SHAKAWN KUNGDAWN 149
Dai Madu hpe shakawn mu!
 
Dai Madu hpe mahkawn ga nnan hte mahkawn mu;
shi a kangka ai amyu masha ni a hpawng hta, shi hpe shakawn mu!
Israela amyu masha ni e, nanhte a Hpan
Ziun a amyu masha ni e, nanhte a hkawhkam wa a majaw kabu gumrawng nga mu!
Shi a mying nsang hpe ka manawt let shakawn mu;
chying bau ni hte tingse ni hpe dum nna shi hpe shakawn mu.
 
Dai Madu gaw shi a amyu masha ni hta awng sharawng nga nna;
shagrit shanem ai ni hpe awng padang hte shi shagrau sha-a nga ai.
Karai Kasang a amyu masha ni gaw shanhte a awng padang lam hta kabu gara lu mu ga;
kabu gara ai hte shana tup, shanhte mahkawn mangoi nga mu ga.
6-7 Masha amyu baw ni hpe awng dang kau na matu hte
amyu masha ni hpe ari jaw na matu mung,
8-9 shanhte a hkawhkam ni hte mung du, salang ni hpe hpri sumri ni hte gyit nna,
Karai Kasang a mungga hte maren, amyu baw ni hpe ari jaw na matu mung,
Karai Kasang a amyu masha ni gaw shanhte a lata hta dai ai nhtu ni hpe lang da nna,
nsen kaba hte jahtau let, Karai Kasang hpe shanhte shakawn mu ga.
Ndai gaw Karai Kasang a amyu masha ni a awng padang lam rai nga ai.
 
Dai Madu hpe shakawn mu!