SHAKAWN KUNGDAWN 36
1 Yubak gaw tara n lang ai masha wa a sung ai myit kraw kata hta shaga nga ai;
shi gaw Karai Kasang hpe nyet kau nhtawm shi hpe hkrit hkungga ai lam hpa mung n
nga ai, ngu nga ai.Ref 36:1: Rom 3:18.
2 Hpa majaw nga yang, shi gaw shi hkum shi grai rai la sai ngu nna myit la nga ai;
Karai Kasang gaw shi a yubak hpe n mu tam ai hte dai hpe daw dan jeyang na n rai,
nga nna shi myit nawn la nga ai.
3 Shi a tsun shaga ai ga gaw n hkru n shawp ai hte masu magaw ga ni hte hpring nga ai;
hpaji rawng ai lam hte mai kaja ai lam hpe shi kachyi mi mung n galaw nga ai.
4 Shanhte gaw yup ku ntsa e kaleng nga yang, n hkru ai mahkyen ni hpe galaw ma ai;
shi galaw ai amu hpa mung n kaja nga ai,
n hkru ai amu hpa hpe mung galoi mung ningdang kau nga ai n rai.
5 Madu e, na a dinggrin tsaw ra myit gaw sumsing lamu du hkra dep nga
ai;
na a sadi sahka mung lamu ni de du hkra maden jat nga ai.
6 Na a ding man ai lam gaw bum ni zawn tsaw nga nna,
na a teng man ai lam mung hka panglai zawn sung nga ai.
Masha hte dusat yam nga ni gaw na a lata hta rai nga ai.
7 Karai Kasang e, na a dinggrin tsaw ra myit gaw kade wa hpu reng nga a hka!
Na a singkaw ni a shingnip npu hta shingbyi shara anhte lu ga ai.
8 Nang jaw ya ai n taw n tsang re ai lusha hta anhte lu sha ga ai;
na a mai kaja ai chyeju hte lwi ai hka nu kaw na nang anhte hpe lu shangun mi ai.
9 Nang gaw asak yawng a hka hpawk rai nga ndai;
na a nhtoi majaw, anhte dai nhtoi hpe mu lu ga ai.
10 Nang hpe chye chyap ai ni hpe matut nna tsaw ra nga u,
ding hpring ai ni hpe matut nna mai kaja ai amu galaw nga u law.
11 Gumrawng gumtawng ai masha ni ngai hpe hkum gasat shangun et,
n hkru n shawp ai masha ni mung ngai hpe hkum jahtaw kau shangun et.
12 Yu u, n hkru ai masha ni kanang kadawng taw nga sai hpe yu u.
Shanhte gaw dai yang e kataw nna n lu rawt nga ma ai.