SHAKAWN KUNGDAWN 38
1 O Madu e, na a masin kahtet ai hta ngai hpe ari hkum jaw et!
2 Na a pala ni a jaw e, ngai hta nma kap nga nna
nang ngai hpe adup kadawng tawn nga ndai.
3 Na a masin kahtet ai majaw ngai laja lana machyi hkrum nga nngai;
nye a yubak ni a majaw, nye a hkum ting hta ana zinli hkrai rai nga li ai.
4 Ngai gaw nye a yubak mawru kata hta lup mat wa nga nngai;
dai ni gaw tsin-yam lit langai mi rai nga nna, hkam sharang lu na matu, nau li la nga ai.
5 Ngai gaw angawk angak rai mat ni ai majaw,
nye a nma ni yat nna manam hkying nga li ai.
6 Ngai gaw nshang htingkung nga nngai hte myit daw myit hten ai hkrum nga nngai;
shing rai, shani tup ngai sharung shayawt nga nngai.
7 Ngai gaw hkum kahtet machyi nga nngai hte
si wa mahka rai mat nga nngai.
8 Ngai gaw hki ba la nga nngai hte teng sha wa, agrawp agrap rai mat nga nngai;
nye a myit kraw lawang mung ru tsang hkrum nga nna, nchyi nmu hte ngai madai nga nngai.
9 O Madu e, ngai hpa hpe ra marit nga ai gaw nang chye nga ndai;
nye a madai ai nsen ni yawng hpe mung nang na ya nga ndai.
10 Nye a salum htuk htak nga li ai, nye a n-gun mung htum mat sali ai;
nye a myi ni mu na atsam n rawng mat sai.
11 Nye a ningma ni a majaw,
nye a manang ni hte htingbu ni ngai kaw n ni sa wa na ma ai;
nye a dinghku pyi ngai hpe gang kau da nga ai.
12 Ngai hpe sat mayu ai ni, nye a matu mahkam hkam da nga nna,
ngai hpe machyi shangun mayu ai ni mung ngai hpe jahten shabyak lu na matu jahkrit shama nga ma ai;
shanhte gaw ngai hpe n sim n sa n kaja ai lam maw mawn nga ma ai.
13 Ngai gaw na lahpang ai masha langai wa zawn n na lu nngai,
ma-a ai masha langai wa zawn n lu shaga nga nngai.
14 Ngai gaw na n na lu ai majaw,
n htan ai na hpang wa hte bung nga nngai.
15 Rai ti mung, Madu e, ngai gaw nang hpe kam hpa nga nngai;
nye a Madu Karai Kasang e, nang gaw ngai hpe htan ya na rin dai.
16 Nye a gumlau hpyen ni, nye a myit ru myit tsang ai lam hta hkum yu kabu shangun nga et;
nye a hkrat sum mat ai lam hta mung, shanhte hpe hkum gumrawng shangun nga et!
17 Ngai gaw kataw na sha rai ni ai hte
n sim n sa machyi ai mung hkrum nga nngai.
18 Nye a yubak ni hpe ngai yin la nga nngai,
dai gaw ngai hpe myit ru myit tsang lam jahpring ya nga ai.
19 Nye a gumlau hpyen ni gaw hkam kaja nga ma ai hte n-gun ja nga ma ai;
mara kata, ngai hpe n dawng ai ni law law nga ma ai.
20 Mai kaja ai a matu, n hkru ai hpe htang jaw ai ni gaw
teng man ai amu hpe ngai galaw shakut nga ai majaw, ngai hte nhtan shai nga ma ai.
21 Madu e, ngai hpe hkum kau da et;
nye a Karai Kasang e, ngai hte tsan tsan hkum nga et.
22 Ngai hpe hkye hkrang la ai Madu e,
ngai hpe ya jang karum la e law!