HPILIPI NI KAW SHAGUN DAT AI LAIKA
(PHILIPPIANS)
Ga Nhpaw
Hpilipi ni kaw shagun dat ai Laika gaw Uropa Dan kata na Roma ni a Makedoni ngu
ai mungdaw hta Kasa Pawlu shawng nnan de
da ai Hpilipi mare na Hkristan hpung masha
ni hpang de ka dat ai laika rai nga ai.
Hpilipi hpung hpe A.D 50 ning daram hta
kasa Pawlu a lahkawng lang ngu na sasana bu
hkawm ai ten hta de da sai lam hpe chye
lu ai.( Kas 16:12-40) Ndai laika gaw Kasa
Pawlu Roma mare e htawng rawng nga yang
ka ai laika mali hta na langai mi rai nga
ai. (A.D 60-64) Hpilipi mare de du ai
shaloi Pawlu yan Sila htawng hta rim bang
da ai hkrum ma ai rai tim mauhpa lamik
kumla hku nna lawt pru wa ma ai. Kasa
Pawlu hpe rim kahpret ai shaloi Roma
mungchying sha ahkang aya lu ai wa re
ai lam tsun nna shi hkum hpe makawp maga
la wu ai.
Pawlu htawng rawng nga ai shaloi Hpilipi mare hpung hta Pawlu hpe shatan nhkan ai
hku ninghkap ai sara ni du nna shut ai
hku sharin ai hpe na chye lu ai majaw
myit ru myit tsang lam byin nga ai. Rai
ti mung ndai laika hta Hpilipi hpung
masha ni hte seng nna kabu gara ai lam,
kam ai lam ni hpe Kasa Pawlu chyu sha
Hkristu hta kam sham ai makam masham a
sung htum ai lam hku nna htai dan lu ai
lam ni hpe ka dat wu ai. Grau nna ndai
laika hpe ka ra ai lam ni gaw:- (1)
Hpilipi hpung masha ni gaw shanhte a
hpung kata hta sa shalau sha ai ni nga
ai rai tim, Hkristu hpe kam sham ai lam
hta ngang ngang kang kang tsap nga ma
ai hta n-ga, Hkristu a majaw htawng
rawng nga ai Pawlu hpang de karum ai
ja gumhpraw hte hpawn Epahprodi hpe
shangun dat ai hte shi gaw ra n rawng
hkra sa gawn lajang nga ai ten hta kanoi
si hkra machyi ai kaw nna mai tsai wa
sai majaw shi hpe bai wa shangun ai.
Shi hte rau Hpilipi hpung masha ni
hpang de kabu chyeju dum ai laika n ka
n mai re ai ngu nna Pawlu a myit hta
shadut nga ai hte maren ka dat ai
(Hpl 2:25-30.)
(2) Kasa Pawlu hte rau Hpilipi hpung masha ni makam masham a majaw hkrum
hkra nga ai ru yak lam ni hpe awng dang
kau na matu nden marai rawng nna makam
masham hta myit mu myit hkut ra ai lam
n shadum n mai re ai majaw ka dat ai
(Hpl 1:1-21.) Shi a laika hta hkum shan
ra marit ai lam hte kaman lila grang ai
gumrawng gumtawng myit n rawng ai sha
Hkristu Yesu hta rawng ai myit nan
rawng ra ai lam tsun shadum ai. Karai
Kasang kaw na shanhte lu la ai chyeju
gaw jep ai Tara shadik nna n rai,
Hkristu hte rau asak hkrung ai marang
e Karai Kasang jaw ai kumhpaw kumhpa
she re ai lam ni hpe tsun shadum ai
hte hpawn Hkristu hta asak hkrung nga
ai Hpilipi hpung masha ni hpe Karai
Kasang jaw ai kabu gara ai lam hte
ngwi pyaw sim sa ai lam ni hpe tsun
shabrawng na matu ndai laika hpe ka
dat sai. Ndai laika hta mahta nna ka
da ai lam ni gaw: Hpilipi hpung masha
ni a Hkristu hta kam sham asak hkrung
ai lam hte seng nna kabu gara ai lam,
kam da ai lam, myit hkrum kahkyin
gumdin ai lam hte Pawlu a tsaw ra myit
kap ai lam ni rai nga ai.
1
1 Hkristu a mayam ni rai nga ai Pawlu hte Timohti gaw, Hpilipi mare e nga nga ai,
hpung, hpung up, hpungtau ni hte hpawn Hkristu Yesu hta e langai sha rai nga
ai Karai Kasang a amyu masha ni nlang
hpang de laika ka dat ga ai.Ref 1:1: Kas 16:12.
2 Anhte a Wa Karai Kasang hte Madu Yesu Hkristu kaw na chyeju hte ngwi pyaw
ai gaw nanhte hta e anga nga malit ga
law.
3 Nanhte a lam ngai myit dum sumru yu ai ten shagu Karai Kasang a chyeju
hpe ngai shakawn nngai.
4 Ngai nanhte a matu akyu hpyi ai ten shagu hta kabu gara ai hte hpyi nngai.
5 Hpa majaw nga yang Madu a magam bungli hpe gun hpai hpang ai shani kaw nna dai
ni du hkra nanhte gaw dai Kabu Gara
Shiga hkaw tsun ai lam hta ngai hpe
karum shingtau galaw gun hpai lai wa
manit dai.
6 Dai re ai majaw nanhte hta ndai mai kaja ai magam bungli hpang da ya ai wa gaw
Hkristu Yesu bai yu wa ai nhtoi garai
n du yang dai amu hpe ngut hkra shatsup
shatup na ra ai ngu nna ngai myit kam
nga nngai.
7 Nye a myit masin hta e ngai nanhte hpe galoi mung sharawng awng nga nngai.
Shing re ai lam gaw ngai nanhte hpe
grai tsaw ra made ai majaw mung, bai
ya ngai bawng dung nga ai aten hta
dai Kabu Gara Shiga hpe ndut ndang
makawp maga hkaw tsun sharin shaga
nna shangang shagrin da na ahkang lu
nga ai ten hta mung, nanhte nlang hte
gaw Karai Kasang jaw ai chyeju hpe
ngai hte rau jawm hkam la manit dai.
8 Ngai gaw Hkristu Yesu shi nan a myit masin hta rawng ai n-gaw nwai ai myit
hte nanhte hpe myit dum marit nga
nngai, ngu nna ngai tsun ai ga teng
nga ai gaw Karai Kasang nye a
sakse rai nga li ai.
9 Dai hta kaga nanhte gaw mai kaja ai hpe lata la lu nna, teng man ai
machye machyang daw dan ginhka chye
ai atsam marai hte hpring let tsaw
ra myit hta grau grau kaba wa myit
ga, nanhte a matu ngai akyu hpyi
nngai.
10 Dai shaloi she nanhte gaw Hkristu bai du sa ai nhtoi hta n san n seng
awu asin re ai lam shagu hta na lawt
nna mara n rawng ai ni rai na myit
dai.
11 Dai hta n-ga, Karai Kasang a hpung shingkang dan hkung wa na hte shi a
arawng sadang hpe masha ni shakawn
shagrau mu ga, Yesu Hkristu a marang
e sha, lu la ai kaja dik ai ding
hpring ai asi ni gaw nanhte a asak
hkrung lam ni hta hpring tsup wa na
malit dai.
12 Bai hpu nau ni e, ngai hta byin ai lam ni gaw dai Kabu Gara Shiga jat
galu kaba wa na lam hpe kaja wa karum
madi shadaw na matu byin wa sai rai
nga ai lam ngai nanhte hpe chye
shangun mayu nngai.
13 Dai Hkawhkam htingnu hpe sin ai hpyen dap ting hte nang e nga ai kaga
ni yawng hkra gaw, ngai bawng dung ai
gaw Hkristu a shangun ma tai ai majaw
re ai lam hpe chye wa masai.
14 Dai hta kaga, ngai bawng dung ai a marang e hpu nau ni malawng maga gaw
dai Madu hta makam masham myit nden
grau nna rawt wa ai hte Karai Kasang
a mungga hpe n hkrit n kang ai sha
tsun dan na, grau nna gwi wa ma ai.
15 Kaja wa shanhte hta na nkau mi gaw manawn masham nna ga li ga law rai
mayu ai myit hte hkaw dan nga ma ai.
Rai ti mung kaga ni gaw sharawng awng
ai myit kaja rawng let hkaw dan ma ai.
16 Dai ni gaw ngai dai Kabu Gara Shiga hpe makawp maga na bungli hta san da hkrum
ai wa rai nga nngai hpe, chye nga ma ai
majaw, tsaw ra ai myit hte hkaw dan
ma ai.
17 Bai kaga nkau mi mahtang gaw, san seng ai myit hte n re ai sha, tinang a akyu
tam ai myit hte hkaw tsun ma ai.
Shanhte gaw ngai bawng dung hkrum nga
ai laman nye a ntsa e tsin-yam tsindam
grau jat wa hkra galaw ma ai.
18 Kaning re ai myit hte Hkaw tsun ai rai tim hpa n ra ai. Sawt ai myit
hte rai ti mung, teng man ai myit
hte rai ti mung, byin mai ai lam
shagu hku nna Hkristu a lam sha hkaw
tsun kajai gara lu nga yang gaw, dai
lam hta ngai kabu gara nga nngai.
Kaja wa matut nna ngai naw kabu gara
nga na nngai.
19 Hpa majaw nga yang, nanhte a akyu hpyi ai ga ni a majaw mung, Yesu
Hkristu kaw na Wenyi a karum madi
shadaw ai lam a majaw mung, ngai
ndai bawng dung ai kaw nna shalawt
dat hkrum na nngai,
20 Ngai gaw galoi mung nye a lit hpe n hprai ai sha, aten shagu hta rai
ti mung, grau nna ya e rai ti mung,
magrau grang ai atsam marai hte
hpring tsup let, ngai hkrung ti mung,
si ti mung nye a asak hkrung lam ting
hta Hkristu a hpung shingkang dan
hkung shangun na gaw nye a ra sharawng
dik ai lam hte myit mada ai lam rai
nga li ai.
21 Hpa majaw nga yang, ngai asak hkrung ai gaw Hkristu nan rai nga ai, si wa
yang mung amyat rai nga ai.
22 Rai ti mung nye a hkum hkrang hta asak hkrung nga let akyu rawng ai amu grau
nna galaw lu na rai yang gaw hkrung ai
hte si ai gara mahtang hpe lata la na
ngai n chye nngai.
23 Ngai gaw lam lahkawng a hpatwat e rai nna kade nde nna gang da ai ngai hkrum
nga nngai. Ngai gaw ndai ya hkrung nga
ai asak hkrung lam hpe tawn kau da nna
Hkristu hte rau asak hkrung mayu la
nngai; dai gaw nye a matu grau kaja
nga ai.
24 Rai ti mung nanhte a matu mara ngai asak hkrung nga na gaw grau nna
ahkyak kaba rai nga ai.
25 Ndai lam hpe ngai atsawm sha myit hkawn ai majaw ngai nanhte hte rau
nga na nngai. Nanhte hpe jat galu
kaba wa shangun na hte makam masham
hta kabu gara lu na matu ngai nanhte
yawng hte hte rau nga nga na nngai,
hpe ngai chye nga nngai.
26 Dai rai nna ngai nanhte hpang de bai du wa ai shaloi nye a marang e nanhte
gaw Hkristu Yesu hta e grau nna kabu
gumrawng lu na myit dai.
27 Ya e nanhte a matu grau nna ra ahkyak dik ai lam gaw Hkristu a kabu gara
shiga e hkan sa shangun ai hte maren
asak hkrung nga pra na lam rai nga ai.
Shing rai jang ngai nanhte hpang de
sa du ai rai ti mung, n du lu ai rai
ti mung, Wenyi e yaw shada ai lam
langai sha hte nanhte lahpran tsap
nga nna, myit ra sharawng ai lam langai
sha hte dai kabu gara shiga a makam
masham lam ngang grin galu kaba wa na
matu rau sha majan jawm gasat nga ai lam
hpe ngai na lu na nngai.
28 Dai hta kaga nanhte gaw hpyen ni hpe; hkum hkrit nga myit, tut nawng e nden
marai rawng nga mu. Dai gaw shanhte
sum hkrum nna nanhte awng dang wa na
sakse kumla tai na ra ai; hpa majaw
nga yang nanhte hpe awng padang jaw
ai gaw Karai Kasang shi nan rai nga ai.
29 Kaning rai nme law, nanhte gaw Hkristu hpe kam sham ai hku nna sha n rai; shi
a matu mara nni nkri hkam ai hku nna
mung, shi a magam hpe gun hpai na
ahkang chyeju jaw ya ai hkrum manit
dai.
30 Ya nanhte gaw ngai hte rau gasat gala ai hta shang lu myit dai; lai wa sai
aten hta nanhte ngai gasat nga ai hpe
mu yu nna ya e nanhte na lu ai nye a
gasat gala ai lam gaw langai sha rai
nga ai.Ref 1:30: Kol 2:1; 1Ht 2:2.