SHAKAWN KUNGDAWN 142
1 Karum la na matu, Madu hpe ngai shaga nngai;
shi hta e, ngai hpyi nem nga nngai.
2 Nye a aru ara lam mahkra hte hpe shi hpang de, ngai la sa nngai;
nye a ru tsang lam yawng hte hpe mung, shi hpe ngai tsun dan nngai.
3 Ngai gaw myit daw hten nna, asum jaw kau na matu jin jin rai nga ai shaloi,
ngai hpa galaw ang ai lam hpe shi chye ya nga ai.
Ngai hkawm sa wa ai lam hta
nye a gumlau hpyen ni nye a matu mahkam up da ma ai.
4 Nye a makau mayang hkan e, ngai yu dat ai shaloi,
ngai hpe karum la na masha kadai hpe mung ngai n mu nngai;
ngai hpe makawp maga la na masha kadai mung n nga ai.
Ngai hpe lanu lahku la na, kadai n nga nga ai.
5 Madu e, karum la na matu, ngai nang hpe jahtau nga nngai;
Madu e, nang gaw ngai hpe makawp maga ai wa rai nga ndai;
ndai asak hkrun lam hta, ngai ra ai lam yawng mayawng mung nang rai nga ndai.
6 Ngai myit chyum myit htum hkrum hkra nga nngai majaw,
karum la na matu, nye a hpyi jahtau ai nsen hpe madat ya e.
nye a gumlau hpyen ni ngai hta nau wa n-gun ja nga ma ai majaw,
shanhte a lata kaw nna, ngai hpe hkye hkrang la e law.
7 Myit ru myit yak hkrum nga ai kaw nna ngai hpe shalawt la e;
shaloi, na a mai kaja ai lam ni a majaw na a amyu masha ni a hpawng hta,
nang hpe ngai shakawn kungdawn nga na nngai law.