Ndai Shakawn Kungdawn Laika gaw Chyum Laika a mahkawn shakawn laika hte akyu hpyi ai laika buk rai nga ai. Ndai Laika hpe laika ka sara law law ni gaw aten na na a lapran e ka da sai hte dai shakawn kungdawn ga hte akyu hpyi ga ni hpe mahkawng shinggyin nhtawm Israela amyu masha ni a nawku daw jau ai hpawng ni hta lang na matu lahkawn shinggyin tawn ai laika rai nga ai. Jahtum e, dai zawn lahkawn shinggyin tawn ai laika gaw shanhte lang ai Chyum Laika hta shalawm la nga ai.

Ndai makam masham hte seng ai ga shagawp ni hta; Madu hpe mahkawn shakawn ai lam, Karai Kasang hpe nawku daw jau ai lam, karum la na lam, makawp maga la na hte hkye hkrang la na matu akyu hpyi ai ga ni; yubak mara raw dat ya na matu hpyi nem ai ga ni; Karai Kasang a shaman chyeju ni hpe chyeju dum mahkawn shakawn ai ga ni, hte gumlau hpyen ni hpe ari jaw ya na matu hpyi lajin ai ga ni rawng nga ai. Ndai laika hta rawng ai akyu hpyi ga ni gaw tinang hkum nan a matu hte amyu sha ni hte seng ai ga ni rai nna; nkau mi gaw tinang nan a myit masin kata hta hkam sha ai lam hpe ka shagawp nna kaga gaw Karai Kasang a amyu masha ni a ra marit nga ai lam hte hkam sha ai lam ni hpe kumla shapraw dan ai laika mung rai nga ai.

Yesu nan Shakawn Kungdawn Laika na ja chyum ga ni hpe lang ai zawn Ga Shaka Ningnan Laika ka sara ni mung dai chyum ga ni hpe shaw lang nga ma ai majaw, ndai Shakawn Kungdawn Laika gaw Hkristan Nawku Hpung a ningpawt nawku daw jau ai aten kaw nna jahpu shareng tawn ai laika buk tai wa sai.