OBEDIA LAIKA
(OBADIAH)
Ga Nhpaw
Ndai laika kadun gaw Yuda amyu masha ni a prat janat na gumlau hpyen tai nna, Yuda mungdan a sinpraw dingda maga de nga ai Edom amyu masha ni, Babelon hpyen ni a lata de hkrat sum mat ai Yerusalem hpe yu kabu ai hta sha n-ga, Yuda mung hpe shang gasat ai hpyen ni hpe shang karum ai hte mare kata na hpyen lanep ni hpe shanhte a akyu a matu hkan hta mahkawng la ai 586 B.C. shaning a hpang daw hta paw pru wa ai laika rai nga ai. Obadia gaw Israela a kaga amyu gumlau hpyen ni hte kapyawn nna Edom amyu masha ni ari hkrum sha na lam hte sum kadawng mat ai hkrum na lam ni hpe myihtoi htoi da nga ai.
1
Ndai gaw Tsaw Htum ai Madu, Edom masha ni hte seng nna tsun ai Obadia a myihtoi ga rai nga ai.
Dai Madu gaw masha amyu baw ni hpang de shi a kasa hpe shangun dat wu ai rai nna,
anhte gaw ning nga tsun ai shi a mungga hpe na saga ai:
?Jin jin rai nga mu! Edom hpe majan gasat na matu rawt sa saga!.?
Dai Madu gaw Edom hpe,
?Ngai nang hpe n-gun shakya kau ya na nngai;
masha shagu gaw nang hpe n kaw n law di na mara ai.
Na gumrawng gumtawng ai myit gaw nang hpe hkalem kau nga sai.
Na a mare daju gaw ngang ai lunghkrung hta gap da ai hpyen dap rai nga ai;
na a dum nta gaw bum ni hta tsaw nga ai,
dai rai nna nang gaw na a kraw kata e,
?Kadai wa ngai hpe gang kadang lu na i?,? nga nna tsun nga ndai.
Nang gaw na a dum nta hpe
galang a utsip zawn tsaw ai shara hta galaw tawn da lu nna,
dai gaw shagan ni a lapran e nga nga lu ai zawn rai tim,
ngai nang hpe gang shayu kau na de ai.
 
?Shana e lagu lagut ni sa ai shaloi
shanhte ra ai daram sha shanhte la nga ma ai.
Masha ni sabyi si ni hpe di mahkawng nga ai shaloi,
shanhte gaw galoi mung nlim ngam da nga ma ai.
Rai ti mung na a gumlau hpyen ni mahtang nang hpe tsep kawp jahten kau nga masai.
Esaw a aru arat ni e, nanhte a sut gan ni lanep shatai kau hkrum nga manit dai.
Na a jinghku mungdan ni nang hpe hkalem kau nga masai;
shanhte gaw nang hpe na a mungdan kaw nna shaden kau nga masai.
Nang hte sim sa lam galaw da ai ni ya gaw nang hpe majan dang kau manu ai.
Nanhte lusha rau sha ai manang ni na a matu mahkam jahkrat da manu ai;
shanhte gaw nang hpe, ?Shi hta rawng ai myit let ai lam yawng gara de rai mat sai kun?,? nga nna tsun ma ai.
 
?Dai shani e ngai gaw Edom hpe ari jaw nna
shanhte a myit let ai masha ni hpe jahten shaza kau ai hte
shanhte a hpaji byeng-ya yawng hpe yeng seng kau na nngai.
Teman a majan share ninghkrin ni hkrit gari mat na mara ai,
Edom mung na hpyenla shagu sat kau hkrum na mara ai.
10 ?Na a kahpu kanau ni rai nga ai Yaku a matu mara ni hpe
nang ashep ashin di nna sat kau nit dai majaw,
nang gaw shamyit kau hkrum ai hte htani htana kaya kahpa hkrum na rin dai.
11 Gumlau hpyen ni shanhte a mare chyinghka ni hpe
adup agrawp kau ai shani e, nang n shamu ai sha tsap nga ndai.
Nang gaw Yerusalem a sut gan ni magawn hpai mat wa nna
dai ni hpe jawm karan la ai tsasam masha ni zawn n kaja nga ndai.
12 Yuda mung na na a jinghku ni a n kaja ai gam maka hpe
nang yu sharawng mai nga ndai n rai.
Shanhte hten run hkrum ai shani e,
nang yu kabu mai nga ndai n rai.
Shanhte myit ru myit yak hkrum nga ma ai shaloi,
nang shanhte hpe mani asawng mai nga ndai n rai.
13 Nang gaw shanhte a nni nkri lam hpe yu
sharawng na matu mung,
shanhte a ru tsang hkrum ai tsin-yam tsindam shani hta e,
shanhte a sut gan rim magra la na matu mung nye a amyu masha ni a mare de shang ang nga ndai n rai.
14 Hprawng lawt lu na matu shakut ai ni hpe rim la na matu,
lam numshe hkan e nang tsap nga ang nga ndai n rai.
Nang gaw shanhte ru tsang hkrum ai shani hta,
shanhte hpe gumlau hpyen a lata de ap kau ang nga ndai n rai. Ref 1-14: Esa 34:5-17; 63:1-6; Yer 49:7-22; Eze 25:12-14; 35:1-15; Amo 1:11-12; Mal 1:2-5.
15 ?Dai Madu ngai gaw masha amyu baw ni hpe
tara jeyang na nhtoi ni wa nga sai.
Edom e, nang galaw nit dai hte maren,
nang bai hkam sha ra na rin dai.
Nang jaw ya nit dai hte maren, nang bai hkam la lu na ra ai.
16 Nye a amyu masha ni gaw nye a chyoi pra ai
kawng ntsa e hka ai ari gawm lu masai.
Rai ti mung grup yin masha amyu baw ni yawng
grau hka ai ari gawm lu na mara ai;
shanhte gaw dai yawng hte hpe lu kau nna wai mat na mara ai.
17 ?Rai ti mung Ziun Bum ntsa e, nkau mi hprawng lawt lu nna,
dai shara gaw chyoi pra ai shara tai na ra ai.
Yaku a amyu masha ni gaw shanhte a ahkaw ahkang hte maren,
dai lamu ga hpe madu la lu na mara ai.
18 Yaku hte Yosep a amyu masha ni gaw wan zawn rai wa nna;
shanhte gaw Esaw a masha ni hpe
yihku wan shachyi ai zawn jahkru kau na mara ai.
Esaw a amyu matu ni kadai mung ngam nga na ra ai n rai.
Dai Madu ngai nan ga tsun ni ai.
 
19 ?Dingda Yuda mung kaw nna amyu masha ni Edom hpe madu la na mara ai;
sinna bum lagaw e nga ai masha ni mung Hpilisti masha ni hpe rim la na mara ai.
Israela masha ni gaw Ehprim hte Samari lamu ga madu la na mara ai;
Benyamin amyu masha ni gaw Gilead hpe la na mara ai.
20 Dingdung Israela mung kaw na bawng dung hpyen luksuk
nhtang wa nna dingdung de Zarephta du hkra kaba ai Hponisha hpe ka-up la na mara ai.
Sardi mare e nga ai Yerusalem na bawng dung masha ni gaw dingda Yuda de nga ai kahtawng ni hpe madu la na mara ai.
21 Yerusalem na awng padang lu ai masha ni gaw
Edom hpe gasat nhtawm dai mung hpe up hkang na mara ai.
Dai Madu shi nan hkawhkam tai na ra ai.?