SHAKAWN KUNGDAWN 5
O Madu e, Nye a ga ni hpe madat ya e,
nye a madai ai nsen hpe na ya e.
Nye a Karai Kasang hte Hkawhkam wa e!
karum la na matu, nye a hpyi jahtau ai nsen hpe madat ya e,
O Madu e, ngai nang kaw akyu hpyi nngai;
nang gaw jahpawt manap aten hta nye a nsen hpe na ya nga ndai;
jan pru wa yang mung nye a akyu hpyi ga hpe ngai sak jaw nna,
na a mahtai hpe ala nga nngai.
 
Nang gaw n teng n man ai amu ni hta awng sharawng ai Karai Kasang n rai nga ndai;
na a man e, n hkru ai amu hpa hpe mung nang ahkang jaw ai n rai.
Gumrawng gumtawng ai ni gaw na a man e tsap lu ma ai n rai,
tara n lang ai masha ni yawng hpe mung nang n ju n dawng nga ndai.
Masu magaw ga tsun ai ni yawng hte hpe nang jahten kau ndai;
kashun kashe hte hkalem hkalau chye ai ni hpe nang matsat nga ndai.
Rai ti mung, na a galu kaba ai tsaw ra myit a majaw
ngai na a nta de sa lu nngai;
na a chyoi pra ai Nawku Htingnu hta ngai nawku lu nna
nang hpe hkrit hkungga ai hte dingnyawm lu nga nngai.
Madu e, Ngai gaw gumlau hpyen law law lu nga nngai!
Na myit ra ai hku, galaw lu u ga, ngai hpe lam woi la e;
na a lam hkan lu hkra nye a matu na a lam hpe jasan ya rit.
 
Nye a gumlau hpyen ni tsun ai hpa lam hpe rai tim, galoi mung n mai kam nga ai;
shanhte gaw jahten kau na matu sha, ra sharawng nga ma ai.
Shanhte tsun shaga ai ga ni gaw dwi sau nna abawk shatsawm lu nga ma ti mung,
dai ni gaw hkrit tsang mai ai hkalem ga ni hte hpring nga ai.Ref 5:9: Rom 3:13.
10 Karai Kasang e, shanhte hpe daw dan nna ari jaw u:
shanhte a maw mawn ai n hkru ai lam hta Shanhte nan hten za mat mu ga.
Shanhte a law la ai yubak mara ni hte
shanhte nang hpe gumlau nga ma ai majaw,
shanhte hpe na a man kaw nna gawt kau u.
 
11 Rai ti mung, nang hta shim lum ai lam mu tam ai ni yawng hte gaw kabu gara lu na mara ai;
shanhte gaw tut nawng e, kabu gara let mahkawn shakawn lu nga ma ai.
Nang hpe tsaw ra ai ni hpe makawp maga ya nga u;
na majaw, shanhte teng teng kabu gara nga ma ai.
12 Madu e, nang gaw na a ga madat mara nga ai ni hpe shaman ya nga ndai;
na a tsaw ra myit gaw shanhte hpe ninggang zawn makawp maga ya nga ai.