SHAKAWN KUNGDAWN 31
1 Madu e, makawp maga la na matu, nang kaw ngai du sa nngai.
Ngai hpe galoi mung asum hkum hkrum shangun nga et.
Ngai hpe hkye hkrang la e, ngai hpyi nngai!
2 Ngai hpyi ai ga hpe na ya e! Ngai hpe ya jang hkye hkrang la e!
Ngai hpe makawp maga la na matu, nye a shingbyi shara tai nga u;
ngai hpe hkye hkrang la na matu, nye a makawp ninggang tai nga u.
3 Nang gaw nye a shingbyi shara hte dahpran shara rai nga ndai;
nang ga sadi tawn da nit dai hte maren, ngai hpe woi awn lam madun la e.
4 Nye a matu galaw da sai mahkam kaw na ngai hpe shalawt la e law;
hkrithpa shara kaw na mung, ngai hpe makawp maga la e.
5 Na a lanu lahku ai chyeju hta nye hkum ngai ap ya de ai.
Madu e, nang ngai hpe hkye hkrang la na rai nga ndai,
nang gaw sadi sahka re ai Karai Kasang rai nga ndai.Ref 31:5: Luk 23:46.
6 N teng n man ai karai ni hpe nawku ai ni hpe nang n dawng nga ndai;
rai ti mung, ngai gaw nang hpe kam hpa nngai.
7 Na a dinggrin tsaw ra myit a majaw
ngai myit pyaw let kabu gara nga na nngai.
Nye a nni nkri hpe nang mu ya nga nna,
nye a tsin-yam tsindam hpe nang chye ya nga ndai.
8 Nye gumlau hpyen ni ngai hpe rim la na, nang ap ya nga ndai n rai;
ngai sa mayu ai shara de ndut ndang hkawm sa lu na lam, nang lajang ya nga ndai.
9 Madu e, ngai ru yak tsin-yam hkrum nga nngai majaw,
ngai hpe matsan dum la e;
nau hkrap kau ai majaw nye a myi ni bum nga li ai,
ngai gaw kaja wa dik hkra hki ba mat ni ai.
10 Yawn hkyen lam a majaw ngai n-gun kya gumba mat nga nngai;
hkrap sharung ai gaw nye a asak hpe kadun kau shangun nga sai.
Nye a ru tsang ai lam yawng a majaw, ngai hta n-gun lagaw yawm nga nngai rai nna,
nye a nrut nra ni du hkra tsam mat nga li ai.
11 Nye a gumlau hpyen ni yawng hta, grau nna nye a htingbu ni ngai hpe n kaw n law di
mi ai;
ngai hpe chye ai ni mung, ngai hpe hkrit nna,
shanhte gaw ngai hpe lam nmaw e mu mada ma ai shaloi;
shanhte hprawng kagat mat wa ma ai.
12 Ngai hpe si mat sai wa zawn, kadai mung malap kau masai;
kabai kau ai shanut shanaw hte maren rai mat ni ai.
13 Gumlau hpyen law law ni tsun gahte ai ga hpe ngai na nngai;
hkrit kajawng hpa lam yawng gaw ngai hpe wang shinggrup da mi ai.
Shanhte ngai hpe gumlang na lam jawm bawngban nna,
ngai hpe sat kau na matu, maw mawn nga ma ai.
14 Rai ti mung, O Madu e, nye a kam hpa ai gaw nang hta nga nga li ai;
Nang gaw nye a Karai Kasang rai nga ndai.
15 Ngai gaw tut nawng e, na a lata hta rai nga nngai,
ngai hpe zingri zingrat nga ai ni hte
nye a gumlau hpyen ni a lata kaw na ngai hpe hkye hkrang la e.
16 Na a shangun ma a ntsa e, matsan dum ai myit hte mada mara ya e;
na a dinggrin tsaw ra myit hte ngai hpe hkye hkrang la e.
17 Madu e, nang hpe ngai shaga nngai rai nna;
ngai hpe kaya kahpa hkum jahkrum et.
Tara n lang ai ni gaw kaya kahpa hkrum nga mu ga,
katsan ga de atsin sha shanhte yu mat wa mu ga.
18 Masu magaw ai ni, gumrawng gumtawng ai hte myit tsaw myit dap rawng nga nna,
ding hpring ai masha ni a lam hpe n kaw n law nga nna tsun ai ni yawng hte hpe
jasim kau u.
19 Nang hpe shagrau sha-a ai ni a matu nang kyem da ya ai
kaja ai chyeju ni gaw kade wa mauhpa rai nga a hka!
Nang kade wa mai kaja nga ai hpe mung
nang hta kam hpa nga ai ni hpe kade sha shim ai hku nang makawp maga ya nga ndai hpe mung masha shagu chye nga ai.
20 Masha ni a maw mawn ai kaw na nang shanhte hpe
na a man na shim lum ai shara hta makoi da nna;
shanhte a gumlau hpyen ni roi rip ai kaw nna mung
shim ai shara hta nang shanhte hpe makoi da nga ndai,
21 Dai Madu hpe shakawn kungdawn mu!
Ngai gaw wang da ai hkrum nna gasat hkrum nga ai shaloi,
ngai hpe shi a tsaw ra myit madun dan ai gaw kade wa mauhpa rai nga a hka!
22 Shi gaw ngai hpe shi a man kaw na gawt shapraw kau hkrum sai zawn nawn nna,
ngai myit yu ai hte hkrit kau ni ai.
Rai ti mung, karum la na matu shi hpe ngai shaga yang,
nye a hpyi jahtau ai nsen hpe shi na ya sai.
23 Shi a kangka ai amyu masha ni yawng hte e, dai Madu hpe tsaw ra nga mu.
Dai Madu gaw kangka ai ni hpe makawp maga nga ti mung,
gumrawng gumtawng ai ni hpe chyawm gaw shanhte hkam la ging ai hte maren ari
jaw ya nga ai.
24 Madu hta myit mada nga ai ni yawng hte e,
n-gun shaja nna, nden marai rawng nga mu.