SHAKAWN KUNGDAWN 12
Madu e, anhte hpe karum la mi!
Mai kaja ai masha langai mung n nga sai;
ding man ai masha ni hpe mung loi mi pyi n mu lu mat sai.
Shanhte yawng hte gaw shada da masu ga tsun ma ai;
shanhte gaw shada da abawk ai ga hte hkalem nga ma ai.
 
3-4 Madu e, abawk ai ga tsun ai shinglet ni hpe shazim kau u!
?Anhte a n-gup ga ni hte anhte ra ai lam lu la ga ai,
anhte hpa ra sharawng ai lam hpe tsun dan na ga ai hte langai mi mung anhte hpe jahkring da lu na n rai,?
nga nna shakawng ai ga tsun ai n-gup ni hpe pat kau ya u.
 
?Rai ti mung, ra kadawn ai ni gaw dip gamyet sha hkrum nga ma ai hte,
zingri zingrat hkrum ai ni machyi madai sharung nga ma ai majaw,
shanhte marit nga ai shim lam, ngai shanhte hpe jaw ya na matu,
ya jang, ngai sa wa na nngai,? nga nna Madu tsun ai.
 
Dai Madu a ga sadi ni gaw kam mai nga ai;
dai ni gaw wan htung hta sanit lang
shabyawng jen kau sai gumhpraw jet zawn rai nga ai.
 
7-8 Tara n lang ai masha ni gaw shara shagu hkan nga nga ma ai;
n hkru ai lam hpe kadai mung sharawng awlaw nga ma ai.
Madu e, anhte hpe tut nawng e, shim nga lu na matu bau sin ya mi,
ndai zawn re ai masha ni a lata kaw nna anhte hpe kyem mazing da mi law.