20
(Pru 17:1-7)
Israela shawa hpung ting gaw shata langai ngu na hta, Zin Nam Mali de du nna Kadesha shara e dap jung nga ma ai; dai yang e Miriam si mat nna lup makoi da ma ai.
Shanhte dabang but ai shara hta hka n nga malu ai majaw amyu masha ni Mawshe yan Arun kaw sa zup nhtawm, ?Dai Madu a Sum man hta anhte a hpu nau Israela amyu masha ni hte rau si mat ga ai rai yang grau kaja na ga ai. Nang anhte hpe hpa majaw ndai nam mali kata de woi bang wa nga n ta? Anhte a yam nga ni hte rau ndai yang e si lu na rai nga ga ni? Nang anhte hpe hpa majaw Egutu mung kaw nna woi shapraw wa nhtawm yu myit htum na zawn re ai hpa mung n tu ai ndai shara de woi wa n ni? Ndai yang e nai mam mung, maihpang si, sabyi si hte hkainu si hpun ni hpa mung n tu nga ai; lu hka ntsin pyi n nga ai shara rai nga ai,? ngu nna aput let tsun ma ai. Mawshe yan Arun mung dai amyu masha ni kaw na pru mat wa nhtawm Sum chyinghka lam e wa tsap nga ma ai. Shan ga de dingnyawm dagup nga ma yang, dai Madu a htoi tu ai hpung shingkang shan kaw dan pru nga ai.
Dai Madu gaw Mawshe hpe, ?Ga Shaka Sumpu a man na dawhkrawng la u; dai hpang nang hte Arun gaw shawa hpung ting hpe jahpawng tawn da na rai myit dai. Shaloi shanhte yawng a man e dai nlung kaw na hka shapraw ya na lam tsun na rai ndai; hka mung dai kaw na kahpawk pru wa na ra ai. Ndai hku nna amyu masha ni a matu nlung kaw na hka pru wa nhtawm shanhte mung, yam nga ni mung lu lu na rai ma ai,? ngu nna tsun wu ai. Mawshe gaw dai Madu hkang da sai hte maren dawhkrawng sa la wu ai.
10 Shi hte Arun mung shawa hpung ting hpe dai lunghkrung a man e jahpawng tawn nhtawm Mawshe gaw, ?Gumlau masha nanhte e, madat mu! Ndai lunghkrung hta na hka anhte lu la na rai nga ga ni?,? ngu nna tsun wu ai. 11 Dai hpang Mawshe gaw dawhkrawng sharawt nna dai lunghkrung hpe lahkawng lang kayat dat wu ai hte hka shi kaba langai kahpawk pru wa nhtawm amyu masha ni yawng hte yam nga ni hka lu lu ma ai.
12 Rai ti mung dai Madu gaw Mawshe yan Arun hpe daru kau wu ai. Dai rai nna shi gaw, ?Nan gaw Israela amyu masha ni a man e nye a chyoi pra ai daru magam n-gun hpe hkam la na makam masham n law nga myit dai majaw shanhte hpe jaw na ngu nna ngai ga sadi tawn da ai mungdan de nan gaw shanhte hpe woi shawn lu na n rai myit dai,? ngu nna tsun wu ai.
13 Israela amyu masha ni dai Madu hpe aput angun ai hte shi chyoi pra nga ai lam shanhte hpe madun dan nu ai gaw Meriba e byin nga sai.
14 Mawshe gaw Kadesha kaw nna Edom hkawhkam hpang de kasa shangun dat wu ai. Shanhte gaw, ?Ndai mungga gaw na a sai rum, Israela amyu masha ni kaw na rai nga ai. Anhte a kaji kawa ni Egutu mung de du yu wa nna, 15 anhte gaw dai mung e shaning law law nga kau da nhtawm anhte hkrum sha kau saga ai nni nkri yak hkak lam ni hpe nang chye nga ndai. Dai Egutu masha ni mung anhte a kaji kawa ni hte anhte hpe zingri zingrat di mi ai; 16 anhte hpe karum la na matu dai Madu hpe jahtau ga yang, anhte a jahtau ga hpe na ya wu ai rai nna anhte hpe Egutu mung kaw nna woi wa na matu lamu kasa shangun dat ya mi ai. Ya chyawm gaw na a lamu ga jarit na Kadesha hta e anhte nga nga saga ai. 17 Chyeju hte na a mung hku ga lai wa na ahkang jaw mi law. Anhte hte anhte a yam nga ni lam n yit ai hte na a yi hkauna hte sabyi ni hpe mung n kabye hkra ai sha sa wa na ga ai. Na a hka htung na hka n ja lu na ga ai. Na a lamu ga kaw nna n tawng tawng gaw nmaw lam kaba hku sha anhte hkan na ga ai,? ngu nna tsun wu ai.
18 Rai ti mung Edom masha ni mahtang, ?Nanhte hpe anhte a mung hku ga lai na lam ahkang n jaw lu ga ai! Nanhte rai nna ga lai wa mayu myit yang, anhte pru sa nna nanhte hpe htim gasat na ga ai,? ngu nna htan dat ma ai.
19 Israela amyu masha ni gaw, ?Nmaw lam kaba hku sha anhte hkawm na ga ai; anhte shing n rai anhte a yam nga ni na a hka lu ga yang gaw de a manu jaw na ga ai. Anhte a ra sharawng ai lam gaw ga lai mat wa na lam sha rai nga mali ai law,? ngu nna tsun ma ai.
20 Edom masha ni mung, ?Anhte ahkang n lu jaw ga ai!,? ngu nna tsun ma ai. Dai hpang Israela masha ni hpe htim gasat na matu shanhte gaw hpyen luksuk kaba hte pru sa wa ma ai. 21 Israela masha ni shanhte a lamu ga hku ga lai wa na lam Edom masha ni ahkang n jaw ma ai majaw Israela masha ni yen kau da nhtawm kaga lam hku sa mat wa ma ai.
22 Israela shawa hpung ting gaw Kadesha kaw nna pru mat wa nhtawm Edom lamu ga jarit e nga ai Hora Bum de du ma ai. 23 Dai yang e, dai Madu gaw Mawshe yan Arun hpe, 24 ?Israela ni hpe jaw na ngu nna ngai ga sadi tawn da ai mungdan de Arun shang lu na n rai; nan lahkawng mahtang Meriba shara e nye a hkang da ai ga hte nhtan shai nna gumlau manit dai majaw si na rai ndai. 25 Arun hte shi a shadang sha Eleaza hpe shaga la nhtawm Hora Bum de woi lung wa let, 26 dai yang e Arun a hkinjawng hpun palawng raw la nna Eleaza hpe jahpun na rai ndai; dai yang e Arun si mat na rai wu ai,? ngu nna tsun wu ai. 27 Mawshe mung dai Madu hkang da nu ai hte maren galaw wu ai. Shanhte gaw shawa hpung ting a man e Hora Bum de lung wa ma ai. 28 Mawshe gaw Arun a hkinjawng palawng raw la nna Eleaza hpe jahpun ya wu ai. Arun chyawm gaw dai bum pungding ntsa e si mat wu ai; Mawshe yan Eleaza mung bai yu hkrat wa ma ai. Ref 20:28: Pru 29:29; Bhk 33:38; Trj 10:6. 29 Arun n nga mat sai hpe shawa hpung ting mu ma yang, shanhte yawng gaw shi a matu nhtoi sumshi ya tup hkrap ngu hkrap ngoi rai ma ai.