21
1 Israela masha ni Ahtarim lam hku lung wa nga ma ai hpe Hkanan mung a dingda maga na Hkanan masha Arad hkawhkam na wu ai shaloi, shanhte hpe shi htim gasat nhtawm nkau mi hpe rim mat wa wu ai. Ref 21:1: Bhk 33:40.
2 Dai hpang Israela amyu masha ni dai Madu hpe, ?Ndai masha ni hpe dang shangun mi ai rai yang, shanhte hte shanhte a mare ni hpe nang Madu kaw ap ya nna, la hpa shara n nga mat hkra akrin atsai jahten kau na ga ai,? ngu nna dagam ma ai.
3 Dai Madu mung shanhte a ga na nna, Hkanan masha ni hpe dang kau lu na matu shanhte hpe karum ya wu ai. Israela masha ni gaw shanhte hte shanhte a mare ni hpe tsep kawp jahten kau ya ma ai. Shing rai shara dai hpe Horma ngu nna shamying ma ai.
4 Israela masha ni gaw Hora Bum na pru wa nhtawm Edom mung hpe hkawm gawai mat wa na matu, Nawng Hkyeng lam hkan nna hkawm sa wa ma ai. Rai ti mung amyu masha ni mahtang shanhte hkawm sa wa ai hkrun lam hta n hkam sharang lu ma ai majaw Karai Kasang hte Mawshe hpe gumlau ma ai. Ref 21:4: Trj 2:1.
5 Shanhte gaw, ?Lusha mung, hka mung n nga ai ndai nam mali hkan e si mat na matu nang anhte hpe hpa majaw Egutu mung kaw na woi wa nga n ni? Ndai asit awat nga ai lusha hpe anhte kachyi mi pyi n kam sha mat saga ai!,? ngu nna aput ma ai. Ref 21:5: 1Ko 10:9.
6 Dai hpang dai Madu gaw amyu masha ni a lapran de atuk rawng ai lapu ni hpe shangun dat wu ai. Israela masha law law hte gaw achye hkrum ai hte si mat ma ai. Ref 21:6: 1Ko 10:9.
7 Amyu masha ni mung Mawshe hpang de sit sa nhtawm, ?Anhte gaw dai Madu hte nang hpe nhtan shai ai hku tsun kau saga ai majaw yubak galaw kau saga ai. Ndai lapu ni hpe la kau ya na dai Madu hpe ya jang hpyi nem ya mi,? ngu nna tsun ma ai. Dai rai nna Mawshe gaw amyu masha ni a matu hpyi nem ya wu ai.
8 Dai hpang dai Madu gaw Mawshe hpe nhprang arai hte galaw ai lapu langai mi galaw nna hpun shadaw ntsa e sharawt tawn na tsun wu ai. Lapu achye hkrum ai ni kadai mung dai hpe mada yu nna shamai shatsai ai hkrum na rai ma ai.
9 Dai rai nna Mawshe mung magri mang lapu langai mi galaw nhtawm hpun shadaw langai a ntsa e sharawt tawn da wu ai. Shing rai lapu achye hkrum ai ni kadai mung dai magri mang lapu hpe mada yu nna shamai shatsai ai hkrum ma ai. Ref 21:9: 2Hk 18:4; Yhn 3:14.
10 Israela masha ni gaw matut bu hkawm nna Obot shara hta but nga ma ai.
11 Dai shara kaw na pru mat wa ai hpang, Moba masha ni nga ai mung a sinpraw maga na nam mali na hten run mat sai Abarim mare hta but nga ma ai.
12 Dai hpang Zered Kadit e shanhte dabang jung ma ai.
13 Dai yang kaw nna shanhte bai htawt hkawm nhtawm Amori mung hte htep dam ai nam mali hta nga ai Arnon hka a dingdung maga na shara kaw but ma ai. (Arnon gaw Moba mung hte Amori mung yan a lapran na lamu ga jarit rai nga ai.)
14 Dai majaw Suhpa shara na Waheb mare hte kadit ni;
15 Arnon hka hte Moba lamu ga jarit maga, Ara mare du hkra rwi rai hkrat wa ai kadit ni,? nga nna dai Madu a hpyen majan laika hta tsun kajai nga ai.
16 Dai Madu gaw dai shara kaw na Mawshe hpe, ?Amyu masha ni hpe jahpawng tawn u; ngai shanhte hpe hka jaw na mawe ai,? ngu nna Hka Htung ni ngu shamying ai shara de matut sa mat wa ma ai.
17 Dai aten hta Israela amyu masha ni ndai mahkawn mangoi ga mahkawn shakawn ma ai:
?Hka htung ni e, nanhte a hka shapraw mu;
Dai hpe mahkawn mangoi ga hte anhte hkap shakawn na ga ai-
18 Hka htung dai hpe hkawhkam shadang sha ni hte
Amyu masha ni a ningbaw ni htu ma ai,
Hkawhkam sumdoi hte shanhte a dawhkrawng
Ni hte htu manu ai.?
Shanhte gaw nam mali kaw nna
19 Matana de, dai yang kaw nna Nahaliela de, Nahaliela kaw nna
20 Bamot de, Bamot kaw nna Pisga bum pungding a lawu hprut na nam mali hpe hproi rai mu lu ai Moba mung na Kadit de du hkra hkawm sa wa ma ai.
(Trj 2:26-3:11)
21 Dai hpang Israela amyu masha ni gaw Amori Hkawhkam Sihon hpang de kasa ni hpe shangun dat nhtawm,
22 ?Na a mung hku anhte ga lai wa lu u ga, anhte hte anhte a yam nga ni nmaw lam sha hkan nna na a yi sun hkauna hte sabyi sun ni hpe n kabye ya na ga ai. Hka htung hka mung n lu na ga ai; na a lamu ga kaw nna tawng mat wa ai aten du hkra nmaw lam kaba hku sha anhte hkan na ga ai,? ngu nna tsun ma ai.
23 Rai ti mung Sihon mahtang Israela amyu masha ni hpe shi a mung hku ga lai na ahkang n jaw wu ai. Shi chyawm gaw shi a hpyen luksuk hpe shinggyin la nhtawm nam mali na Yahaza mare de pru sa nhtawm Israela amyu masha ni hpe htim gasat wu ai.
24 Rai ti mung Israela amyu masha ni mahtang majan pa e gumlau hpyen law law hte hpe sat kau ma ai majaw Arnon hka a dingdung kaw nna Yabok du hkra madu la kau ma ai. Amon masha ni a lamu ga jarit chyawm gaw grai ngang hkra galaw da ma ai.
25 Dai re ai majaw Israela amyu masha ni gaw Amori mare ni mahkra hte hpawn, Heshbon hte de a grup yin kahtawng ni hte dai kahtawng ni hkan shanu nga ai ni hpe lu la kau ma ai.
26 Heshbon gaw shawng na Moba hkawhkam hpe gasat kau nhtawm shi a lamu ga yawng hte Arnon hka du hkra gasat la lu ai Amori hkawhkam Sihon a mare daju rai nga ai.
27 Dai re ai majaw ga shagawp hku nna mahkawn da nga ai:
?Heshbon de sa marit, Hkawhkam Sihon a mare de sa marit!
Dai mare hpe bai gaw gap nna shangang shakang da sai hpe anhte mu mayu ga ai.
28 Lang mi ndai Heshbon mare kaw na Sihon a
Hpyen luksuk gaw wan zawn pru hkawm let,
Moba mung na Ara mare hpe jahten kau nu ai;
Arnon a lahta na kawng ni hpe mayu kau nu ai.
29 Moba masha ni e, nanhte a matu kade sha hkrit hpa rai nga myit hka!
Hkemosha hpe nawku ai nanhte gaw hten run mat manit hka!
Nanhte a hpara gaw shadang sha ni hpe hprawng htawt shangun nna,
Numsha ni Amori hkawhkam a bawng dung masha ni tai nga masai. Ref 21:28-29: Yer 48:45-46.
30 Rai ti mung ya shanhte a amyu matu ni nga ai
Heshbon kaw nna Dibon lam htum hkra;
Nashim kaw na Medeba mare makau na Nohpa du hkra
Jahten sharun kau ai hkrum nga sai.?
31 Dai rai nna Israela amyu masha ni gaw Amori mung hta nga nga ma ai rai nna,
32 Yazera mare hpe htim gasat la na matu, kaja htum ai mahkrun hkan sawk tam na masha ni hpe Mawshe shangun dat wu ai. Dai hpang Israela masha ni mung dai mare hte de a grup yin na kahtawng ni hpe gasat la nhtawm dai mung e nga nga ai Amori masha ni hpe shaden kau ma ai.
33 Dai hpang Israela masha ni kayin wa nhtawm Bashan mung de hkrang ai lam hku lung wa ai rai nna Bashan Hkawhkam Oga mung shi a hpyen luksuk hte shanhte hpang de pru sa nna Edri shara e hkap gasat wu ai.
34 Dai Madu gaw Mawshe hpe, ?Shi hpe hkum hkrit et; shi hte shi a masha yawng hpe mung, shi a lamu ga hpe mung dang la kau na ahkang nang hpe ngai jaw na de ai. Heshbon mare na Amori Hkawhkam Sihon hpe shamyit kau ai zawn shi hpe mung shamyit kau na rai ndai,? ngu nna tsun wu ai.
35 Dai rai nna Israela amyu masha ni gaw Oga hte shi a shadang sha ni hpe mung, shi a masha ni yawng hpe mung, langai mi mung n ngam da hkra sat kau ma ai. Dai hpang shi a lamu ga hpe mung shanhte shang gasat la kau ya mu ai.