SHAKAWN KUNGDAWN 40
1 Madu karum la na matu ngai myit galu ai hte ala nga nngai;
shaloi, ngai hpe shi madat ya nna, nye a hpyi jahtau ai nsen hpe na ya ni ai.
2 Shi gaw ngai hpe hkrit hpa nhkun hta na mung, lup si shangun ai nawng wam hta na mung
gang shaw la nhtawm;
lunghkrung ntsa e, shim hkra ngai hpe tawn da nna makawp maga da ni ai.
3 Shi gaw ngai hpe mahkawn ga nnan mahkawn shakawn na matu sharin ya ai,
dai gaw anhte a Karai Kasang hpe shakawn ai mahkawn langai mi rai nga ai.
Law law wa dai hpe mu nna hkrit maja let,
Madu hpe shanhte kam hpa nga ma ai.
4 Hpara sumla hpang de n hkan nang ai hte,
karai masu ni hpe nawku daw jau ai ni hte mung,
n mazum ai sha, dai Madu hpe kam hpa nga ai ni gaw a nga ai.
5 Anhte a Madu Karai Kasang e, anhte a matu nang galaw da ya sai amu
ni gaw law la nga ai;
nang hte bung ai wa kadai mung n nga nga ai!
Anhte a matu mauhpa yaw shada lam law law hpe nang galaw da ya nit dai.
Dai ni gaw nau law la ai majaw,
dai ni yawng a lam hpe ngai dang hti lu ai n rai!
6 Nang gaw shagu hkungga ni hte wan nat hkungga ni hpe n sharawng nga ndai;
tawn hkungri ntsa e, hkum ting nat nawng ai hkungga ni hte,
yubak mara raw dat kau na matu nawng jau ai hkungga ni hpe, nang n hpyi
nga ndai.
Shing rai nawng jau ya na malai, nang tsun ai lam hpe na la na matu,
nang gaw ngai hpe na lashing hpaw ya nit dai,
7 ngai gaw, ?Ngai nang e, nga nga nngai;
nye a matu na a sharin shaga ai ga matsun ni gaw tara laika buk hta rawng nga ai.
Ref 40:7: Heb 10:5-7.
8 Nye a Karai Kasang e, na a myit ra ai hku galaw na, ngai kade wa tsaw nga a hka!
Na a sharin shaga ai lam hpe nye a myit kraw lawang hta ngai mazing da nga nngai,?
9 Madu e, na amyu masha ni yawng a shawa hpawng hta nang anhte hpe hkye
hkrang la ai dai
kabu gara shiga hpe ngai tsun dan ni ai.
Dai hkaw tsun ai lam hpe ngai galoi mung jahkring kau na n rai nga ai hpe nang
chye nga ndai.
10 Dai hkye hkrang la ai shiga hpe ngai hkum nan ip da nga nngai n rai;
ngai gaw na a sadi sahka hte karum la ai lam hpe tut nawng atsun ni ai;
Na a amyu masha ni yawng a shawa hpawng hta,
na a kangka ai lam hte dinggrin tsaw ra nga ai lam ni hpe
ngai n tsun ai sha nga kau nngai n rai.
11 Madu e, ngai hpe matsan dum ai lam nang galoi mung jahkring kau na n
rai nga ndai gaw, ngai chye nngai.
Na a tsaw ra myit hte sadi sahka gaw ngai hpe tut nawng e, shim lum shangun
na ra ai.
(Shakawn Kungdawn 70)
12 Ngai gaw ru tsang law law hte gawan da hkrum ai wa rai nga nngai
dai gaw n dang hti hkra law la nga ai!
Ngai loi mi pyi n mu mada lu hkra,
nye a yubak ni mung ngai hpe dep nang mat sai;
dai gaw nye baw na kara ni hta grau law ai rai nna,
nye a myit gawng run mat sali ai.
13 Madu e, ngai hpe hkye hkrang la e!
Ngai hpe ya jang, karum la e!
14 Ngai hpe sat na maw ai ni tsep kawp sum mat nna
shanut kau ai hkrum mu ga.
Nye a ru tsang ai lam ni a majaw kabu gara nga ai ni gaw
shingdu de htingnut mat wa nna, kaya kahpa hkrum mu ga.
15 Ngai hpe mani asawng ai ni gaw
shanhte sum mat ai a jaw e, myi man sum mat mu ga.
16 Nang kaw du sa ai ni yawng hte gaw awng sharawng ai hte kabu gara nga mu ga;
na a hkye hkrang la ai lam hpe chyeju dum ai ni yawng hte gaw,
?Madu gaw kade wa galu kaba nga a hka!?
nga nna tut tut atsun nga mu ga.
17 Madu e, ngai gaw gawng kya nga nngai hte matsan mayan re ai wa rai
nga nngai,
rai ti mung, nang gaw ngai hpe malap kau nga ndai n rai.
Nang gaw nye a hkye hkrang la ai wa hte nye a Karai Kasang rai nga ndai-
ngai hpe karum la na tin tin du rit law!