29
(Jaw 23:23-25)
1 Shata sanit a praw langai ya shani e, nanhte gaw nawku na matu zup hpawng na rai myit dai; amu bungli galaw lu na myit dai n rai; dai shani hta pahtau dum na rai myit dai.
2 Dai Madu a matu manam pyaw ai sangau shatai na, wan nat hkungga a matu ra n rawng ai usu uram langai, sagu la langai hte laning mi ladu hkrum sai sagu la kasha sanit hte hpe sak jaw na rai nga ai.
3 Kaja ai shadung hkungga shatai na usu langai mi hta tsanlun sau hte kayau ai mani ai shadung pawng 6, sagu la a matu pawng 4 hte
4 sagu la kasha langai ngai a matu pawng 2 hte nawng jau na rai nga ai.
5 Htingrai hkungga a matu bainam la langai hpe mung nawng jau na rai nga ai; ndai hku nna amyu masha ni a matu jasan jaseng ai amu galaw na rai myit dai.
6 Shata praw shani hta tut nawng galaw ai wan nat hkungga hte de a shadung hkungga hte kaga shani shagu na wan nat hkungga, de a shadung hkungga, sabyi hkungga ni hta kaga dai ni hpe nawng jau na rai myit dai. Ndai lusha hkungga ni gaw dai Madu hpe awng sharawng shangun ai manam pyaw ai sangau rai nga ai.
(Jaw 23:26-32)
7 Shata sanit a nhtoi shi ya shani e, nawku hpawng galaw na rai myit dai; dai shani e lusha hpa mung n sha ai hte amu bungli n galaw na rai myit dai. Ref 29:7-11: Jaw 16:29-34.
8 Dai Madu a matu manam pyaw ai sangau shatai na wan nat hkungga a matu ra n rawng ai usu uram langai, sagu la langai hte laning mi ladu hkrum sai sagu la kasha sanit hte hpe nawng ya na rai myit dai.
9 Kaja ai shadung hkungga a matu usu langai mi hta tsanlun sau hte kayau ai mani ai shadung pawng 6,
10 sagu la a matu pawng 4 hte sagu la kasha langai ngai a matu pawng lahkawng hkawng di nna nawng jau na rai myit dai.
11 Shani shagu nat ai wan nat hkungga hte de a shadung hkungga hte sabyi hkungga ni sha n-ga, amyu masha ni a matu nawng ya ai htingrai hkungga a matu bainam langai mi hpe mung nawng ya na rai myit dai.
(Jaw 23:33-44)
12 Dai shata sanit a shi manga ya shani e, nawku hpawng galaw na rai myit dai. Dai Madu hpe shagrau sha-a ai ndai poi hpe nhtoi sanit ya tup galaw ai laman, amu bungli galaw lu na myit dai n rai. Ref 29:12-38: Jaw 23:34; Trj 16:13-15.
13 Nnan shani hta dai Madu a matu manam pyaw ai sangau shatai na lusha hkungga a matu ra n rawng ai usu uram shi masum, sagu la lahkawng hte laning mi ladu hkrum sai sagu la kasha shi mali hte hpe nawng ya na rai myit dai.
14 Kaja ai shadung hkungga a matu usu langai ngai hta tsanlun sau hte kayau ai mani ai shadung pawng 6, sagu la langai hta pawng 4,
15 sagu la kasha langai ngai hta pawng lahkawng hkawng di nna ra ai sabyi hkungga ni hte hpawn nawng jau na rai myit dai.
16 Htingrai hkungga a matu bainam la langai mi mung nawng ya na rai myit dai. Shani shagu na wan nat hkungga hte de a matu lajang da ai shadung hkungga hte sabyi hkungga ni hpe mung jat nna ndai ni hpe nawng ya na rai myit dai.
17 Lahkawng ya ngu na shani e, ra n rawng ai usu uram shi lahkawng, sagu la lahkawng hte laning mi ladu hkrum sai sagu la kasha shi mali hte hpe mung nawng ya na rai myit dai.
18-19 Dai ni hpe kaga hkungga ni yawng hte hpawn nnan shani galaw ai hta lang ai hkungga ni hte maren nawng ya na rai myit dai.
20 Masum ya ngu na shani mung ra n rawng ai usu uram shi langai, sagu la lahkawng hte laning mi ladu hkrum sai sagu la kasha shi mali hte hpe nawng ya na rai myit dai.
21-22 Dai ni hpe mung nnan shani a matu lang ra ai hkungga ni hte maren nawng jau na rai myit dai.
23 Mali ya ngu na shani e mung, ra n rawng ai usu uram shi, sagu la lahkawng, hte laning mi ladu hkrum sai sagu la kasha shi mali hte hpe nawng ya na rai myit dai.
24-25 Dai ni hpe mung nnan shani a matu lang ai hkungga ni yawng hte maren nawng jau na rai myit dai.
26 Manga ngu na shani e, ra n rawng ai usu uram jahku, sagu la lahkawng hte laning mi ladu hkrum sai sagu la kasha shi mali nawng jau ya na rai myit dai.
27-28 Dai ni hpe mung nnan shani a matu lang ra ai hkungga ni yawng hte maren nawng jau na rai myit dai.
29 Kru ya shani e, ra n rawng ai usu uram matsat, sagu la lahkawng hte laning mi ladu hkrum sai sagu la kasha shi mali hte hpe nawng ya na rai myit dai.
30-31 Dai ni hpe mung nnan shani a matu lang ra ai kaga hkungga ni yawng hte maren nawng ya na rai myit dai.
32 Sanit ya ngu na shani e, ra n rawng ai usu uram sanit, sagu la lahkawng hte laning mi ladu hkrum sai sagu la kasha shi mali hte hpe nawng ya na rai myit dai.
33-34 Dai ni hpe mung nnan shani a matu lang ra ai hkungga ni yawng hte maren nawng ya na rai myit dai.
35 Matsat ya ngu na shani hta chyawm gaw nawku hpawng galaw na rai myit dai; dai shani e amu bungli galaw lu na n rai.
36 Dai Madu a matu manam pyaw ai sangau shatai na lusha hkungga hpe wan nat hkungga di na ra n rawng ai usu langai, sagu la langai mi hte laning mi ladu hkrum sai sagu la kasha sanit hte hpe nawng ya na rai myit dai.
37-38 Dai ni hpe mung nnan shani a matu lang ra ai kaga hkungga ni yawng hte maren nawng ya na rai myit dai.
39 Ndai ni gaw madat da ai poi ni hta dai Madu hpe nanhte nawng jau na wan nat hkungga, shadung hkungga, sabyi hkungga hte mahku hkungga ni hte seng ai tara ni rai nga ai. Dai ni gaw ga shaka shatup nna jau ai hte jaw mayu ai hkungga hta jan nna sak jaw ai hkungga ni rai nga ai.
40 Dai rai nna Mawshe mung dai Madu shi hpe hkang da mada yawng Israela amyu masha ni hpe tsun dan wu ai.