SHAKAWN KUNGDAWN 103
Nye a wenyi e, dai Madu hpe shakawn u!
Nye a hkum hkrang, myit masin mahkra hte e, shi a chyoi pra ai mying nsang hpe shakawn nga u!
Nye a wenyi e, Madu hpe shakawn u!
Shi a chyeju yawng hte hpe hkum malap kau nga et!
Shi gaw nye a yubak yawng hte hpe raw dat kau ya nga ai;
nye a ana ahkya yawng hte hpe mung, shi shamai shatsai ya nga ai.
Shi ngai hpe nsung hku hta na hkye hkrang la nga ai
shi a tsaw ra matsan dum ai myit hte shaman ya nga ai.
Shi gaw nye a prat hpe mai kaja ai hte shakat ya ai majaw,
ngai gaw galang zawn ram prat bai pra nna n-gun ja nga nngai.
 
Madu gaw dip gamyet sha hkrum nga ai ni hpang maga de, tara dara ya nga nna;
shanhte lu la ang ai ahkaw ahkang ni hpe jaw ya nga ai.
Shi gaw Mawshe hpe shi a yaw shada ai lam madun dan nu ai,
shi a mauhpa magam amu ni hpe Israela amyu masha ni hpe mu la shangun wu ai.
Dai Madu gaw matsan dum ai, tsaw ra ai,
myit galu kaba ai hte dinggrin tsaw ra myit hpring nga ai wa rai nga ai.Ref 103:8: Yak 5:11.
Shi tut nawng e, daru nga ai n rai,
shi htani htana apawt nga ai wa n rai.
10 Anhte hkam la ging ai mara hte maren, shi anhte hpe ari jaw mi ai n rai;
anhte a yubak ni hte shut hpyit ai mara ni hte maren, shi bai tai mi ai n rai.
11 Lamu gaw ginding aga hta tsaw nga ai hte maren,
shi hpe hkrit hkungga nga ai ni a ntsa e shi a tsaw ra myit mung, dai hte maren galu kaba nga ai.
12 Sinpraw gaw Sinna hte tsan gang nga ai zawn,
shi anhte a yubak ni hpe anhte kaw nna shatsan kau ya mi ai.
13 Kawa gaw kasha ni hpe matsan dum lama ai zawn,
Dai Madu gaw shi hpe shagrau sha-a ai ni hpe matsan dum nga ai.
14 Anhte hpe hpa hte galaw da nga ai hpe shi chye nga ai;
anhte ga nhpu ni rai nga ga ai hpe shi dum nga ai.
 
15 Anhte a asak prat chyawm gaw tsingdu zawn rai nga ai;
nam na nampan zawn, anhte tu kaba wa nna pu lagra nga ga ai.
16 Dai hpang, de a ntsa e, nbung bung ahpawt wa nna, dai gaw mat mat nga ai;
dai hpe kadai mung bai mu lu nga ai n rai.
17 Rai ti mung, Madu hpe shagrau sha-a nga ai ni a ntsa e,
shi a tsaw ra myit htani htana agrin nga ai,
18 shi a ga shaka hpe hkan nang nga ai ni hte
shi a hkang da ai ga ni hpe kangka ai hte madat mara hkan sa nga ai ni a ntsa e,
shi a mai kaja ai gaw hpang ban ni yawng a matu anga nga na ra ai.
 
19 Dai Madu gaw shi a tingnyang hpe sumsing lamu ntsa e, shadun da nna;
shi gaw yawng mayawng a ntsa na hkawhkam wa rai nga ai.
20 Chyahtum Chyalai n-gun hte hpring nga nna
shi tsun ai ga ni hpe madat mara nga ai lamu kasa ni e,
shi hpe shakawn kungdawn nga mu.
21 Shi ra sharawng ai hku amu galaw nga ai shi a shangun ma ni rai nga ai
sumsing lamu na daru magam n-gun hte hpring nga ai ni e, Madu hpe shakawn kungdawn nga mu!
22 Shi up hkang nga ai shara shagu hkan na, hpan hpajang da mada yawng hte e,
Madu hpe shakawn kungdawn nga mu!
Nye a wenyi e, Madu hpe shakawn u!