PETRU A SHAGUN DAT AI LAIKA LAHKAWNG
(2 PETER)
Ga Nhpaw
Petru a shagun dat ai Laika Lahkawng gaw, shara shagu nga bra hkawm nga ai Hkristan ni hpang de hkringdat nna ka dat ai laika
re. Ndai laika ka ai wa a yaw shada ai lam
madung gaw, masu ai sara ni a sharin shaga
ai lam hpe gasat na hte shanhte a sharin
achyin ai lam a majaw masha ni a arawn
alai hten mat wa ai lam hpe pat shingdang
jahkring kau na matu re. Ndai lam hta ra
ahkyak ai lam gaw Hkristan ni hta Karai
Kasang hte Madu Yesu Hkristu hte seng nna
teng man ai hku tsun sharin achyin ya ai
hpe ngang ngang kang kang hkap la tawn ra
ai hte dai teng man ai sharin shaga ai
lam hpe Madu Yesu hte nan mu hkrum kanawn
mazum nna shi kaw na mu la, na la, sai ni
a sharin shaga ai ga rai ra ai ngu ai lam
ni rai nga ai. Laika ka ai wa hta grau nna
myit tsang ai lam gaw, ?Madu Yesu bai n
yu wa sana re,? ngu nna sharin shut ai
lam rai nga ai. Laika ka ai wa gaw Madu
Yesu bai yu wa na matu aten shana da ai
lam gaw, ?Karai Kasang gaw masha kadai
hpe mung n kam jahten kau ai sha yawng
mayawng hpe tinang a yubak mara kaw na
kayin wa shangun mayu nga ai,? ngu nna
htai dan ai re nga ai.
1
1 Yesu Hkristu a mayam hte, kasa tai nga ai, ngai Simun Petru gaw, anhte a Karai
Kasang hte hkye hkrang la ai Madu Yesu
Hkristu a ding hpring ai lam hta anhte
zawn hpu la ai makam masham lu la nga
ai ni hpang de ga shana dat nngai.
2 Karai Kasang hte anhte a hkye hkrang la ai Yesu Hkristu hpe nanhte chye chyang
ai a marang e nanhte gaw chyeju hte ngwi
pyaw ai hpe hkum tsup hkra hkam la lu
myit ga law.
3 Shi a hpung shingkang hte mai kaja ai lam hpe garan hkam la na matu anhte hpe shaga
la ai Hkristu hpe chye chyang ai a marang
e Karai Kasang a n-gun atsam gaw teng man
ai nawku htung makam masham hta asak hkrung
nga lu na matu anhte hta ra kadawn nga ai
lam yawng mayawng jaw ya mani ai.
4 Ndai lam hku nna grai galu kaba nna hpu ging ai chyeju kumhpa hte seng ai ga
sadi ni anhte hpe jaw da mani ai. Dai
rai nna ndai chyeju ni a marang e anhte
gaw mungkan ga na jahten shabyak shangun
ai myit marin ai lam kaw nna lawt lu nna
Karai a marai hpe shang lawm dagraw lu
myit dai.
5 Ndai lam nan a majaw, nanhte a makam masham hta mai kaja ai lam, mai kaja
ai hte chye chyang ai lam a shajat
nga mu.
6 Chye chyang ai lam hta tinang a hkum hpe hkang ai, tinang a hkum hpe hkang
ai hta hkam sharang ai, hkam sharang
ai hta tara hkungga ai lam,
7 Tara hkungga ai lam hta hpu nau hpe n-gaw n wai ai, hpu nau hpe n-gaw n
wai ai hta tsaw ra ai myit, a shajat
nga mu.
8 Ndai hte gaw nanhte hta nga ra ai atsam marai ni rai nga ai; ndai lam ni nanhte
hta n taw n tsang rawng nga ai rai yang
gaw, anhte a Madu Yesu Hkristu hpe nanhte
chye chyang ai hte asak hkrung ai lam hta
kasang galang rai nna akyu byin shangun
na marin dai.
9 Rai ti mung dai atsam ni hpe n lu la ai ni kadai mung tsan tsan n mu mada ai,
myi n mu ai wa rai nna shi a lai wa sai
yubak mara ni kaw nna jasan jaseng la
hkrum sai lam hpe nan malap mali di
kau nu ai.
10 Dai re ai majaw, nye a hpu nau ni e, nanhte hpe Karai Kasang e shaga la ai
hte lata la sai ngu ai lam hpe tut tut
hkam sha nga na matu grau nna shakut
shaja nga mu. Shing rai galaw myit yang
gaw, nanhte a makam masham hpe galoi
mung kabai kau na myit dai n rai.
11 Dai lam hku hkan sa myit yang gaw, anhte a Madu hte hkye hkrang la ai Yesu Hkristu
a htani htana re ai mungdan de shang lu
na ahkang nanhte hpe hpring hpring tsup
tsup jaw ya na marin dai.
12 Dai majaw nanhte gaw ndai lam ni hpe chye na nna nanhte hkap la da sai dai teng man
ai lam hta ngang ngang kang kang npawt de
da manit dai rai ti mung, ngai nanhte hpe
galoi mung naw ashadum jahprang nga mayu
nngai.
13 Ngai asak naw hkrung nga ai ladaw hte yang, dai lam ni hte seng nna nanhte
hpe sadi jaw shadum na gaw ngai galaw
ang ai amu re ngu nna ngai myit la nngai.
14 Anhte a Madu Yesu Hkristu ngai hpe asan sha tau tsun da sai hte maren, ndai si
chye ai hkum hkrang hpe kade n na yang
raw kabai kau na ra ai hpe ngai chye
nga nngai.
15 Dai re ai majaw, ngai si mat ai hpang ndai lam ni hpe nanhte galoi mung adum
nga na matu ngai atsam htum hkra shakut
na nngai.
16 Anhte a Madu Yesu Hkristu a hpung shingkang atsam hte du sa ai lam
nanhte hpe chye shangun na matu
anhte gaw masha e gyin shalat la ai
maumwi hta shamyet shanat ai lam n galaw
saga ai. Anhte a myi hte nan shi a
galu kaba hkik hkam ai lam hpe mu lu
saga ai.
17 Shi hpe Kawa Karai Kasang kaw na arawng sadang hte hpung shingkang jaw ya ai
shaloi mung grau htum ai hpung shingkang
kata nna shi kaw du ai nsen, ?Ndai wa
gaw ngai sharawng awng nga ai, ngai tsaw
ra ai, ngai sha rai nga li ai!,? nga nna
tsun ai shaloi mung, anhte dai kaw shi
hte rau nga ga ai.Ref 1:17: Mat 3:17; 17:5; Luk 9:35.
18 Dai ten hta anhte ni nan Madu hte rau chyoi pra ai bum ntsa e nga nga yang,
lamu de na ngoi pru wa ai nsen hpe
anhte na lu ga ai.
19 Dai re ai majaw anhte gaw myihtoi ni htawn tsun ai shingran mungga hpe grau
nna myit mu myit hkut lu saga ai. Nanhte
dai mungga hpe atsawm sha madat mara nga
mu; hpa majaw nga yang, dai gaw nanhte
a myit masin ni hta htoi leng wa nna,
nhtoi gintawng pru wa ai aten du hkra,
nsin sin ai shara hta htoi tu nga ai
pyengdin zawn rai nga ai.
20 Rai ti mung, kadai wa mung tinang dai myit ra ai hku Chyum laika ni hta na
myihtoi ga langai mi a lachyum n hta
la lu ai hpe yawng a shawng e matsing
da ra nga ai.
21 Hpa majaw nga yang, gara myihtoi ga mung masha a myit ra myit jasat ai hku nna
byin pru wa ai n rai; chyoi pra ai wenyi
myit shadut ya hkrum ai masha ni gaw
Karai Kasang kaw na du ai mungga hpe
htawn tsun ma ai.