SHAKAWN KUNGDAWN 144
1 Ngai hpe makawp maga nga ai Madu hpe shakawn kungdawn mu!
Shi gaw ngai hpe majan a matu zai ladat hpaji sharin ya ai hte
ngai hpe lajang shachyip ya nga ai.
2 Shi gaw ngai hpe makawp maga ya ai wa, nye a shamyet shanat shara wahpang;
ngai hpe hkye hkrang la ai nye a dahpran shara,
hte shim lum na matu, ngai kam hpa nga ai wa rai nga ai.
Amyu baw ni hpe shi nye a npu e tawn da nu ai.
3 Madu e, shinggyim masha gaw hpa wa mi rai nna, nang shi hpe mada
yu nga n ni?
Shinggyim masha sha hpe nang hpa majaw ahkyak wa zawn nawn nga n ni?
Ref 144:3: Yob 7:17-18; Shk 8:4.
4 Shinggyim masha gaw nsa sa lai nbung hte bung nga ai,
shi a nhtoi ni lai mat wa ai shingna zawn rai nga ai.
5 Madu e, lamu hpe gang je hpaw nna yu hkrat wa rit;
bum ni hpe ahtawk hkra ai hte dai ni wan hkut shapraw ya na ra ai.
6 Myihprap galam dat nna, na a gumlau hpyen ni hpe shabra kau u;
na a pala ni hpe gap dat nna shanhte hpe jahprawng kau u.
7 Tsaw htum ai shara kaw nna, na a lata hpe ladawn ai hte
sung ai hka kata kaw nna, ngai hpe gang shaw la ai hte mawai la e;
tsasam masha ni a n-gun kata kaw nna ngai hpe hkye hkrang la e.
8 Shanhte gaw teng man ai ga hpe, galoi mung n tsun nga ma ai;
teng man ai ga tsun na matu, dagam ga hte ga shaka tawn sai rai ti mung,
shanhte naw masu nga ma ai.
9 Karai Kasang e, mahkawn ga nnan hte nang hpe ngai mahkawn mangoi na nngai;
tingse dum let nang hpe ngai mahkawn mangoi na nngai.
10 Nang gaw hkawhkam ni hpe awng padang jaw ya nga ndai hte;
na a shangun ma wa Dawi hpe mawai la nit dai.
11 Gumshem ai nye a gumlau hpyen ni a lata kaw nna ngai hpe hkye hkrang la e;
tsasam masha ni a n-gun atsam kata kaw nna mung ngai hpe hkye hkrang la e;
shanhte gaw teng man ai ga hpe galoi mung n tsun nga ma ai hte
dagam ga hte ga shaka la tim pyi shanhte masu ai ga ni hpe naw tsun
nga ma ai.
12 Anhte a shadang sha ni gaw shanhte a brang ram prat hta,
hpun lawn kasha ni tu kaba wa ai zawn;
anhte a shayi sha ni mung, Nawku Htingnu jut ni hpe
mawn sumli da ai nlung shadaw ni zawn, rai nga mu ga.
13 Anhte a mam dum ni hta nsi naisi hkum dingnum hte hpring nga u ga;
udat pa layang hkan e nga ai sagu ni hta mung,
kasha hkying hkying mun mun law htam wa mu ga.
14 Anhte a dumsu yam nga ni hta nbya n nga, daw hten mat ai mung n hkran ai sha,
law htam mayat maya wa mu ga.
Anhte a mare ni hta myit ru myit htum ai a majaw jahtau marawn ai nsen ni
mung n nga u ga.
15 Ndai zawn teng man ai hte nga lu ai amyu gaw a nga ai;
Madu hpe Karai Kasang hku nna hkap la kam sham ai amyu gaw a nga ai law!