SHAKAWN KUNGDAWN 35
Madu e, ngai hpe ninghkap ai ni hpe ninghkap kau u;
ngai hpe gasat ai ni hpe mung, gasat kau u.
Na a ninggang hte hpri palawng la nna,
ngai hpe mawai la na, du rit.
Na a nri hte majan nwa ni hpe sharawt nna
ngai hpe hkan shachyut ai ni hpe ninghkap u.
nang gaw ngai hpe hkye hkrang la na nngai, ngu nna ga sadi jaw e.
 
Ngai hpe sat na matu shakut ai ni gaw sum mat nna
jahpoi jahpyak kau ai hkrum nga mu ga!
Ngai hpe ninghkap na maw mawn ai ni mung
shingdu de nhtang kau dat nna shanut kau ai hkrum mu ga!
Dai Madu a lamu kasa gaw shanhte hpe hkan shachyut nga yang;
shanhte gaw nbung e shapoi kau ai numhkaw zawn rai mat mu ga!
Dai Madu a lamu kasa gaw shanhte hpe adup kadawng yang,
shanhte a hkawm sa ai hkrun lam gaw sin mak mat ai hte manen mat mu ga!
 
Hpa mung n ra ra re ai kaw, shanhte gaw nye a matu mahkam hkam da ma ai,
ngai hpe rim bang na matu sung ai nhkun langai mi htu da nga ma ai.
Rai ti mung, shanhte gaw n dum shami naw rai nga yang, hten byak ai hkrum na mara ai;
shanhte hkam da ai mahkam hta shanhte nan lu nna,
hten byak ai hkrum na mara ai!
 
Shaloi, dai Madu a majaw ngai kabu gara ai hkrum na nngai;
shi ngai hpe hkye hkrang la ni ai majaw ngai kabu gara ai hkrum na nngai.
10 ?Nang hte bung ai wa langai mi mung n nga nga ai,
nang gaw n-gun ja ai wa a lata kaw na gawng kya nga ai wa hpe,
dip gamyet sha ai wa a lata kaw na matsan mayan wa hpe makawp maga ya nga ndai,?
ngu nna nye a myit masin mahkra hte dai Madu hpe tsun dan na nngai.
 
11 N hkru n shawp ai masha ni gaw ngai hpe nhtan shai ai hku sakse hkam ya nna;
ngai hpa mung n chye lawm ai ru hka amu ni hte ngai hpe mara shagun ma ai.
12 Shanhte gaw kaja ai amu a matu, n hkru ai hte ngai hpe bai nhtang tai ma ai;
ngai myit htum nga nngai.
13 Rai ti mung, shanhte machyi hkrum nga ma ai shaloi, sharung shayawt ai hku nna, lachyit nba bu hpun let;
lusha gam nna nye a hkum hpe shagrit kau nhtawm
jinghku wa shing n rai hpu nau langai ngai a matu akyu hpyi myit dum ya ai zawn,
nye a baw gum dagup ai hte ngai akyu hpyi ni ai.
14 Kanu a majaw, sharung shayawt hkrum ai wa zawn,
ngai gaw nshang htingkung hkra yawn hkyen hkawm nga nngai.
15 Rai ti mung, ngai ru yak tsin-yam hkrum nga ai shaloi, shanhte yawng kabu gara nga ma ai;
ngai hpe jawm shinggrup da nna asawng asang di mi ai.
Tsasam masha ni ngai hpe gayat ai hte
ngai hpe n sim n sa kahpret nga ma ai.
16 Chyahten labye wa hpe jahpoi asawng ai masha ni zawn,
shanhte ngai hpe n ju n dawng ai myi hte yu azi da mi ai.
 
17 Madu e, galoi du hkra, nang a yu nga na ngu n ta?
Shanhte a gasat gala ai kaw na ngai hpe mawai la e.
Ndai hkanghkyi ni kaw nna, nye a asak hpe hkye la e law!
18 Dai shaloi, na a amyu masha ni a shawa hpawng hta ngai nang hpe chyeju dum na nngai;
shanhte yawng a man e, ngai nang hpe shakawn nga na nngai.
 
19 Masu magaw ai nye a gumlau hpyen ni gaw ngai hpe dang kau lu ma ai majaw
gumrawng ai lam hkum byin shangun et!
Lachyum n pru ai sha, ngai hpe n ju n dawng ai ni,
ngai yawn hkyen hkrum ai hpe mu nna, hkrum sha sahka, nga nna hkum kabu shangun et! Ref 35:19: Shk 69:4; Yhn 15:25.
 
20 Shanhte gaw hku hku hkau hkau rai n shaga ma ai;
shing rai tsun na malai, shanhte gaw ngwi pyaw sim sa lam tam ai ni hpe,
masu magaw lam amyu myu hte shatan nhkan di ma ai.
21 ?Nang hpa galaw da sai lam hpe anhte mu sagaw ai,?
nga nna jahtau tsun let; shanhte ngai hpe mara shagun da nga ma ai.
22 Rai ti mung, Madu e, nang gaw dai lam ni hpe mu nit dai majaw,
Madu e, atsin sha hkum nga nga et,
ngai hte ani sha nga nga u law!
23 Madu e, na a myit hpe shajin u; Ngai hpe makawp maga la e;
Nye a Karai Kasang e, rawt nna nye a maga de tsap nhtawm nye a amu hpe dangrang ya e.
24 Madu e, nang gaw ding hpring ai wa rai nga ndai majaw ngai hpe mara n kap ai wa re ngu nna tsun ndau ya e;
nye a gumlau hpyen ni hpe nye a jaw e, awng padang hte hkum kabu shangun et.
25 ?Shi hpe anhte jahten kau lu sagaw ai!
Dai gaw anhte myit ra ai lam nan rai sai,?
nga nna shanhte hpe shada da hkum tsun hkat lu shangun et.
 
26 Nye a nni nkri hpe yu kabu nga ai ni,
tsep kawp sum mat ai hte shanut kau ai hkrum nga mu ga.
Ngai hta grau ai ni re ngu nna tsun ai ni gaw,
kaya kahpa hte myi man sum ai hkrum sha mu ga.
 
27 Ngai hpe mara n kap ai wa ngu nna mu mada mayu ai ni gaw kabu gara nga ai;
?Madu gaw kade galu kaba nga a hka!
Shi gaw shi a shangun ma wa a awng dang ai lam hta sharawng awng nga ai,?
nga nna shanhte kahtap kala jahtau tsun nga mu ga.
28 Shaloi, na a ding man ai lam hpe ngai tsun shana ya na nngai;
ngai mung nang hpe shani tup shakawn nga na nngai law.