noi nga nngai;
na a lata ngai hpe shim hkra makawp maga ya nga ai.
9 Ngai hpe sat na matu shakut shaja ai ni gaw
katsan ga de yu mat wa na mara ai.
10 Shanhte gaw majan e sat kau ai hkrum na mara ai;
shanhte a hkum shan ni mung chyahkyawn ni e sha kau ai hkrum na mara ai.
11 Shi hpe Karai Kasang awng padang jaw ya ai majaw,
hkawhkam wa kabu gara na ra ai.
Karai Kasang a mying nsang hta ga shaka tawn da ai ni gaw shi hpe shakawn lu na mara ai:
rai ti mung, masu magaw ga tsun ai ni a n-gup ni chyawm gaw pat kau ai hkrum na mara ai.