23
1 Shi gaw Balak hpe, ?Ndai yang e nye a matu tawn hkungri sanit gaw u; dai hpang usu sanit hte sagu la sanit ngai hpang de dun sa wa u,? ngu nna tsun wu ai.
2 Balak mung shi tsun ai hte maren galaw wu ai; shi hte Balam mung tawn hkungri shagu hta usu langai hte sagu la langai ngai nawng jau ma ai.
3 Balam gaw Balak hpe, ?Dai Madu ngai hpe hkrum na, n hkrum na ngai sa yu ai laman, nang jaw ai wan nat hkungga makau e naw tsap nga u. Shi ngai hpe madun dan ai made ngai nang hpe bai wa tsun dan na de ai,? ngu nna tsun wu ai. Shing rai shi gaw kawng langai mi a pungding de shi chyu sha lung mat wa wu ai rai nna,
4 Karai Kasang hte wa hkrum wu ai. Shaloi Balam gaw shi hpe, ?Ngai gaw tawn hkungri sanit gaw da nna, tawn hkungri shagu hta usu langai hte sagu la langai ngai nat nawng se ai,? ngu nna tsun wu ai.
5 Dai Madu mung Balam hpe kaning ngu tsun na lam tsun matsun nhtawm, dai ga Balak hpe bai wa hti dan na matu shi hpe bai nhtang wa shangun dat wu ai.
6 Dai rai nna shi bai nhtang wa yang, Balak gaw Moba ningbaw ni yawng hte rau shi nawng jau ai wan nat hkungga makau e naw tsap nga ai.
7 Balam gaw ndai myihtoi ga hpe tsun hpaw dat wu ai:
?Moba Hkawhkam Balak gaw Suri mung sinpraw
Maga nga ai bum dinghkang kaw na ngai hpe woi la nu ai.
Shi gaw, ?Nye a matu sa tsun ya e, Israela amyu masha ni hpe matsa kau ya e,? nga nna tsun nu ai.
8 Karai Kasang e n matsa kau ai wa hpe ngai kaning rai matsa lu na rai nga a ta?
Dai Madu n daw dan ai si hkrung si htan lam hpe ngai kaning rai tsun daw dan na rai ta?
9 Tsaw ai lunghkrung ni kaw na ngai shanhte hpe mu nngai;
Ngai gaw shanhte hpe kawng ni kaw na mada lu nngai;
Shanhte gaw alak mi re ai amyu baw langai mi rai nga ai;
Shanhte gaw kaga amyu baw ni hta shaman chyeju grau nna lu la nga ma ai hpe shanhte chye ma ai.
10 Israela amyu matu ni gaw ga nhpu zawn-
Grai law nga ma ai majaw n dang hti lu nga ai.
Karai Kasang a amyu masha hta na langai mi wa zawn nye a nhtoi ni hpe jahtum kau n-ga;
Ding man ai wa si ai zawn ngwi pyaw sim sa ai hte ngai si wa n-ga law.?
11 Dai hpang Balak gaw Balam hpe, ?Nang ngai hpe kaning rai galaw kau nga n ta? Nye a gumlau hpyen ni hpe matsa ya na matu ndai yang e nang hpe ngai woi tawn da nngai; rai ti mung nang galaw lai wa sai lam yawng mayawng gaw shanhte hpe shaman ya nga ndai,? ngu nna tsun wu ai.
12 Shi gaw, ?Dai Madu ngai hpe tsun shangun ai hku sha ngai tsun lu nga nngai,? ngu nna htan wu ai.
13 Dai hpang Balak gaw Balam hpe, ?Israela masha nkau mi hpe sha nang mu lu na shara kaga de ngai hte rau htawt sa wa ga. Dai yang kaw na, nye a matu shanhte hpe matsa ya e,? ngu nna tsun wu ai.
14 Balak gaw shi hpe Pisga bum pungding na Zohpim pa de woi lung wa wu ai. Dai yang e mung tawn hkungri sanit gaw nhtawm tawn hkungri shagu hta usu langai hte sagu la langai ngai nat nawng wu ai.
15 Balam gaw Balak hpe, ?Ngai wora ang Karai Kasang hpe sa hkrum we ga, nang gaw ndai na a wan nat hkungga makau e naw tsap nga u,? ngu nna tsun wu ai.
16 Dai Madu mung Balam hte hkrum nhtawm, shi kaning ngu tsun na lam tsun matsun ngut ai hpang dai ga wa hti dan na nga, Balak hpang de bai nhtang wa shangun wu ai.
17 Dai rai nna shi bai nhtang wa yang, Balak gaw Moba ningbaw ni yawng hte rau shi nawng jau ai wan nat hkungga makau e naw tsap nga ma ai hpe wa mu wu ai. Balak gaw dai Madu kaning nga tsun ai lam hkap san wu ai.
18 Shaloi Balam gaw ndai myihtoi ga hpe tsun shapraw dat wu ai:
?Sa rit, Zipora a kasha Balak e,
Ngai tsun na ga, madat la u.
19 Karai Kasang gaw masu chye ai masha ni zawn n rai;
Shi gaw myit chye galai ai shinggyim masha langai mi n rai.
Shi jaw da ai ga sadi amu hpe shi galaw ai;
Shi tsun ai hte maren galaw shatup nga ai.
20 Ngai gaw shaman ya na matu shatsam hkrum ni ai;
Karai Kasang shaman ya ai hpe ngai shabai lu na n rai.
21 Israela a du na ra ai aten e, shi hta n kaja ai lam hte
Ru yak tsin-yam tsindam dingbai dingna hpa mung du shang wa na n rai nga ai hpe ngai tau chye da se ai.
Dai Madu shanhte a Karai Kasang gaw shanhte hte rau rai nga ai;
Shi gaw shanhte a Karai Kasang rai nga ai nga nna shanhte tsun garu ma ai.
22 Karai Kasang gaw shanhte hpe Egutu mung kaw na woi shapraw wa nu ai;
Shi gaw dumbau zawn shanhte a matu gasat malan ya nga ai.
23 Israela amyu baw hpe matsa ai hta lawng hpaji, hpyi lamum hpaji hpa mung shang lu na n rai;
Ya chyawm gaw masha amyu ni Israela a lam hpe,
?Yu mu, Karai Kasang shing di kau nu hka!,? ngu nna kajai na mara ai.
24 Israela amyu baw gaw chyalai n-gun rawng ai hkanghkyi langai zawn rai nga ai;
Htim amya gang je la lu ai shan garai n sha, kawa sat da ai
Shan asai garai n lu lu dingsa shi hpum na n rai.?
25 Dai hpang Balak gaw Balam hpe, ?Dai Israela amyu masha ni hpe matsa kau na nang n hkraw nga ndai; rai ti mung shanhte hpe shaman sha gaw hkum shaman ya et!,? ngu nna tsun wu ai.
26 Balam mung, ?Dai Madu ngai hpe tsun ai hte maren sha, lam shagu ngai galaw lu na nngai, ngu nna ngai nang hpe tsun yu ni ai n rai ni?,? ngu nna htan wu ai.
27 Balak gaw, ?Ngai hte rau sa rit, nang hpe kaga shara de naw woi sa de ga. Dai yang e nye a matu shanhte hpe matsa ya na Karai Kasang mahkoi hkraw dam nhten!,? ngu nna tsun wu ai.
28 Shing rai nam mali hpe mu mada lu ai Peora bum pungding de Balam hpe woi lung wa wu ai.
29 Balam gaw shi hpe, ?Nye a matu ndai yang e tawn hkungri sanit gaw nhtawm usu sanit hte sagu la sanit hte hpe mung ngai hpang de dun wa marit,? ngu nna tsun wu ai.
30 Balak mung shi tsun ai hte maren galaw nna tawn hkungri shagu hta usu langai, sagu la langai ngai nawng jau ya wu ai.