24
1 Israela amyu masha ni hpe mahtang shaman ya na matu dai Madu shi hpe ra sharawng nga ai gaw Balam chye wu yang, shawng de lamik kumla wunli sa hpyi ai zawn shi n sa mat wu ai. Shi gaw nam mali de myi man yawng nhtawm,
2 Israela amyu masha ni amyu dap hku hkan nna but nga ma ai hpe mu wu ai. Karai Kasang a wenyi gaw shi hpe
3 up hkang ai hte ndai myihtoi ga hpe tsun shapraw wu ai:
?Beora a kasha Balam a mungga ning nga nga ai,
Masha tsun ai ga hpe kadai wa asan sha chye lu ai kun?
Karai Kasang kaning nga tsun ai hpe kadai wa na lu a ni?
4 Ngai chyawm gaw Chyahtum Chyalai n-gun rawng ai
Karai Kasang kaw na shingran hku dinghkren lu ai
Myi hte myit shingran mu chye nngai.
5 Israela a sum ni gaw tsawm htap nga ma ai rai nna;
6 Dai ni gaw galu yang yang rai hkai da ai namhtan hpun ni
Hte hka kau na sun ni zawn dai Madu hkai da ai
Maza hpun ni hte hka kau e tu ai shaji hpun ni zawn ut rai nga ai.
7 Shanhte gaw nhpaw n-ya htu hkrat ai marang hkam la lu na mara ai;
Hka law ai shara ni hta shanhte a hkaili naili ni hkai na mara ai.
Shanhte a hkawhkam gaw Agag hta shingkang grau kaba nna;
Shi a up hkang ai gaw maden jat na rai wu ai.
8 Karai Kasang gaw shanhte hpe Egutu mung kaw nna woi shapraw wa nu ai;
Shanhte a matu dumbau langai zawn shi gasat malan ya nga ai;
Shanhte a gumlau hpyen ni hpe sha kau nna, nra ni hpe agrawp kau nhtawm
Shanhte lang ai ndan pala ni hpe gang daw kau ya na wu ai.
9 Dai amyu baw ni gaw chyalai n-gun rawng ai
Hkanghkyi hte bung nna, shi yup nga yang kadai mung n jasu gwi nga ai.
Israela hpe shaman ai wa kadai mung shaman ai hkrum nga u ga;
Israela hpe matsa ai wa kadai mung matsa ai hkrum nga u ga law.?Ref 24:9: Nin 49:9; Nin 12:3.
10 Balak gaw masin pawt ai hte shi a lata ja ja latup let Balam hpe, ?Nye a hpyen ni hpe matsa ya na matu ngai nang hpe shaga da nngai; rai ti mung shing di na malai ya nang masum lang shanhte hpe shaman kau ya nit dai.
11 Ya na a nta de wa mat nu! Ngai gaw nang hpe kumhpa jaw shagrau na ga sadi jaw da ni ai; rai ti mung dai Madu gaw kumhpa jaw shagrau hkam la na lam hpe hkum shingdang kau ya nit dai,? ngu nna tsun wu ai.
12-13 Balam chyawm gaw, ?Na a hkaw na ja gumhpraw yawng ngai hpe jaw tim pyi, dai Madu a hkang da ai ga hta lai nna nye a myit hte kaning re ai amu hpe mung n galaw lu nngai. Dai Madu ngai hpe tsun shangun ai hpe sha ngai tsun na nngai ngu nna ngai hpang de shangun dat ai na a kasa ni hpe ngai tsun ni ai,? ngu nna htan wu ai.
14 Balam gaw Balak hpe, ?Ya chyawm gaw nye a amyu masha ni nga ai de ngai mahtang wa na ni ai; rai ti mung ngai garai n pru wa yang, ndai Israela amyu masha ni htawm hpang de na a masha ni hpe hpa galaw na ra ai gaw ngai nang hpe sadi jaw na we ai,? ngu nna tsun wu ai.
15 Dai hpang shi gaw ndai myihtoi ga tsun shapraw wu ai:
?Beora a kasha Balam a mungga,
Masha tsun ai ga ni hpe kadai wa asan sha chye lu ai kun?
16 Karai Kasang kaning nga tsun nga ai hpe kadai wa na lu ai hte,
Tsaw Htum ai wa kaw na machye machyang hpe kadai wa lu la nga a ni?
Ngai chyawm gaw Chyahtum Chyalai N-gun rawng ai
Karai Kasang kaw na shingran hpe dinghkren mu lu ai myi hte shingran hku mu chye nngai.
17 Htawm hpang na lam hpe ngai mada yu,
Israela amyu baw hpe ngai mu; htoi tu ai shagan zawn
Dai amyu baw hta hkawhkam langai pru na ra ai.
Shi gaw wan shingram langai zawn Israela hta na du sa wa na ra ai;
Shi gaw Moba ningbaw ni hpe anut kau nna,
Shet a amyu ni yawng hpe kayat adup na ra ai.
18 Shi gaw Edom mung na shi a gumlau hpyen ni hpe shi dang kau nna,
Shanhte a mung hpe shi a sut rai shatai la na wu ai. Israela gaw awng padang matut hkam la nga yang;
19 Israela amyu baw gaw shanhte hpe kabye kau nna;
Jahtum naw ngam nga ai ni hpe hpyu kau na mara ai.?
20 Dai hpang Balam gaw shi a shingran hta Amalek masha ni hpe mu nna, ndai myihtoi ga tsun shapraw wu ai:
?Amalek gaw yawng hta daru magam n-gun ja htum ai amyu rai nga ai;
Rai ti mung jahtum e, dai amyu gaw htani htana hten run mat na mara ai.?
21 Shi gaw shi a shingran hta Keni masha ni hpe mu wu ai rai nna ndai myihtoi ga tsun shapraw wu ai:
?Nanhte shanu nga ai shara gaw shim nga myit dai;
Ninggam ntsa e u tsip tsip da lu ai zawn shim nga myit dai.
22 Rai ti mung Asuri wa nanhte hpe rim mat wa jang,
Keni masha ni jahten shaza kau hkrum na myit dai.?
23 Balam gaw ndai myihtoi ga tsun shapraw wu ai:
?Dingdung de hpawng nga ai ndai amyu masha ni gaw
Kadai ni rai nga ma ta?
24 Shang gasat ai ni Kupru zunlawng kaw na li hte
Jawn sa nhtawm, Asuri mung hte Ebera mung hpe dang kau na mara ai.
Rai ti mung shanhte mung htani htana hten run mat ai bai hkrum na mara ai.?
25 Dai hpang Balam shajin la nna, shi a dum nta de nhtang mat wa wu ai. Balak mung shi a lam hku wa mat wa ai.