SHAKAWN KUNGDAWN 33
Ding hpring ai ni yawng hte e, Madu galaw dan sai amu a majaw, kabu gara marawn jahtau nga mu;
shi a ga madat mara ai ni yawng hte e, shi hpe shakawn mu.
Dai Madu hpe tingse ni hte dum shakawn mu,
sumri rawng ai madum sumpyi ni hte shi hpe shakawn mu.
Mahkawn ga nnan hte shi hpe mahkawn mu,
madat pyaw hkra tingse dum nna, kabu gara marawn jahtau nga mu!
 
Dai Madu a mungga ni gaw teng man nga ai,
shi a amu bungli ni yawng kam mai nga lu ai.
Madu gaw ding man ai hte teng man ai hpe tsaw ra nga ai;
shi a dinggrin tsaw ra myit gaw aga ting hta hpring nga ai.
 
Madu gaw shi a hkang da ai mungga hte sumsing lamu ni hpe hpan da nu ai;
jan, shata hte shagan ni mung, shi tsun dat ai mungga hte byin wa sai.
Shi gaw hka panglai ni yawng hpe shara langai mi hta sumpum gumdin da nga ai;
sung ai nammukdara hka ni hpe dum ni hta la shingdang da nu ai.
 
Ginding aga yawng hte e, dai Madu hpe nawku mu!
Mungkan ga na mashani yawng hte e, shi hpe shagrau sha-a mu!
Shi ga shaga dat ai shaloi, mungkan ga byin pru wa sai;
shi a hkang da ai mungga a jaw e, arai yawng mayawng dan pru wa sai.
 
10 Dai Madu gaw masha amyu baw ni a shatawng shada ai lam ni hpe shanut kau ya nga ai;
shanhte a maw mawn ai lam ni n awng dang u ga, shi shanhte hpe hkum shingdang da nga ai.
11 Rai ti mung, shi a yaw shada ai lam ni gaw htani htana agrin nga ai;
shatawng shada ai lam ni mung prat dingsa anga nga ai.
12 Dai Madu hpe shanhte a Karai Kasang shatai ai amyu baw gaw a nga ai;
shi e lata la hkrum ai amyu masha ni gaw a lu nga ai!
 
13 Dai Madu gaw sumsing lamu kaw nna gum yu nga ai hte
shinggyim masha nlang hte hpe mu nga ai.
14 Shi up hkang nga ai shara kaw nna,
ga ningtsa e nga ai masha nlang ni hpe shi gum yu nga ai.
15 Dai Madu gaw shanhte a myit mang ai lam yawng mayawng hte hpe hkrang shapraw ya nga ai;
shanhte galaw ai lam yawng mayawng hte hpe mung chye ya nga ai.
 
16 Shi a n-gun rawng ai hpyen luksuk a majaw hkawhkam wa majan dang ai n rai;
hpyen ma langai mi gaw shi a n-gun a majaw awng padang lu ai n rai.
17 Majan gumra ni gaw awng padang a matu kaman lila rai nga ai;
dai ni a n-gun kaba hte hkye hkrang la lu nga ai n rai.
 
18 Dai Madu gaw shi hpe hkrit hkungga ai ni hte
shi a dinggrin tsaw ra myit hpe kam hpa nga ai ni hpe, sin yu nga ai.
19 Dai Madu gaw shanhte hpe si ai kaw na hkye hkrang la nga ai;
shi gaw shanhte hpe hku hku hpang gara ai aten hta asak hkrung nga lu na ahkang jaw ya nga ai.
 
20 Anhte gaw dai Madu hpe myit mada nga ga ai;
shi gaw anhte a makawp ninggang hte karum la ai wa rai nga ai.
21 Shi a majaw anhte kabu gara nga ga ai;
shi a chyoi pra ai mying nsang hta anhte kam ga ai.
 
22 Madu e, nang hpe anhte myit mada nga ga ai hte maren,
na a dinggrin tsaw ra myit gaw anhte hte rau anga nga u ga law.