SHAKAWN KUNGDAWN 50
1 Dai Chyahtum Chyalai n-gun rawng ai Madu Karai Kasang mungga tsun ai;
sinpraw kaw nna sinna maga du hkra na mungkan ting hpe shi shaga nga ai.
2 Karai Kasang gaw shi a hkum tsup tsawm htap nga ai
Ziun mare kaw nna, nhtoi shatu dat wu ai.
3 Anhte a Karai Kasang sa wa nga ai rai tim, atsin sha du sa nga ai n rai;
shi a man e wan shinglet ni hkru nga nna
shi a makau mayang hkan e, laru kaba ru nga ai.
4 Shi a amyu masha ni hpe shi tara jeyang ai hpe mu lu na matu,
Madu gaw sumsing lamu hte ginding aga hpe sakse shatai na nga, shaga dat wu ai.
5 ?Hkungga nawng jau let, ngai hte ga shaka tawn da ai ni,
nye a kangka ai amyu masha ni hpe ngai hpang de woi hpawng mu,? nga nna shi tsun ai.
6 Karai Kasang gaw ding hpring ai wa rai nna,
shi nan tara agyi rai nga ai hpe sumsing lamu gaw shana shabra ya nga ai.
7 ?Nye a amyu masha ni e, madat mu, ngai ga tsun nga nngai;
Israela e, ngai nang hpe mara madun ai sakse hkam na nngai;
Ngai gaw Karai Kasang na a Karai Kasang rai nga nngai.
8 Na a shagu hkungga ni hte
wan nat hkungga ni ngai hpe tut nawng jaw jau ai majaw, ngai nang hpe daru na nngai n rai.
9 Rai ti mung, na a sun na usu ni hpe mung,
na a wuhpung na bainam ni hpe mung, ngai n lang ra nngai.
10 Nam maling kata hkan nga ai dusat yam nga ni yawng hte
kawng hkying mun ni hta nga nga ai yam nga ni yawng hte gaw nye a rai nga li ai.
11 Ntsa malen u ni yawng hte udat pa hkan nga ai
asak hkrung ai dusat ni yawng mung, nye a rai nga li ai.
12 ?Ngai kawsi ai hkrum wa yang lusha a matu ngai nang kaw hpyi na n rai;
hpa majaw nga yang, mungkan ting hte dai hta nga ai arai yawng mayawng hte gaw nye a rai nga li ai.
13 Ngai gaw dumsu shan sha nga a ni?
shing n rai, bainam ni a asai hpe lu nga a ni?
14 Chyeju dum shakawn ai gaw Karai Kasang hpe na a shagu hkungga nawng jau ai lam rai nga u ga;
Chyahtum Chyalai n-gun rawng ai Madu hpe nang ndat da ai ga sadi yawng hte hpe jaw ya u.
15 Ru tsang hkrum ai shaloi, ngai hpe shaga e,
ngai nang hpe hkye hkrang la na nngai;
shing rai, nang ngai hpe shakawn na rin dai,? nga ai.
16 Rai ti mung, Karai Kasang gaw n hkru ai wa hpe,
?Nang hpa majaw nye a hkang da ai ga ni hpe hti shakrai nga na rai ta?
Nang hpa majaw nye a ga shaka lam ni hpe tsun nga na rai ta?
17 Ngai shading sharai ai ga hpe nang ningdang kau nna;
nye a hkang da ai ga ni hpe nang nyet kau nga ndai.
18 Nang mu hkrup ai lagut shagu hte a manang nang tai nna;
numshaw lashaw ai ni hte rau nang kanawn nga ndai.
19 ?Nang gaw n hkru ai ga shaga na matu, tut nawng e, jin jin rai nga ndai;
masu magaw ga ni hpe tsun shaga na, nang galoi mung lit li nga ai n rai.
20 Na chyurum hpu nau ni hpe mara shagun na hte shanhte hpe mara tam na matu mung;
nang hta jin jin rai nga ndai.
21 Dai lam yawng hte hpe nang galaw nit dai, ngai hpa mung n shaga nngai majaw,
nang zawn ngai rai nga nngai ngu nna nang myit la nga ndai;
rai ti mung, ya chyawm gaw, ngai nang hpe daru sharin na nngai hte
nang hpe dai lam asan sha tsun dan na nngai.
22 ?Ngai hpe malap mali rai nga ai wa nang e, ndai ga ni hpe madat yu u:
shing n rai, ngai nanhte hpe jahten sharun kau na nngai,
nang hpe hkye hkrang la na kadai mung nga na n rai.
23 Chyeju dum ai shagu hkungga gaw ngai hpe shagrau sha-a ai lam rai nga ai;
nye a ga madat mara ai ni yawng hte hpe ngai teng teng hkye hkrang la na nngai.?