SHAKAWN KUNGDAWN 18
(2 Samuela 22:1-51)
1 Madu e, nang hpe ngai kade wa tsaw ra nga a hka!
Nang gaw ngai hpe makawp maga ai wa rai nga ndai.
2 Dai Madu gaw ngai hpe makawp maga ai wa rai nna;
nye a ngang kang ai hpyen dap shi rai nga ai.
Nye a Karai Kasang gaw ngai hpe makawp maga ai wa rai nna,
shi hta ngai shim lum nga nngai.
Shi gaw ngai hpe ninggang langai mi zawn makawp maga nna,
ngai hpe makawp maga ai hte shim hkra bau sin nga ai.
3 Ngai gaw Madu hpe shaga ai hte,
shi gaw ngai hpe nye a gumlau hpyen ni a lata kaw na hkye hkrang la nga ai.
Madu gaw hpung rawng nga u ga law!
4 Si hkrung si htan a hkrithpa gaw ngai hpe gawan da nna;
jahten sharun ai a hka leng gumdin ni nye a ntsa e, taleng nga sai.
5 Si hkrung si htan a hkrithpa gaw ngai hpe gawan da mi ai;
lup sung hku gaw nye a matu mahkam hkam da nu ai.
6 Nye a ru tsang ai hta, ngai gaw Madu hpe shaga nna;
karum la na matu, nye a Karai Kasang hpe ngai shaga we ai.
Shi a Htingnu hta, nye a nsen hpe shi na ya nna;
karum la na matu, ngai hpyi jahtau ai nsen hpe shi madat ya ni ai.
7 Shing rai, Karai Kasang gaw pawt sindawng ai a majaw,
ginding aga gaw gari awam wa nna,
bum ni a npawt nhpang ni mung shamu shamawt nga ai.
8 Shi a ladi hku ni kaw nna wan hkut ni pru wa nhtawm,
shi a n-gup kaw nna grung ai wan shinglet hte hkru nga ai wan n-ga ni hte pru wa
nga ai.
9 Shi gaw lamu hpe gang je nna yu wa ai hte
shi a lagaw npu e, sin mak ai sumwi hte yu wa nu ai.
10 Shi gaw singkaw tu ai hkrung kanu a ntsa e jawn nna tin tin pyen sa nga ai;
nbung a singkaw ntsa hta e, shi pyen hkawm nga ai.
11 Shi gaw shi a hkum hpe nsin hte ka-up da nna;
htat ai sumwi ni hte hka kaba ni shi hpe gawan shinggrup da nga ai.
12 Shi a man e nga ai myi hprap kaw na
sin tawng hte wan shinglet ni gaw sin htat nga ai
sumwi ni hpe ga dinghkren kau nga ai.
13 Shaloi, Madu gaw lamu de na mu hpe shangoi dat nga ai;
Tsaw Htum ai Wa a nsen hpe na lu nga ai.
14 Shi gaw shi a pala ni hpe gap dat nna, shi a gumlau hpyen ni hpe shabra kau
nga ai;
myi hprap ni hpe shanhte hpang de dat dat nna jahprawng kau mu ai.
15 Madu e, nang gaw na a gumlau hpyen ni hpe daru kau let,
masin kahtet ai hte shanhte hpe marawn shabam dat yang,
panglai htumpa a htingnyep ni dawng pru wa nna,
lamu ga a npawt nhpang ni hpaw malang wa nga ai.
16 Madu gaw matsaw ntsa kaw na ngai hpe sai la nu ai;
shi gaw ngai hpe sung ai hka kata kaw nna gang shaw la nu ai.
17 N-gun rawng ai nye a gumlau hpyen ni hte,
ngai hpe n dawng nga ai ni yawng a lata kaw na shi ngai hpe mawai la nu ai.
Shanhte gaw nye a matu nau wa n-gun rawng nga ma ai.
18 Ngai ru tsang hkrum ai shaloi, ngai hpe gasat ma ai, rai ti mung
Madu ngai hpe makawp maga da nga ai.
19 Shi gaw ngai hpe hkrithpa shara kaw nna karum la nga sai;
shi ngai hta awng nga ai majaw, ngai hpe hkye hkrang la nga sai.
20 Ding man ai amu hpe ngai galaw ai majaw,
ngai gaw mara n kap ai wa rai nga nngai majaw, shi ngai hpe shaman ya nga ai.
21 Madu a tara hpe, ngai hkan nang ni ai,
nye a Karai Kasang kaw nna tsan tsan de, ngai kayin mat wa ni ai n rai.
22 Shi a tara yawng hte hpe ngai hkan sa ni ai;
shi a hkang da ai tara ni hpe ngai n madat kau ai n rai.
23 Ngai mara n kap nga nngai gaw shi chye nga ai;
shut hpyit amu galaw ai kaw nna ngai koi kau ni ai.
24 Shing rai ngai gaw ding man ai amu hpe galaw nngai majaw;
shi ngai hpe shagrau sha-a nga ai, ngai mara n kap ai wa rai nga nngai gaw,
shi chye nga ai.
25 Madu e, nang hta sadi dung nga ai ni a ntsa e, nang mung sadi dung
nga ndai;
kup tsup ai ni hpe ra n rawng ai chyeju galaw nga ndai.
26 Myit san seng ai ni hpe chyoi pra ai myit nang madun dan nga ndai,
tara n lang ai ni hpe chyawm gaw ninghkap ai myit nang madun dan nga ndai.
27 Shagrit shanem ai myit rawng ai ni hpe nang hkye hkrang la nga ndai; rai ti mung
gumrawng gumtawng myit rawng ai ni hpe nang shagrit kau nga ndai.
28 Madu e, nang ngai hpe nhtoi jaw ya ndai;
nye a nsin hpe mung, nang jahkoi kau ya nga ndai.
29 Nang nye a gumlau hpyen ni hpe gasat na matu, ngai hpe n-gun atsam jaw ya nga ai;
shanhte a dap ni hpe dang kau na, daru magam n-gun mung jaw ya nga ndai.
30 Ndai Karai Kasang shi a amu bungli ni kade wa hkum tsup nga a hka!
Shi a tsun shaga ai ga ni, kade wa kam mai nga a hka!
Shi gaw shi a makawp maga ai hpe hkan tam ai ni yawng a ninggang zawn rai nga ai.
31 Dai Madu shi chyu sha Karai Kasang rai nga ai;
Karai Kasang chyu sha anhte a dahpran shara rai nga ai.
32 Shi gaw ngai hpe n-gun shaja ya ai hte
nye a hkrun lam hpe shim lum shangun ai Karai Kasang rai nga ai.
33 Shan nga lagaw gaw ngang ai zawn, shi gaw ngai hpe shangang ya nna;
bum ni a ntsa e, ngai hpe shi bau sin makawp maga ya nga ai.
34 Shi ngai hpe majan a matu hpyen hpaji sharin ya ai;
shing rai, ngai gaw ja dik ai ndan hpe lang lu nga nngai.
35 Madu e, nang gaw ngai hpe makawp maga ai hte hkye hkrang la nga ndai;
na a n-gaw nwai ai myit gaw ngai hpe galu kaba shangun nga ai,
na a daru magam n-gun gaw ngai hpe shim lum shangun nga ai.
36 Rim hkrum hkyen ai kaw na, nang ngai hpe bau sin la ni ai,
ngai galoi mung n kadawng yu nngai.
37 Ngai gaw nye a gumlau hpyen ni hpe hkan shachyut nna, shanhte hpe rim da nngai:
shanhte hpe ngai shamyit kau ai aten du hkra, ngai hkring nga ai n rai.
38 Ngai shanhte hpe adup kadawng dat ai hte shanhte n rawt lu ma ai;
shing rai shanhte gaw nye a man e, sum mat ma ai.
39 Nang ngai hpe majan a matu n-gun jaw ya nga ndai;
nye a gumlau hpyen ni a ntsa e, awng padang lu shangun nga ndai.
40 Nang gaw nye a gumlau hpyen ni hpe ngai kaw nna jahprawng kau shangun ya ndai;
ngai gaw ngai hpe n dawng ai ni hpe shamyit kau nngai.
41 Karum la na matu, shanhte jahtau ma ti mung, shanhte hpe kadai mung n hkye la nga ai;
shanhte gaw Madu hpe shaga ti mung, shi htan ya nga ai n rai.
42 Ngai gaw shanhte hpe adup mani kau mawe ai,
shing rai, shanhte gaw nbung e shapoi kau ai ga nhpu zawn tai mat ma ai.
Nmaw lam ni a ntsa e taw ai hkumpup ni hpe zawn,
ngai shanhte a ntsa e, kabye anut nga nngai.
43 Nang gaw ngai hpe gumlau masha ni a lata kaw nna hkrang shaw la nit dai,
amyu baw ni a ntsa e, up hkang ai wa, nang ngai hpe shatai nit dai;
Ya chyawm gaw, ngai n chye ai amyu masha ni nye a mungdan masha ni tai wa nga masai.
44 Maigan masha ni nye a man e, dingnyawm nga ma ai;
ngai tsun ai ga hpe na ma yang shanhte madat mara ma ai.
45 Shanhte gaw shanhte a share shagan myit nden mat mat nna;
shanhte a hpyen dap kata ni kaw na, hkrit gari let pru wa ma ai.
46 Dai Madu gaw ahkrung nga ai law! Ngai hpe makawp maga ai wa gaw a lu u ga law!
Ngai hpe hkye hkrang la ai Karai Kasang gaw galu kaba nga ai hpe htawn tsun mu.
47 Shi gaw nye a gumlau hpyen ni a ntsa e, dang lu na awng padang ngai hpe jaw ya nga ai;
nye a npu e, amyu baw ni hpe shi ap ya ni ai
48 hte nye a hpyen ni a lata kaw na, ngai hpe hkye hkrang la nga ai.
Madu e, nye a gumlau hpyen ni a ntsa e, ngai hpe awng padang jaw ya nit
dai hte
kashun kashe du daw sai hkaw shangun ai masha ni a lata kaw na nang ngai hpe
makawp maga la nga ndai.
49 Shing rai, ngai gaw nang hpe amyu baw ni a ka-ang e, shakawn nngai;
ngai nang hpe mahkawn shakawn nga nngai.
50 Karai Kasang shi a hkawhkam wa hpe kaba la ai awng padang jaw ya e;
lata san da sai Dawi hte shi a aru arat ni hpe
dinggrin tsaw ra myit htani htana madun dan nga ai.