SHAKAWN KUNGDAWN 48
Dai Madu gaw galu kaba nga ai rai nna shi a chyoi pra ai bum ntsa e nga ai
anhte a Karai Kasang a mare hta shi hpe tsaw htum ai hku shakawn kungdawn ra nga ai.
Karai Kasang a bum ngu ai Ziun gaw tsaw nga nna, tsawm htap nga ai;
galu kaba ai hkawhkam wa a mare gaw mungkan amyu masha ni yawng hte hpe, kabu gara shangun nga ai.Ref 48:2: Mat 5:35.
Dai mare a hpyen dap kata ni hta shi hte rau shim lum nga ai hpe
Karai Kasang madun dan nu ai.
 
Hkawhkam ni jawm hpawng nga nna,
Ziun bum hpe htim gasat na matu, shanhte pru sa wa ma ai.
Rai ti mung, shanhte gaw dai bum hpe mu ma ai shaloi mau mahka mat nhtawm;
hkrit kajawng ai hte hprawng mat ma ai.
Shanhte gaw dai yang e, ma shangai hkyen nna shinggyim machyi hkrum ai num hte,
laja lana re ai nbung laru kata, le de, wo de, adawt kanga hkrum nga ai sanghpaw li zawn
hkrit gari ai hte ruyak kyindut hkrum hkra nga ma ai.
 
Karai Kasang hpa galaw dan sai amu hpe anhte mu lu sagaw ai;
Chyahtum Chyalai n-gun rawng ai Madu anhte a Karai Kasang a mare hta, dai lam hpe anhte ya mu lu saga ai.
Shi gaw dai mare hpe htani htana shim nga shangun na ra ai.
 
O Karai Kasang e, na a Htingnu kata hta
na a dinggrin tsaw ra myit a lam hpe anhte myit yu ga ai.
10 Nang gaw shara shagu hkan nga nga ai amyu masha ni a shakawn kungdawn ai hkrum nga ndai;
na a mying nsang aga ting hta kajai gumhkawng nga ai,
nang gaw teng man ai tara hte up hkang nga ndai.
11 Ziun a amyu masha ni kabu gara lu mu ga!
Teng man ai tara dara lam ni hpe nang jaw ya nga ai;
Yuda mung na mare ni hta kabu gara ai gaw anga nga u ga law!
 
12 Karai Kasang a amyu masha ni e, Ziun hpe shinggrup hkawm ai hte de a langchyi ni hpe hti yu mu;
13 de a mare bunghku ni hpe matsing nna, de a hpyen dap ni hpe san jep yu mu, shing rai jang,
14 nanhte gaw, ?Dai Karai Kasang gaw htani htana prat dingsa na anhte a Karai Kasang rai nga ai;
shi gaw anhte hpe prat ting lam woi wa na ra ai,? nga nna hpang ban prat masha ni hpe hkai dan lu na myit dai.