1 Sha e, ngai nang hpe sharin shaga ai ga hta nang hpe ngai amu galaw shangun ai amu hpe galoi mung hkum malap kau nga et. 2 Hpaji rawng ai ga hpe madat mara nga nna, dai hpe chye na hkawn hkrang na matu, shakut u. 3 Rai sa, machye machyang hpaji hpe hpyi u, myit kraw hpaji hpe lajin la u. 4 Gumhpraw hte makoi da ai sut gan hpe nang ja ja hkan tam ai zawn, dai hpe sawk tam u. 5 Shing rai yang, dai gaw, ?Dai Madu hpe hkrit hkungga ai ngu ai lachyum hpe nang chye wa nna; Karai Kasang a lam sharin la ai lam hta nang awng dang wa na ndai. 6 Dai gaw hpaji byeng-ya hpe jaw ya ai Madu rai nga nna, machye machyang hpaji hte chye na hkawn hkrang ai nyan shi kaw na lu la nga ai. 7 Shi gaw ding man ai hte myit malang ai masha ni a matu, karum la ai hte makawp maga ai lam jaw ya nga ai. 8 Shi gaw kaga masha ni a ntsa e, tara rap ra ai hku kanawn mazum ai ni hpe makawp maga ya nna, shi hta myit maju jung ai ni hpe bau sin ya nga ai.

9 Nang gaw ngai tsun ai ga hpe madat mara ai rai yang, teng man ai lam, tara dara ai lam hte mai kaja rap ra ai lam shagu hte hpe nang chye na lu na rin dai; nang hpa galaw ang ai lam hpe mung, nang chye lu na rin dai. 10 Nang gaw hpaji chye ai wa tai wa nna, na a machye machyang hpaji gaw nang hpe kabu gara shangun na ra ai. 11 Na a myit kraw hpaji hte chye na hkawn hkrang ai nyan gaw nang hpe makawp maga la na ra ai hte; 12 dai gaw shut hpyit amu galaw ai kaw na, nang hpe hkum shingdang la na ra ai. Dai sha n-ga, shanhte tsun ai ga hte ru yak tsin-yam hpe shalut kabrawng ya nga ai masha ni hte, 13 ding man ai asak hkrun lam hpe kau da nna, yubak a nsin hta nga hkawm nga ai masha ni, 14 shut hpyit ai amu hta sharawng awng ai hte lachyum n pru ai n hkru n shawp ai amu hta kabu gara nga ai masha ni hte, 15 kam hpa n lu ai masha ni a lata kaw nna, nang hpe mawai la na ra ai.

16 Hkalem ai ga hte nang hpe lau la na matu shakut ai n shawp ai num kadai kaw na rai ti mung, 17 tinang a hkungran la wa hta kangka sadi dung ai lam n nga ai sha, shi a chyoi pra ai ga shaka hpe malap kau ai num hpe nang hkap manga kau lu na rin dai. 18 Dai num a nta de nang sa ai rai yang, si ai hkrun lam de, nang hkawm sa nga ndai. Dai shara de sa ai gaw, Katsan ga de shani sa wa ai lam rai nga ai. 19 Shi hpang de, sa chyai ai ni kadai wa mung nhtang wa yu ai n rai; asak lam de shi galoi mung, bai nhtang wa yu ai n rai. 20 Dai majaw, nang gaw mai kaja ai masha ni a kasi hta hkan hkawm nga u; ding hpring ai asak hpe machyu nga u. 21 Ding man ai hte teng man kangka ai masha ni gaw ndai anhte a lamu ga hta shanu nga lu na mara ai. 22 Rai ti mung, Karai Kasang gaw tara n lang ai masha ni hpe dai lamu ga kaw nna dun shapraw kau nhtawm, yubak lu ai masha ni hpe mung, tsing ni hpe zawn gang baw kau na ra ai.