SHAKAWN KUNGDAWN 53
(Shakawn Kungdawn 14)
1 ?Karai Kasang n nga ai!,?
nga nna angawk ai ni gaw shanhte a myit hta tsun nga ma ai.
Shanhte yawng hte gaw tsam mat nga ma ai,
hkrithpa amu ni hpe, shanhte galaw kau ma ai;
dai teng man ai amu hpe galaw na masha kadai mung n nga nga ai.
2 Shi hpe nawku daw jau na hte hpaji rawng nga ai ni kadai rai tim
nga dam ai rai yang, dai hpe mada yu na matu,
Karai Kasang gaw sumsing lamu kaw nna shinggyim masha ni hpe gum yu nga ai.
3 Rai ti mung, shanhte yawng hte gaw shut hpyit ma masai;
shanhte yawng hte wa maren n kaja nga ma ai.
Dai teng man ai amu galaw ai masha shanhte hta langai mi mung n nga nga ai,
kaja wa, langai mi mung n nga nga ai. Ref 53:3: Rom 3:10-12.
4 Karai Kasang gaw, ?Shanhte n chye na ma ai kun?
Ndai n hkru n shawp ai amu galaw ai ni yawng hte wa, gri magra re ai ni rai
nga ma ai kun?
Shanhte gaw nye a amyu masha ni hpe hpya sha let nga nga ma ai hte,
ngai kaw galoi mung akyu n hpyi yu ma ai,? nga nna san nga ai.
5 Shaloi, shanhte gaw shawng de galoi mung garai n hkrum kadup yu ai
kaba la ai hkrit kahpra lam hpe hkrum hkra wa na mara ai;
hpa majaw nga yang, Karai Kasang gaw shi a amyu masha ni a gumlau hpyen ni a nrut
nra ni hpe gat kau ya na ra ai.
Karai Kasang shanhte hpe ningdang kau mu ai majaw,
Israela amyu masha ni shanhte hpe awng dawm dang kau na mara ai.
6 Israela amyu masha ni a awng padang gaw
Ziun kaw nna du sa na matu, ngai kade sha akyu hpyi nga a hka!
Karai Kasang gaw Israela amyu masha ni hpe kalang mi bai ngamu ngamai shangun
ai shaloi
shanhte kade sha kabu gara lu na ma hka!