SHAKAWN KUNGDAWN 51
1 Karai Kasang e, na a dinggrin tsaw ra myit a majaw, ngai hpe matsan dum la e.
Na a galu kaba ai matsan dum myit a majaw, nye a yubak ni hpe arut kau ya e.
2 Nye a n hkru n shawp ai lam yawng hte hpe kashin kau ya nna,
nye a yubak kaw na ngai hpe jasan jaseng la e!
3 Nye a shut hpyit ai mara ni hpe ngai matsing nga nngai;
nye a yubak ni hpe ngai tut nawng adum nga nngai.
4 Ngai nang hpe yubak galaw shut kau ni ai- nang hpe chyu sha shut kau ni ai.
Nang myit yu ai n hkru n shawp ai lam hpe ngai galaw shut kau ni ai.
Dai majaw, ngai hpe tara jeyang ai hta nang gaw teng man nga ndai;
ngai hpe daw dan jeyang ai hta nang ding hpring nga ndai.Ref 51:4: Rom 3:4.
5 Ngai shangai wa ai shani kaw nna, ngai gaw n hkru n shawp nga nngai;
nu a hkritung kaw nna pyi, ngai hta yubak kap nga ni ai.
6 Nang gaw myit malang ai hte teng man ai lam hpe hpyi nga ndai majaw;
nye a kraw lawang hta na a hpaji hte jahpring ya e.
7 Nye a yubak hpe la kau ya e, shing rai jang, ngai san pra wa lu na nngai;
ngai hpe kashin la e, shing rai jang, ngai gaw hkyen hta pyi grau hpraw wa
lu na nngai.
8 Kabu gara ai hte ngwi pyaw ai nsen ni ngai hpe na shangun et;
nang ngai hpe daw agrawp kau ai rai ti mung,
ngai kalang mi bai naw kabu gara wa lu na nngai.
9 Nye a yubak ni hpe n mu lu u ga, na a myi ni hpe di da u;
nye a n hkru n shawp ai lam yawng hte hpe arut kau ya e.
10 O Karai Kasang e, san seng ai myit ngai hta hpan shapraw ya e;
sadi dung ai wenyi hte myit masin nnan ngai hpe jaw ya rit.
11 Na a myi man kaw nna ngai hpe hkum shaden kau et;
na a chyoi pra ai wenyi ngai kaw na hkum dawm la kau ya e.
12 Na a hkye hkrang la ai kaw na lu la ai kabu gara ai lam, ngai hpe bai jaw ya e;
nang hpe madat mara mayu ai myit ngai hta bang ya e.
13 Shaloi, yubak mara lu ai masha ni hpe na a hkang da ai tara lam ni hpe ngai
sharin ya na nngai;
shanhte gaw shi hpang de kayin wa na mara ai.
14 Karai Kasang e, nye a asak hpe shalawt ya nna, ngai hpe hkye hkrang la e;
na a ding man ai lam hpe ngai kabu gara htawn tsun nga na nngai.
15 Madu e, ga shaga lu na matu, ngai hpe karum la e;
shing rai, ngai nang hpe shakawn na nngai.
16 Nang gaw shagu hkungga ni hpe n ra sharawng nga ndai,
shing n rai yang, ngai sak jaw na de ai;
nang gaw wan nat hkungga ni hpe mung n ra sharawng nga ndai.
17 O Karai Kasang e, nye a shagu hkungga gaw shagrit shanem ai myit rai nga li ai;
shagrit shanem ai myit hte myit malai ai myit masin hpe nang n ningdang kau na ndai.
18 Karai Kasang e, Ziun hpe matsan dum nna shi hpe karum u;
Yerusalem mare a bunghku ni hpe bai gaw gap da u.
19 Dai shaloi, nang gaw ra n rawng ai shagu hkungga ni hte
anhte a wan nat hkungga ni hta sharawng awng wa na rin dai;
na a tawn hkungri ntsa e mung, usu ni hpe nawng jau wa na mara ai.