SHAKAWN KUNGDAWN 25
O Madu e, nye a akyu hpyi ai ga hte nang hpe nawng jau nga nngai;
nye a Karai Kasang e, nang hpe ngai kam hpa nga nngai.
Kaya kahpa sum mat ai kaw na ngai hpe hkye hkrang la e;
nye a gumlau hpyen ni hpe awng padang hte hkum kabu shangun nga et!
Nang hpe kam hpa ai ni hta sum ai lam n hkrum nga ai;
nang hpe gumlang ai ni a ntsa e chyawm gaw tin tin du nga ai.
 
O Madu e, na a lam ni, ngai hpe sharin ya e,
dai lam ni, ngai hpe chye shangun e.
Na a teng man ai lam hte maren, asak hkrung nga lu na matu ngai hpe sharin ya e,
nang gaw nye a Karai Kasang rai nga nna ngai hpe hkye hkrang la ai wa rai nga ndai majaw,
ngai nang hta tut nawng kam hpa nga nngai.
 
O Madu e, chyaloi nhkoi kaw nna nang madun dan nga sai
na a matsan dum ai myit hte dinggrin tsaw ra myit hpe adum nga u.
Nye a ram prat na shut hpyit ai lam ni hte yubak mara ni hpe, raw dat kau ya e.
Madu e, na a dinggrin tsaw ra ai myit hte
mai kaja ai myit hta ngai hpe adum nga e law!
 
Madu gaw ding hpring ai hte mai kaja ai wa rai nga ai majaw,
yubak kap ai ni hpe shanhte hkan sa ra ai lam, shi sharin ya nga ai.
Teng man ai lam hta shagrit shanem ai ni hpe shi woi lakawn wa nna;
shi a myit ra ai lam shanhte hpe sharin ya nga ai.
10 Shi a ga shaka hpe kyem da nna, shi a hkang da ai ga yawng hte hpe madat mara ai ni hpe,
sadi sahka ai myit hte tsaw ra myit hte shi lam woi nga ai.
 
11 Madu e, na a ga sadi hpe shadik shatup nga u, nye a yubak ni hpe mung raw dat kau ya e;
kaning rai nme law, dai hte gaw law la nga ai.
12 Madu hpe madat mara ai ni gaw
shanhte hkan sa ra ai lam ni hpe shi kaw nna sharin la na mara ai.
13 Shanhte gaw tut nawng e ngamu ngamai wa nna
shanhte a kashu kasha ni mung dai lamu ga hpe madu lu na mara ai.
14 Dai Madu gaw shi a ga madat mara nga ai ni a jinghku rai nga nna
shi a ga shaka shanhte hte shagrin da nga ai.
 
15 Karum la na matu, Madu hpe ngai aten shagu mada nga ai rai nna,
shi ngai hpe hkrithpa shara kaw nna mawai la nga ai.
16 Madu e, ngai gaw garen gari hkrum nga nngai hte n-gun kya nga nngai majaw;
ngai hpe mada mara ya nna, matsan dum la e law.
17 Nye a myit ru myit tsang ai lam ni hpe hkyamsa jaw ya e,
ru tsang lam yawng mayawng kaw na ngai hpe hkye hkrang la e law.
18 Nye a myit ru myit tsang lam hte nni nkri lam ni hpe myit sawn ya e,
nye a yubak ni yawng hte hpe mung dat kau ya e.
 
19 Ngai hta gumlau hpyen ni kade law nga ai hpe mu ya e;
shanhte ngai hpe kade wa n dawng nga ma ai hpe mung chye ya e.
20 Ngai hpe makawp maga ai hte hkye hkrang la e;
ngai hpe hkum sum shangun nga et.
Shim lum nga na matu, nang kaw ngai sa du nngai.
21 Nang hpe ngai kam hpa nga nngai majaw, nye a mai kaja ai hte
myit malang ai gaw ngai hpe bau sin nga u ga.
 
22 O Karai Kasang e, na a amyu Israela masha ni hpe
shanhte a ru tsang ai lam yawng kaw nna hkye hkrang la u law!